《我老婆唔係我女朋友》【那些年／日常／校園】 第一至三章: 【第一章】 黎G是佢同學！？（３）
吹吓吹吓，話咁快三節課又落堂，眼見心姐收拾好家當後孭袋就走，我有點緊張的望著馬飛，話晒已是retake了，萬一再衰，搞到tri-take，就真係一世都抬唔起頭了…
人醒真係見微知著，馬飛見我瞪眼向他，馬上作出反應：「Relax～我哋玩期結的，唔炒即日鮮，臨考試前先一鋪攞返㗎（指筆記）。」開課前的那個星期，三色台開播新劇《大時代》，一開場那幕冚家跳樓，人人睇到目瞪口呆，街頭巷尾的師奶阿伯現在都滿口股票術語，所以馬飛能夠出口成文，一點也不稀奇。只是無人估到《大時代》在十多二十年後，仍然繼續被吹捧為前無古人的講股神劇，是的，我當年也有追看的，卻是為了看周W敏、李L珍和藍K瑛而已。
「一陣抄燶期指，齊齊排隊上IFC，我第一個推你個仆街跳呀！」我也附和一下。
「點呀，有無下場呀？唱唔唱K？」馬飛講完期指偉論後順口問道。
廢青放學就梗係圍埋睇吓去邊，通常會有三種選項，一是返兼職啦，通常是幫人補習、搞傳銷，或者去到學期中段時會做實習；二是吃喝玩樂，通常柴娃娃一班人出街玩，不外乎睇戲、唱K、碌齡、飲飲食食之類，由於幾乎人人也有兼職，所以大家玩樂消費都比較疏爽，沒有那麼斤斤計較；三是返屋企自閉，或是打機、照顧家務、自摺面壁。學期頭是最輕鬆的一段時間，因為完全沒有溫習或做project之類的壓力。
「無啦，想等埋Leon去巡視業務。」Leon是上年同班的老死，大家都有打機和聽歌的嗜好，今天因為retake，所以不是和他一起上課。
「吓？佢哋今日放５點喎，阿May啱先經過吹咗兩句。」馬飛提醒我說。條友真係無敵嘅，行行吓都收到風。
我打個突，唉～今朝心情煩躁，完全忘記問問班友上堂時間表，唯有返歸吧。「噉好啦，我是日收皮嘞，返屋企打機，唔K了，你唱得飽啲啦。」
「嘩，你咁深閨，隨你啦。」馬飛無可無不可的聳聳肩。
說再見後，大家各自散了。唱K我是完全無興趣的，暑假剛抄了Final Fantasy IV，千頭萬緒未開始，早早返去玩吓好過。