《我老婆唔係我女朋友》【那些年／日常／校園】 第一至三章: 【第三章】 鵝頸橋下的Stormtrooper（２）
「哦，乜蘇菲係莊員咩？」我無知一問。
他抬頭瞥我一眼：「咩呀，諮詢大會你都喺度幫拖㗎，你唔記得咩？」原來蘇菲就是當天那個娘娘財務幹事，佢老竇仲「科水」８萬大洋做贊助。
「嗰日睇你表演嘛，鬼記得仲有邊個打邊個咩。」我如夢初醒，事實上我只對「鬆姐」那幕兵不血刃的表演印象較深。
他面露似笑非笑的表情，不經意的問道：「噉阿心專～登～嚟搵你做咩嘢呢又？」
「佢係我A2班groupmate嘛，交帶吓啲group project問題啫，邊有嘢呢。」這些藉口一早同阿心夾好了。
「哦，噉你自己主動啲，努力啲啦，兄弟。」似乎語帶雙關。「橫𠶧今日唔使開會，不如今日放學去睇碟囉？」
晚上在家吃完晚飯，上星期五剛剛播完《大時代》大結局，一眾街坊仍沉醉於慳妹香消玉殞的那幕《紅河谷》，對緊接阿燦主演的新劇《兄兄我我》，完全失去興趣（只是估不到這齣劇，反而紅了些經典口頭蟬：「你咪當我lulu」、「格格𡁻𡁻」等），連老媽也索性關電視聽收音機算了；我又未夠鐘「出差」，打機又好像不夠時間，只好入房攤一陣聽歌好了。
《大時代》大結局時播出的《紅河谷》。
https://www.youtube.com/watch?v=AIMXcDbgsO0
突然老媽敲門：「電話搵你喎，咦，又話出街嘅？唔去嗱？」
我睡眼惺忪掙扎起身，原來不知不覺瞌著了：「乜呀，未夠鐘出啫。」出去聽電話，原來是Leon提我帶回CD給他，他聽到我好像睡了，怱怱交帶兩句就收線。
我抬頭看一看大廳的鐘…！…10:15？！仆街了，還約好了說11點等，唔怪得老媽以為我取消行程，由石硤尾去銅鑼灣就算坐地鐵也起碼要1小時，唉～瞌一陣就過鐘！順手取起大褸跟老媽說聲就砰砰聲衝出門了。