分手後，遇上你: 愛上了嗎？

「哼哼，點解先，fd底就唔比我喊丫？定係我喊你會心痛丫？」Jessica用一個好串既表情問我。
比佢咁問，心入邊有個莫名其妙既感覺，而且心臟果到仲跳得好快，快到就黎跳出個身體咁，我盡量令自己冷靜落黎，之後好串咁答番佢「食啦你，你喊我點會心痛丫，只不過見你喊得咁勁，我驚人地以為我蝦你姐。」
佢聽完之後，只係講左一個哦字，就冇再講野，佢一直陪我陪到十點，就番左屋企，而我就繼續留守醫院，等我老豆醒。凌晨三點個時，我老豆醒左，佢見我仲係到就叫左我番屋企，我好聽話咁打左個的番鰂魚涌，番到去以經四點幾，我好快咁沖左個涼，之後訓係床到，想訓又訓唔到，冇計，因為成個腦海不斷出現Jessica個樣，每當諗起自己冇啦啦摟住佢個情節，個心就跳得好鬼死快，快得離譜，突然醒起之前係酒吧都試過個心跳得咁鬼快，唔通自己真係愛上左佢？不過冇理由丫，又唔係同佢識左好耐，點會愛上佢丫，自己都笑自己白痴，之後打左自己一下，就繼續訓。
結果第二日，由於太夜訓，搞到遲曬大到，9點先番到學校，番到去又比人記名，放左學之後又要留堂一個鍾，諗起真係喊出黎。
放左學果時，準備起行去留堂個時，班中有個暴力女大叫我個名，我呆左一呆，望過去諗住問佢咩事，就見到Jessica企左係門口。