《我老婆唔係我女朋友》【那些年／日常／校園】 第一至三章: 【第三章】 陰晴不定的舞會前夕（３）
舞會當天中午馬飛來電，約大家提早返學校集合，我見天氣大約22度左右，只穿了件長袖恤衫加大褸，牛仔褲波鞋就回校了。
在Canteen集合時發現阿仙和阿May都穿得比平日隆重，妝也化得較濃，反而我們三個男的都比較日常，齊人後一起到集合點，原來也有不少其他學系的同學參加，目測都超過30人。
在學校廣場的巴士站等校巴時，馬飛已經在盤算舞會後的下一場活動。他向眾人提議：「一陣去完『波』，不如一齊去埋倒數啦。」
我比較緊張上車和到達現場的時間，隨口的敷衍：「去邊度先。」
馬飛忙不迭解釋：「個『波』好似11點前收皮，一係落D一係過老蘭囉。」
「落D我知吖，老蘭喺邊？」我是九龍西人，就算過海，多數都是去灣仔和銅鑼灣，幾乎無去過港島其他地區。
馬飛很驚訝我好像剛偷渡落嚟一樣：「蘭桂坊喎，酒吧街呢，嗰度由天星碼頭一路殺上德己笠街都有好多Disco㗎喎，YY、Soho，仲有成日有明星睇嘅DD添。」條友如數家珍一樣，又開始落力推銷。
我擰擰頭表示未聽過：「你唔係鍾意唱K咩，落D你又啱？」
「唏，此言差矣，以前讀中學時未有K唱，一個禮拜最少蒲3晚D啦，我有兼職做『燈頭』㗎。」
「『燈頭』？我未聽過喎，『燈籠』就聽過啫，咩嘢職級嚟㗎？」我聽過有參與社會團契的同學講，團友上位紮職會擔任不同的職位，但就未曾聽過有「燈頭」這個職稱，莫非是團契的新headcount？