《我老婆唔係我女朋友》【那些年／日常／校園】 第一至三章: 【第二章】 蜜遊後城寨市集（３）
沿福佬村道向賈炳達道方向行，經過阿心無興趣的【公和】和【合昌殯儀】。「以前我班friend逢跑馬日一定嚟飲豆漿順便望吓啲棺材㗎。」我想起以前班爛賭朋友的習慣。
「哈，學生都有咁迷信㗎咩？你哋入到馬會㗎？」望棺材即是「觀財」，屋邨長大的她一講就知。
「妳讀女校唔得啫，我哋九成人個校章都用雙面膠紙貼㗎啦，仲有一成人放學笠件Tee喺面又搞𠶧。」我們男校生的日常又豈是女校生可以想像呢。
「嘖～古靈精怪。」她頗有點不以為然。
談笑間行到賈炳達道，四周已經擺滿熟食攤販。那時候城寨外圍的賈炳達道和部份聯合道，是小販擺賣的熱點，以「走鬼」車仔檔為主；而東頭村道和東正道則以固定商舗居多，但是因為已經圍封進行清拆工程，地舗已經全數收皮；只餘賈炳達道一帶的走鬼小販仍在黃昏出動，他們都會在靠近城寨圍封的那一邊開檔，把握黃昏時段，街坊收工的黃金時間盡情叫賣，「喂熱辣辣～」、「你食乜嘢？」、「兩蚊串兩蚊串」等的聲音此起彼落。
熟食小販一攤接一攤延綿下去，每檔都人頭湧湧，彷彿是城寨邊界的擴展；而賈炳達道靠近九龍城的那一邊，就匯集了不同的地舗食店，有明火煲仔飯、即炒小菜、掛爐燒味和上海菜館，同街兩岸，小販和食肆壁壘分明，使這賈炳達道儼如一個熟食小市集，是九龍城早期的「食街」。
街頭近東頭邨那邊，幾乎是梗檔的潮式炸蠔烙、炸蘿蔔絲烙，對面是葛菜水、鮮椰汁和果汁（用攪拌機加水攪的），旁邊是煎釀三寶（其實是大鑊油炸）、炸雲吞、炸魚蛋、雞翼、雞髀等，夏天時還有原片西瓜、（糖）水浸菠蘿和竹籤串馬蹄，又有牛肉生煎包、鍋貼和三角形的蔥油餅，再往後行是數之不盡的甜食，例如雞蛋仔、格仔餅、麥芽糖夾餅、缽仔糕、馬仔米通，拿著大剪刀嚓嚓作響的五香牛雜、腸粉、韭菜豬紅、碗仔翅、生菜魚肉、咖哩魚蛋，還有用袖珍菜刀切著的鹵味、豬耳、雞腎、墨魚、紅腸、雞腳，最後當然少不了炒麵、車仔麵、砂炒栗子、燴蕃薯…
