《我老婆唔係我女朋友》【那些年／日常／校園】 第一至三章: 【第二章】 龍珠，九龍城都有啦（２）
我帶著阿心上二樓，經過影印舗時，竟然看見由原裝《週刊少年Jump》影印出來的《龍珠》漫畫！賣10蚊雞一份。我跟阿心說：「哈，呢本咪我哋期期追嗰本週刊囉，睇嚟我哋都可以喺學校整個影印檔，賺返啲水腳。」
她抿嘴笑罵：「嘻，無聊…咦，點解呢度咁多學生排隊嘅？」行前兩個舗，出現一條人龍。
「哦，【龍珠】七大奇景之一嚟㗎，學生排隊「買鐘」等打機嘛。」我向阿心解釋。
學生著校服或者未夠秤入唔到「機竇」是常識吧，所以【龍珠】二樓賣game那幾間舗就想到，將成部街機拆散化整為零，把底板、手制和電視，嵌在手製角鐵架上，由於外觀上只是將零部件接線和接通電力，根本不能算是一台「街機」，然後再美其名時租給學生「測試」，那就穿著校服都可以跟朋友「隻揪」了。
老闆們以維修測試之名，逃避機竇的規管法例，當時為避免「架步」太過張揚，他們還會用白布簾遮擋著，讓學生躲在布簾後，坐在矮木凳上玩，夠鐘老細就拉開簾趕客，只是每天輪候者眾，就算有布簾都無法低調啦。
日復日的長龍，成就了【龍珠】七大奇景之首，後來亞記的《今日睇真D》都有報導這裡的盛況；而午飯和放學時間，更是最繁忙的時段，往往要輪候超過1個鐘頭的，很多學生為了過手癮或是私了恩怨，會乾脆犧牲食飯時間，食所謂的「機餐」；而【龍珠】也是區內各校的訓導主任，隔天來「行咇」的熱點，我親眼目擊過「走鬼」的盛況都不下數次了——訓導查牌，男左女右企好！