《我老婆唔係我女朋友》【那些年／日常／校園】 第一至三章: 【第一章】 管治在「菩薩」（３）
首先由辯才無礙的冠軍接過全部智障問題，例如廁所無水沖點算、汽水機食錢點算、要求你當眾叫口號、無故問你的私密問題等等…唉～啲問題與選莊有何關係呢？連我覆述時，我都覺得自己智力有問題，但不由你不信，真係有人問得出㗎！真係戥佢哋老竇老母可憐，幸好冠軍也不是省油燈，回應得體不亢不卑，是其是非其非，連指名要某位較為弱勢的幹事回答的問題，也被冠軍輕鬆兜返來自己演譯。
然後問到年度計劃書和相關活動安排，例如搞活動的流程之類，Leon以半個業內人士的身份，由預算、場地、宣傳、以至收費、退款等安排，都一一專業回應，似乎顯得比舊莊的「搞手」更有經驗。
而財務問題方面，參考舊莊全年支出都是70雞左右，按可預視的收入再加上百份百保證的贊助費，財務預算基本上是相當充裕的，完全沒有入不敷支的風險。
然而有一個前任幹事卻提出質疑：「你哋覺得自己好醒？計劃書、報告書好齊全？你哋所謂嘅計劃，無一個可行嘅！你點解唔用返上年我哋經過千錘百鍊嘅版本呢？」
風起了。