《我老婆唔係我女朋友》【那些年／日常／校園】 第一至三章: 【第三章】 會不會剛好妳也喜歡我（３）
「哈，唔好擳我…我都唔想病㗎，不過你摸上嚟屋企搵我，就真係嚇嚫啊，但係都好，我知你好緊張我呢，你嗰次噉樣主動啲先啱嘛。」她嫣然笑道。
「嘩，你都唔知我幾淆底呀，一陣畀人當跟蹤狂、變態佬，報警拉埋就一世喇。」我終於可以說出當天擔憂的心事。
「哈哈…無膽仔，想搵高質素女朋友係有『風險溢價』㗎喇，高風險先有高回報嘛，你唔知大坑西係出名嘅港姐屋邨咩？」她心情大好。
「呵，同我玩EA吓嘛，畀個PE嚟計吓抵唔抵投資先啦。咦喂，重磅股嚟喎，頭先嗰個肥妹，我抱佢時差啲扭嚫條尾龍呀。」激得她瞪著大眼怒睥我。哈哈，以後呢隻女神底優質股應該有龐大的升值潛力。
話說EA（Equity Analysis）是我們其中要修的科目，而一般衡量和評估個別股票的股價是否合理就會用到PE（市盈率），簡單講係分析隻股抵唔抵買了，我們每個月都要交功課模擬股評的。據「連登福音」內記載，搵老婆應該由大專（大學）開始，努力尋找有潛力的優質股，乘股價未被炒上時趁低吸納，長揸到尾有息派又有紅利，仲可以隨時私有化。呀，我唔贊成短炒投機，我只支持長線投資。
誒…我究竟寫緊乜嘢，咁似財演啲專欄…