《我老婆唔係我女朋友》【那些年／日常／校園】 第一至三章: 【第三章】 窩心的糯米飯（２）
「喂，好爛呀，妳唔係女仔我打咗妳喇。」我都有點無氣了。
「呀，無腳行都得，你孭我囉。」她又扮起天真的口吻。
「妳開胃呀，我仲要加錢叫佢『打你個小人口，等你有嘢唔識講』。」唔係講笑，佢今晚成隻開籠雀噉，真係無氣陪佢癲。
吵吵鬧鬧中上了通宵紅巴，我們坐到最後一行二人位，她遞了外賣給我：「嗱，天寒地凍，買畀你暖吓㗎，試吓係咪真的咁好食？」
我接過打開膠袋，用白雞皮紙（包叉燒、腸粉那種港式牛油紙）包著沾滿鼓油的糯米飯。我吃了一口：「嗯～好香，仲熱喎～」秋冬晚上吃糯米飯，那種滋味真是不得了。
「好唔好食呀？」她用充滿期待的眼神看著我。
「堅係好食喎，妳都試啲啦。」我用膠羹餵她，共用餐具食嘢我們都習慣了。
「好吖，我食一啖試味啦。」她笑著吃了一口。
「嘻，我都估妳肥妹為食啦。」個衰妹真係好嘴饞的。
她吃了一口後橫我一眼，口齒不清的咕噥著：「嗯～真係幾好食喎，我唔要嘞，今晚已經食到好飽嚕。」
接著我一邊吃糯米飯，一邊聽她小吱喳般述說今晚聚會的情況，原來一班女大生（我聽到的大約有5～6人吧）今晚去了謝斐道那間【蕉葉咖喱屋】吃晚飯，所以她行過來鵝頸橋這邊只是幾步路程；這個傻妹好像「劉姥姥遊大觀園」一樣，對用新鮮芭蕉葉做碟、阿差現場表演拉茶、油酥餅像轉碟般表演，當然還有白飯任裝讚嘆不已。
雖然今晚趕喉趕命，又做「日本首相」左騰右騰去找她，但看到她如花笑靨後，一切都值回票價，加上又有糯米飯吃，真的身心俱暖。