《我老婆唔係我女朋友》【那些年／日常／校園】 第一至三章: 【第二章】 愛・失 聯（１）
愛・失 聯
午飯後到A2班上retake科，一心以為可以馬上見到阿心，但睇勻全場也不見她的身影，反倒是馬飛依舊熱情非常，大力招手叫我坐到他那邊。「呢邊有位，呢邊呀～」
哈，昨晚想到的動物人格，馬飛會屬於那種動物呢？喜歡吵吵鬧鬧的超級社交型，會坦率誠懇地表達自己的想法——死拉活拽的都拖你一齊去唱K！擅長人際交往、熱情健談，喜愛熱鬧、願意與你親密接觸，只要去唱K，他就死心塌地對你，（似乎）會忠於朋友不會背棄。這還不是汪星人嗎？
甫坐下，他馬上靠過來：「嗱，噚晚開唔開心先？無介紹錯啦。」幾乎張口呵氣在我面上。
「喂大佬，咪哄咁埋啦，我乜都無做過喎。」條友真係好似狗狗一樣，表現得熱情如火。
「我明明見到你同阿心有講有笑喎，幫到手啦。嗱，抵請唱K喇啩。」馬飛鍥而不捨的追問。
「你都癡隱線嘅，唔傾偈唔通瞓覺咩。」我沒好氣的回應。
馬飛一臉狐疑：「你又係嘅，唔識食住上，又自己走先，梗係約埋一齊走嘛。」
我心中暗呼來了，因為阿心（我也是）不想成為別人的話柄，所以昨晚已經跟她擬定了劇本，我用帶點氣餒又晦氣的語調：「人哋話有人嚟接呀～我仲唔走先咩，下次呢啲K歌聯誼，仆街咪鬼預我，friend都無得做呀！」乘機落閘等佢以後唔好搵我哋戥腳。
他見我臉色不善，急忙安撫：「唏～噉又唔使咁勞氣嘅，下次唔搵阿心咪得囉。」
我在想好過無吧，敷衍的答道：「睇吓點先啦。」
他馬上又堆起笑臉：「噉下次唱K再預埋你喎。」
我心中嘆一口氣，所謂伸手不打笑臉人，呢條友唔止是汪星人，仲係名副其實的「好狗」添。