《我老婆唔係我女朋友》【那些年／日常／校園】 第一至三章: 【第一章】 是好感，還是好奇？（４）
目送阿心離開後，馬上回頭找鄭T瑞算帳：「喂！你條粉皮四圍爆俾人知我retake咩？」正在和馬飛商量去巡視邊間K場的阿May，聞言微笑斜睨著我，一副食花生模樣，她上年跟我同是A1班的，對我因何衰retake是知情人士。
馬飛叫屈：「大人冤枉呀，我話一陣有人會問備課啲嘢咋，人哋問起你咩料嘛，咪照講囉，retake啫，我都有啦。咦？咪住…」他跟阿May交換了一個曖昧的眼神，陰陰嘴笑道：「你咁緊張嘅，唔通你…？」
「仆你…你鹵味呀。」阿May喺度唔方便直接問候馬媽媽。「無心理準備，樣衰嘛。」
馬飛回復平日的油腔滑調：「唏～後生仔要有啲挫折先識長大㗎嘛，無我呢啲良師益友，你一世都係小朋友呀。嚟，等哥哥帶你去唱K，見見世面啦。」我頂！講來講又遊說我去唱K。
「唱你鹵味！唔去呀，無錢呀，走喇。」不理他在後面怪叫，我頭也不回走了。