《我老婆唔係我女朋友》【那些年／日常／校園】 第一至三章: 【第三章】 窩心的糯米飯（３）
報告完晚餐的情況後，她又開始講她們那班女大生的情況，某某讀【灣大】搞上莊、某某讀【肉園】準備下放到學校實習，噢，【肉園】即是【烤肉樂園】，那間專門培訓教束的專上學院。
然後她終於提到一個我稍為有印象的名字了：「原來呢，蘇菲都好受歡迎㗎，佢話原本今晚有兩個人嚟接佢㗎，都唔係我哋學校嘅。」
我有點驚訝女生們連呢啲情報都會分享。「咁利害？睇唔出喎。」
她點頭說道：「係呀，佢而家搞緊啲聯校活動，識好多其他學校嘅人㗎。」
想起中午Leon提過蘇菲是莊友，我點頭道：「嗯，我都知佢係莊員。」
「佢仲話遲啲有舞會帶埋我哋成班去見識下喎。」她蠻有興趣的說著。
「呵，成班約埋去溝仔噉話囉喎。」我有點不以為然。
「嘻嘻，睇吓點先啦。」她對我的話一樣是不以為然。
「妳睇妳吖，成面暗瘡，頭髮又黃又開曬叉，岩岩巉巉、甩皮甩骨噉，點溝仔呀。」呢個女生永世都是素顏返學look，只因今晚要見舊同學才稍為執一執。
「唓，真係去先算啦，最多紮起啲頭髮咪睇唔到囉。喂𡃁仔，你頭先講咩呀？乜嘢岩岩巉巉甩皮甩骨，你唔想大呀！」小吱喳突然變成小野蠻。
第二天返學，她還是梳那個半馬尾的公主頭，只是穿回平日返學look的服飾，我促狹的問她是不是無洗頭，惹得她瞪眼說：「費事有人小器話我同佢出街甩皮甩骨啦。」哈，話中有骨呢。