《我老婆唔係我女朋友》【那些年／日常／校園】 第一至三章: 【第三章】 陰晴不定的舞會前夕（４）
「吓，你唔知㗎？嗯～類似入場劵拆家啦，我包銷一二十張飛，跟手平啲賣畀同學呀，Friend呀，賺下差價，有時就賺返晚免費入場囉，你中學時無落D嘅咩？」馬飛再次覺得我是偷渡客無疑。
「真係無喎，唔認薯仔都唔得，我讀男校以前都係去吓機竇、波樓、踎吓馬會噉咋。係呢，聽講話落到D，喺啲女後面䟴吓䟴吓，拖得手就去馬囉喎，真定假㗎？」既然有「色」途老「馬」（個隱樣真係叫馬飛嘛），順便求證吓啲江湖傳聞都好。
馬飛即時專家上身，以權威的口吻解釋：「此言差矣，無錯落D嘅氣氛熾熱，係會令人神魂顛倒，但須知D場乃係英雄地，入面各路人馬都有，一個唔覺意索著火水就無好下場，雖然有成功例子，但我話你知啦，正常統計係九死一生嘅。女～～並唔係噉樣溝嘅。」
「嘩，聽落都幾危險噃。」其實我是覺得啲女比較容易九死一生多啲，轉頭一定要再三提醒嗰個無知少女。
搞到我有點擔心，唔知個衰妹現在點呢。
「唏，去玩時小心啲，守規矩就唔會有事啦，你去波樓玩咪一樣危險，又點相又劈友。」馬飛不以為然。
突然我想起條友其實只是重操故業，想用「DCA」溝淡第5張飛的成本，從中賺吓著數，當然我在他使用這平均成本法下，並無嚴重損失，所以亦無謂踢爆。
點知條友見我沉吟不語，以為我還在想剛才「去馬」的問題：「喂，唔使驚喎，等哥哥帶你去見識見識，舞會溝女冇咁危險嘅，況且就算舞會冇著落，我哋都可以落D加時再賽。」條友真係三句不離本行，務求𦧲到你去為止。
無謂同佢糾纏：「好啦，一陣睇吓點先。」我不置可否。