地下鐵的約會: 番外：如三分球般投進你懷裡 (8)
接下來的假期和考試，Jenny和Ben仍有互傳甜蜜信息，但回覆速度並不快，來往也不頻繁，因為兩人一個是天蠍座，一個是金牛座，做事相當專注。
「你地咁嘅柏拉圖式戀愛唔會分手咩？」浩然問Ben
「我對Jenny有信心嘅，同埋我都唔想㗎。你老味，考完試之後就要打學界初賽，賽程密到咁」Ben嘆氣
一整天的溫習過後，Jenny和玥婷通電話。
「唉，妳係首席我係團長，黎緊校慶個show鬼咁多嘢搞，無得拍拖喇～」玥婷訴苦
「唔好講到我唔使做咁喎。妳知唔知lead班師弟妹仲慘過做團長，仲有妳同浩然都過左蜜月期啦，影響不大」Jenny說
「咁妳呢？」「我？」
「妳同Ben啊…會唔會有影響㗎？」玥婷問
「邊有咁容易啊？佢已經俾我馴服到妥妥貼貼，妳知唔知嗰日我著hoodie佢流晒口水咁哈哈哈哈」Jenny口說不擔心，心底裡卻不自禁有點悸動。
熱戀期才剛開始，兩人就要分別一段時間。
好不容易，四人終於捱過考試。不過，Ben和Jenny各自要預備學界籃球比賽及樂團表演，沒有約出來拍拖約會。
「痴撚線，你真係唔要你女朋友喇？」浩然問
「比賽要緊啊，今次係我地最後一次打學界，點可以忽視？拍拖嗰啲就遲啲先算啦」
「大佬啊，我都約左玥婷去野餐啦，都係一日半日，唔使太緊張」浩然試圖遊說Ben放鬆一下，但Ben早已下定決心要專注球賽。
考完試的日子，就是在倒數著農曆新年的到來。
Ben和Jenny沒有怠慢，各自加緊練習，只是苦了一班師弟妹陪他們瘋了。
終於在年初三的晚上，Jenny和Ben拜完年後各自到了海濱長廊跑步。
Ben跑步的目的是為了鍛鍊體能，順道去買宵夜；Jenny就是因為練樂器練到生無可戀，所以才竄出來透氣。
從寶琳開始，Ben跑到將軍澳海旁已經差不多20分鐘，與此同時的Jenny也正在將軍澳啟程回家去。
無錯，兩個人咁都可以見面。
兩個人在海濱長廊迎面碰上，心裡又驚又喜，一方面是兩人實在太久沒有見面，另一方面這次見面不再需要有害怕出醜的顧慮了。
「哇！咁都撞到你嘅？」Ben顯得十分驚訝
「都話我地心靈相通㗎啦！」Jenny毫不客氣地擁進Ben懷裡
「喂…我好多汗啊，搞到妳個妝臭晒」Ben口裡說著嫌棄，實情卻十分享受
「我鍾意啊，吹咩？」
兩人在海旁卿卿我我，旁若無人，但理性的Ben知道如果長久下去Jenny只會更加成為一個不折不扣的痴女。
「喂…有人睇住㗎。」Ben無奈地說
「咁不如我地去食甜品？」Jenny雙眼發光地問
「好好好！我女朋友話乜就乜！」Ben拖著Jenny走回商場那邊。
對於被Ben牽著的感覺，Jenny覺得很微妙。Ben雖然外表冷酷，手心卻無比溫暖，讓人感到滿分的安全感。而Ben走路總是不苟言笑，不多說話，只專心走路。
「喂，你行路唔出聲嘅？」Jenny用手寸撞了Ben一下
「妳都幾好笑喎張天懿，行行吓路點解要講嘢？」Ben拿出了他鋼鐵直男的本領，毫不留情地重擊Jenny一下
「吖我平時屌得你唔夠咩？夠膽駁嘴？」Jenny跳起扭著Ben的耳朵質問
「喂對唔住BB豬…其實我意思係我要同妳行落去，所以要專心行咋」Ben心知不妙，連忙補救。
「兜得咁好，學埋晒浩然啲衰嘢啦」Jenny不理睬Ben逕自走前
「我無啊，同埋妳睇車啦，呢度有好多人踩單車」Ben除了反駁，也對Jenny呵護有加
「哦，唔使你提我都知啦。」
「使唔使咁嬲啊…抱起妳㗎」Ben試圖抱起Jenny
「你咪抱咯，我同你講我今個新年食左好多嘢，重死你！」Jenny說
Ben沒有理會，直接在大庭廣眾之下抱起了Jenny。
「新年流流講個死字妳真係口賤喎，不過妳都唔係重左好多啫」Ben恥笑
「喂你痴線㗎，我叫你就抱」Jenny很想掙脫Ben的懷抱，卻逃不掉
「好似妳痴線多啲喎，係咁勾引我做啲不當行為」Ben沒好氣地一路抱著Jenny走到甜品店。
一進到店鋪，Ben就已經去了下單。
「芋圓西米露、加朱古力雪糕，楊枝甘露」
「你唔係唔鍾意食呢啲㗎咩？同埋，你幫我芋圓加雪糕嘅？」
「我驚妳唔啱食咪叫定呢啲大路嘢，同埋雪糕係同我share的」Ben不懷好意地笑
「又食我啲嘢，哼！」Jenny說
「妳再食就肥㗎喇，等我受苦啦！」
甜品很快就到了，Ben和Jenny一人一口，甜蜜非常。
「妳唔驚俾妳屋企人見到咩？」Ben問
「吓？我專登叫佢地拜多陣年先，我自己下午就返左入將軍澳嘿嘿」Jenny說
「不孝到…利是都唔要，邊有錢出去玩啊？」
「等你養我～」Jenny捏捏Ben的臉頰，卻越捏越緊
Jenny打死也想不到，她會在甜品店偶遇母親和父親。
「喂痛啊…」Ben越掙扎Jenny越捏得緊
「阿女？」一把女聲問
「媽…點解妳會黎？」Jenny詫異地望著鄰桌的女人
Ben整個人僵住了，氣氛一度尷尬。
「你係…？」Jenny母親問Ben
「我係…呃…Jenny個男朋友」Ben低著頭說
Jenny和父母傾談著，眼光一時指向Ben。Ben只得默默地吃著他的楊枝甘露，不敢吱聲。
「後生仔，玩還玩要注意安全喎」
Ben聽到這句差點嗆死。
「老豆啊…嚇親人地喇」Jenny說
「我無事啊…Uncle Auntie唔記得祝你地新年快樂、萬事如意」Ben只好找個理由完結這個話題。
結果，這次見家長於尷尬的氣氛下結束。