屍殺某街50號: 屍殺某街50號 (七) # 困獸
血腥味一淡，我即刻關埋木門。「咁Jason點算呀 ?」女神把聲沙晒咁問，我勁想答，衝出去救佢囉笨。
但把口就講「我諗佢咁大個人，見勢色唔對，識走嫁喇，無估錯佢頭先喺前梯口，要上要落都一定走得勁快。」
我先放低女神，我哋兩個全身差唔多比冷汗整到濕Q晒，但唔得閒理，亦唔想諗Jason住。
呢一刻最重要係求救，我又用返開頭個方法，一路摸住啲牆，一路搵窗口位啲木板。
只要拆得開啲木板，以家下4樓嘅高度，向住條街求救，就應該無問題既。如果一個好彩有條燈柱，咁就發達啦，到時大不了
仲可以試下爬落去添。
於是我就由木框開始摸起，每當一摸到牆與牆之間轉角嘅接駁位，我就數一數。
就係咁一路數到四，我又到摸返木門框，而且今次係另一邊嘅門框。
好，我死唔信邪，就返轉頭再摸一次，到最後總共來來回回咗4次...
基本上我已經掌握咗呢間方嘅格局，純正方形，每行十四步就有一個轉角位，香港地，實用面積黎講算唔錯，良心企業，可惜無窗。
咪住先，唔對路，入廢廠之前我望過座嘢一眼，右邊座向嘅單位一定全部都有窗嫁...
唯一解釋係有人將單位做咗手腳，向街嗰啲分分鍾全部都係假窗，今次真係困獸鬥。
續七