《我老婆唔係我女朋友》【那些年／日常／校園】 第一至三章: 【第三章】 灰姑娘的煩惱（２）
「女俠，妳想點呀又…」我極度無奈的發出最後悲鳴。
見我又打敗仗噉樣，她轉憂為喜：「嘻，你諗諗先啦，你實有辦法嘅，今晚電話再傾，我返去上堂先。」今天的放學時間不同，所以放學各自回家。
個Jedi食髓知味，再度使出mind tricks，只是今次更加陰毒淩厲，彷彿是走入dark side的邪道一樣，在實力強弱懸殊下，白兵再度成為犧牲品…難道一日是兵，一世都是兵？
返入lecture room坐回Leon旁邊，他賊忒兮兮的靠過來：「喂兄弟，我係咪有啲嘢應該要知嘅呢？」
這種男女之事，其實我是不會和其他人分享的，就算是死黨都噉話（所以唔明點解會有出pool請食飯呢味嘢，公告天下？調轉被人收皮呢，要唔要其他人請返「解慰酒」，開解安慰一番呢？），但想深一層，聯校舞會應該是莊務之一，Leon有可能幫到手，遂決定跟他談談。有點無可奈何的說：「唉～煩過梵蒂岡呀，一陣放學先講啦。」
「噫咦？好似有大鑊嘢爆喎，嗱，我射波唔開會嘞，千祈唔好令我失望呀。」一副「小二先來兩斤花生」的幸災樂禍模樣。
放學後，兩條麻甩仔先去逛了一轉久違了的「巡視業務」，我們一般會到銅鑼灣，先逛各大日式百貨公司，自然「老銅金三角」的【大丸Daimaru】、【三越Mitsukoshi】、【松阪屋Matsuzakaya】是指定景點，一般都是睇JPOP CD、日本雜誌和漫畫，Leon多數會喺度跌錢的。
