《我老婆唔係我女朋友》【那些年／日常／校園】 第一至三章: 【第三章】 灰姑娘的煩惱（１）
灰姑娘的煩惱
原本只是隨口的閒談，想不到兩天後阿心又跑來lecture room找我，今次她更直接入來東張西望，好像有點焦躁，Leon先看到她，打我一踭叫我：「喂，應該嚟搵你㗎。」
我連忙行出去找她，她又示意要到外面說話。「喂呀～蘇菲話幫我哋報咗名去聯校跨年舞會呀～點算呀！」有點焦躁不安。
我見她好像很煩惱似的：「唔想去咪同佢講唔去囉，有一千幾佰個藉口啦，妳可以話老竇唔准、無伴陪妳、夜晚又無人送妳，點都得啦。」就是未有男友唔准這個選項。
「唔得呀～佢話收唔夠人，想我哋去戥腳充撐場面，仲話到時介紹男仔我識咪有人送囉，佢哋個個都去呀。」說時開始有點忟憎了。
「噉咪去囉，妳又有仔溝，fat fat啦。」話雖如此，但我心裡其實有點不開心，有機會畀狗公埋身擔走咗都幾煩，只恨我極其量也只是「朋友以上」，根本無位置阻止她去溝仔。
見我反過來勸她去，她有點無奈：「仲亂噏，你明知我唔鍾意去呢啲地方㗎啦，點算呀…咦，等等？！」她好像突然醒起了些甚麼事。「嘻嘻，不如你去舞會吖，然後我～陪～你～去！」
我大聲的反對：「嗱，今次真係唔得呀吓，妳自己應承人哋去㗎，自己搞𠶧佢呀。」佢真係癡咗總掣，叫個肥矮毒去舞會獻世？！
阿心瞇著眼斜睥我，好整以暇的說：「係咪真係我～自～己～去無所謂先？」
頂妳又出呢籠？！