《我老婆唔係我女朋友》【那些年／日常／校園】 第一至三章: 【第二章】 蜜遊後城寨市集（２）
再向前行去到衙前圍道街口，我指著對面角位那間【日新鮮果】對她說：「嗰間榨蔗汁舗呢，周Ｙ發成日係度飲嘢㗎，佢話呢個位望獅子山靚喎。欵，去唔去老店食豆花或者煎釀三寶？」我想起隔離街福佬村道，有家1960年已經開舗的【公和荳品廠】分店，於是順便建議一下。
「你又知？點解你好似好熟九龍城噉嘅？你明明住石硤尾，又喺深水埗返學㗎，唔通你以前住過九龍城咩？」阿心一輪嘴的問，看來已經有疑問好一陣了。
「哦，細路時老竇就成日帶我嚟玩，又去城寨食嘢，後來中學時有班朋友成日喺呢區打躉，放學隔日就過嚟玩啦。」又不是甚麼秘密，我隨口的答道。
「原來係噉～啊，唔食豆花喇，北河街都有【公和】啦，乜城寨有嘢食嘅咩？」小時候跟阿媽去北河街買餸時，有邊個唔係喺【公和】歇腳呢，身為石硤尾資深街坊的阿心，自然唔稀罕食豆花了。反而城寨對一般人來說，仍然有一重神秘的面紗。
「我睇新聞話城寨好似圍封晒準備拆嚕，不過外圍啲走鬼檔應該仲開，我估東頭邨嗰邊都仲有生意啩。」既然為食妹有興趣，我邊說邊帶她過馬路，經【公和】條街去城寨。
走在衙前圍道，轉入福佬村道前，看到【豪華餅店】，那些年我們對這種麵包餅店都不屑一顧，因為實在太過普通了，一般如我家巴域街那幾間茶記，全都自設餅房，新鮮出爐麵包和蛋撻（甚至西餅）根本俯拾皆是，只因【豪華】鄰近機場和城寨才引起日本人留意，後來經日本仔在國內吹捧，就漸漸地「大枝嘢」起來，我說它的出品只是非常一般而已，我哋巴域街嗰間老字號【占美麵包】隨時好食過佢。