屍殺某街50號: 屍殺某街50號 (十九) #鐵籠
呀，仲有，四周圍除咗呢兩樣奇9怪怪嘅嘢之外，就係一塊塊黑色鐵絲網...
上面仲要好似有啲唔知血定肉碎嘅嘢痴住，痴 L 線 !
而鐵絲網出便就係一支支粗過大脾嘅黑色鐵支，原來啲日光就係咁樣透入黎。
除此之外就真係咩都無喇。
講真，無論係黑色鐵絲網、粗過大脾嘅鐵支，甚至血同埋肉塊，其實都一早喺我想像之中，但銀行保險庫鋼門反而令我產生最大嘅戒心，我唔想知入便有咩。
我再仔細觀察多周圍一次，鐵絲網上面，血同肉碎都分佈得好平均，有啲位置好高都有，不過共通點就
係全部都痴晒喺網嘅入面。無錯喇，鐵絲網同埋大脾鐵支嘅存在，唔係防外，而係防止入面出返去。
呢個念一閃而過，我忍唔住全身打個冷震...
今次條街就仆硬喇，因為我相信而家好行唔行，已經身處喺一個巨型嘅鐵籠入便。
呢一刻我咩都唔諗，第一時間轉身，望過去頭先入黎嘅樓梯口度，真係有一道黑色鐵絲網連埋啲大脾鐵支，好快咁降緊落黎，仲要無聲無息咁降咗一大半添。
嗰下個腦即刻發發聲，我狗衝，係生係死睇呢次...
我自己都唔知係用跑定爬，總之唔理一切方法，點都要衝返出個鐵籠。
一到最後一秒，望到個距離，我個心實晒，因為我我知道已經趕唔切喇。我落咗個決定，
我用盡晒全身最後嘅氣力，座低個身，推女神過去。
續 (二十)