《我老婆唔係我女朋友》【那些年／日常／校園】 第一至三章: 【第二章】 龍珠，九龍城都有啦（３）
當時街機都要1蚊一局，但租機卻只是5蚊15分鐘，後期當隻game開始過氣時，就割價變成5蚊半個鐘，總之時限內無限任玩、無限局數，其實是相當抵的，由於門庭如市，老細們為爭取時間搵錢，乾脆只用簿仔記錄計時。
初期「架步」只有兩間，一間是玩「街霸2」用Capcom CP底板，另一間是玩「餓狼傳說」和「龍虎之拳」（KOF第一代當年都未出呢），用Neo Geo MVS底板的（呀，當時還未有Supergun這種模擬器的，是用貨真價實的原裝街機板）。
「街霸2」大家都非常熟悉了，不用多介紹；話說「餓狼傳說」是第一隻雙打時可以聯手打大佬的格鬥遊戲，所以玩單棍時經常會聽到有人大叫「幫拖～」，就是危急時叫朋友入錢玩2 play救命，一起打贏大佬先再「私片」；而「龍虎之拳」就是第一隻引入儲氣系統出「超必殺技」的遊戲，「超必」一詞實因龍虎而起。
之後幾年家用遊戲機開始流行，而聲稱「完全移植」的遊戲更陸續湧現，導致買鐘租機生意，亦逐漸擴充成為租家用機了，戰場亦不再是兩條麻甩仔獨沽一味的「隻揪」，開始多了一些小學雞和學生妹來玩益智遊戲。
「點解你噉清楚嘅？你頭先連嗰塊乜嘢底板都講得出？」阿心聽我講解完，好奇的問我。
女生又點會對打機有興趣呢，所以我一早已經省去了「街霸、餓狼、龍虎」的內容：「因為佢哋買嗰兩塊街機板，係我個中學朋友，喺南角道間機舗拆出嚟賣畀佢哋嘅囉，佢中學畢業後走咗去間機舗做看舗，平日換吓散銀，處理食錢，收舗後又要幫手換ROM，維修joystick呢樣嗰樣，整整吓就乜都識得搞喏。不過條友而家去咗【高登】幫人砌電腦嚕。」