屍殺某街50號: 屍殺某街50號 (二十五) 青山
相信大家睇到呢度，一定明我講咩。
如果我繼續咁樣落去，又或者見人就講返呢件事出黎，我諗我好快會比人捉入青山。
全世界都當我FF，而事實上，可能呢個正正就係佢地想要嘅結果。
係車上面，我諗緊好唔好報警，不過到最後都係打消呢個念頭，一黎已經無人證實到我講嘅嘢。
二黎我唔知個勢力有幾大，對於一個普通人黎講，遇到好似我一樣嘅情況，可能會真係以為自己發左個好真實嘅夢。
冷靜完之後就繼續上高登睇返j圖網，但我做唔到，我一定要搵真相。
的士今次又係搵左好耐，今次真係點搵都搵唔到。
有無拆得咁快呀，大拿拿一座建築物，我叫司機喺我前晚記憶嗰頭轉黎轉去，1個鍾之後，就連個司機都開始以為我係傻佬。
「點呀 ? 大佬，搵唔搵到呀，呢度間間廠都一樣喇，都係咁上下 ! 你搵嗰間係點嫁 ? 」的士佬開始唔耐煩。
「好舊，好多層」我將我所知嘅話比佢聽。
「你係咪玩嘢呀，哥仔，你唔好講埋一樣有窗一樣有門 ?」的士佬嘅一句，令我成個人震晒 !
「係喇，唔一定要拆樓，唔一定要拆樓，要最快速度改頭換面，佢地拆窗就得。」我真係傻咗咁同的士佬講。
我最後醒咗五舊比的士佬，佢先無趕我落車，之後仲好熱心咁幫我搵到個外牆圍晒綠色裝修布嘅建築物。
又係好似當日咁夜ma ma ，分別就只係得返我一個，對住成間廢廠，我吞一吞口水，走左入去...
續(二十六)