《我老婆唔係我女朋友》【那些年／日常／校園】 第一至三章: 【第三章】 還是覺得妳最好（２）
你估我傻的嗎？要跳都同我隻蕃薯妹跳啦，才俊你eat shit啦。
我迫於無奈下立即站起來，向阿心伸出手，輕聲的問她：「May I？」不等她有反應就先捉著她手，反正跟她拖手也不是第一次了。這樣目的相當簡單——截胡！（又是陳婆教的）就是在「撒加」條毒隱出「幻朧魔皇拳」迷惑「雅典娜」前先收佢皮，無得埋身就無得出招。
阿心見我咁醒目，有點喜出望外，笑靨如花的站起來，我斜眼盯住條毒忍行到中途剎車，神情落漠（應該係，除非唔係，其實太暗、太遠看不清楚）的調頭走；嘿～搞𠶧，返屋企「跳你老舞」啦，才俊！
正想拉阿心坐返埋位，她奇怪的問：「你又做乜嘢呀？」
「吓，才俊收咗檔啦，咪返埋位坐囉。」我理所當然的答她。
她一副又好氣又好笑的表情：「喂呀，已經last FOUR喇，仲唔跳舞做乜嘢呀。」原來剛才截胡抵擋「幻朧魔皇拳」時，唔經唔覺已經完了一隻舞了。
「但我真係唔想跳喎，放過我啦好嘛？」我苦口苦面的哀求。
「唔得呀！你啱啱啲方塊步先熟少少，快啲嚟繼續練習呀。嗱，你唔嚟吖嘛，我去教才俊喇。」小野蠻竟然用嗰條毒隱來威脅我，以毒攻毒。
「吓…唉～嚟就嚟啦。」我萬般不情願。
「嘻，係小朋友自投羅網咋，姐姐無迫你㗎，哈哈…」她奸計得逞很開心的笑。
頂你，次次吼住人上五吋下五吋最痛嗰度先打落去，計我話女神「雅典娜」先係神拳無敵。如是者我又再由人間折返地獄，唯有自我安慰聽她的嬌嗔當止痛藥吧，總比狗公埋身擔走咗好，真心慶幸未有功虧一簣！