《我老婆唔係我女朋友》【那些年／日常／校園】 第一至三章: 【第三章】 鵝頸橋下的Stormtrooper（３）
以前未有流動通訊設備，約人等候，大家都會自律守時，因為雙方在街上等待時，幾乎是等於失去聯絡，如果有一方因事遲到甚或是失約，是真正的「叫天不應叫地不聞」。
連跑帶跳滾到石硤尾站已經10:35，幸好不用等就有車，去到銅鑼灣站11:10，朝鵝頸橋方向狗衝B出口！你可能會問A出口Time Square打橫行出去咪係灣仔街市鵝頸橋囉，仲咁戇狗行B出口？話說當年Time Square都未起好，成個A出口都仍然係封住㗎，唉～～
抵壘灣仔消防局已經11:20，遠望正門唔見阿心蹤影，轉念一想，佢唔會咁醒無端端走去後門等啩？轉到後街駱克道後門望望又唔見人。死喇，唔係走咗吓嘛？大姐咪玩啦，唯有兜返去前門再等好了，就是這樣我不停的前門、後門又前門的巡邏。
經歷了15鐘熱鍋上的螞蟻，個衰妹終於施施然，秤著個白色的外賣膠袋出現。仲笑嘻嘻的對著我說：「咦？咁啱嘅，等人呀？」
雖然已是深秋，但我人肥怕熱，一輪顛簸已經滿頭大汗，我有點忟憎：「行咗去邊呀，唔係喺大門口等咩？」
她似乎心情大好，仍然是笑瞇瞇的：「我11點兩個字到咗喇，唔見你咪周圍行吓囉。」
「哎呀，你激死我喇，下次要企定定等呀。」我有點不高興。
「噉如果我去買嘢畀你食呢？」她笑說著，又提起一直秤著的外賣在我眼前揈來揈去。
冷不防她有此一著，登時哭笑不得，唯有死撐：「噉妳等埋我先一齊去買嘛！」
「噉如果我急要去廁所呢？」她抿嘴笑道。
「駁嘴妳就叻，都係要等埋我先一齊去呀！」我發晦氣提高聲音。