分手後，遇上你: 緣份？

自從果件事後，我再冇見過呢個女仔，而我就繼續我既生活，我既生活無他，起身、番學、放學、番到屋企就睇下小說，咁就過到一日。有人問我，咁既生活你唔覺得悶咩？但我好想問，係呢個咁逼既香港，如果想搵個靜既地方睇書，除左屋企，仲有邊到呢？
由於掛住睇小說，搞到成績差曬，被逼轉校既我，好無奈地由一間好既學校，轉去寶馬山上既學校。大家都知道寶馬山上有五間學校被稱為寶馬山五嶽，小弟不幸，轉入其中一間，同時因為咁，命運之輪都開始轉動。
入校第一日，就比人捉頭髮，唔係因為頭髮顏色問題丫，而係因為小弟個頭，受古惑仔中雞爺既影響，因而留左個一樣既頭髮，所以唔比人捉就奇啦。當我合埋眼，狠下心剪左佢既時候，而再打番開隻眼之時，仙女竟然出現係我眼前，著住校服既佢，如同當時係酒吧見到果時一樣，都係咁吸引，當係行過我身邊既時候，佢竟然同我say hi，原來佢仲記得我，我當時開心到都唔知講咩好，點知佢見我唔講野，以為認錯人，只係唔好意思咁講左句「sorry,我認錯人。」之後就行左去，正當佢要行番上樓既時候，我突然大聲咁講「你冇認錯丫，係我丫，我叫丫k，可唔可以同你交個朋友丫？」