地下鐵的約會: 番外：如三分球般投進你懷裡 (7)
Ben並沒有為自己點一杯飲品，一來他一向嚴厲控制飲食，二來他壓根對這些飲品沒興趣。
「你唔飲？」Jenny喝過一口後，看到Ben一直舔著自己的嘴唇
「唔啦，好甜」Ben說，但卻一直抿抿雙唇
「你個樣擺明口渴啦，飲啦」Jenny遞給Ben她的那杯珍珠奶
「妳飲過喎」Ben質疑地問
「我都未介意，你介意啲乜？」說罷，Jenny又嗦嗦的喝了一口
「咁我…真係飲㗎喇」
「飲啦，囉囉唆唆。你唔會…係嫌棄我口水尾吓話？哈哈哈哈哈，我啲口水甜㗎！」Jenny摀著肚子恥笑害羞的Ben
「邊…邊個話我嫌棄，我大大啖飲添啊」Ben一口氣喝下半杯珍珠奶。
「哇！微糖都咁甜，咳咳咳」Ben被嗆到了
「都話我啲口水甜㗎啦！你又唔信」不知為何，在Jenny口中說出的這句話沒有讓Ben覺得很嘔心。
「得喇得喇，妳最甜得未？」Ben回道
兩個人再次動身向海旁方向走去。
「哇原來已經11點58分喇，就黎聖誕節喇！」Jenny驚嘆
「距離考試又近一日…唉」現實的Ben大呻
「唔好咁啦，活在當下！」Jenny摟住Ben的肩膀說
「妳又啱嘅…」Ben露出罕有的笑容
「十九八七六五四三二一」
「聖誕快樂！」眾人大喊
周圍洋溢幸福的節日氣息，這對小情侶也不例外。
「聖誕快樂！王諾行」
「聖誕快樂！張天懿」
「好尷啊咁樣叫，都係叫我Jenny啦」Jenny捂臉說
「哦…但我都係鍾意妳個中文名多啲」Ben彈了一下Jenny的額頭
「喂啊痛㗎！話說，呢次係我地第一次一齊過聖誕？」Jenny問
「吓？梗係啦！妳係我阿媽以外第一個同我出街嘅…但咪住？妳話我地？」
「係啊，我～地」Jenny跳了起來吻了Ben的臉頰。
Ben的臉頰立馬滾燙起來，這種感覺真爽！還要在人來人往的海旁，真的生怕不夠人看到他們放閃！
「痴女現身！」Ben心想
「好怕醜啊，咁樣俾妳攞左初吻。」Ben說
「宜家認定你又要扮矜持，哼！」
「我就係矜持㗎喇！宜家去食甜品好唔好？」Ben戳中了女生的最愛之一——吃甜品。
「你又知我肚餓嘅？」Jenny驚訝地說
「因為我係妳男朋友咯！」Ben摸摸Jenny的肚子，裝作頭頭是道的樣子
「我可能又要收回對你歌認定！太口甜舌滑又靚仔，出到去容乜易俾啲妖精融左！」Jenny又捶了Ben幾下
「你知道我出到去係幾cool㗎啦，點會俾人融，我冰封佢地都仲可以！」
兩人說著走著就走到了甜品店。平安夜的街上總是人山人海，就算已經深夜仍有很多人輪候著甜品店。
「等唔等啊？好似好多人喎？」一向爽快的Jenny竟會停下問Ben的意願。這是源於她留意到Ben的疲態，而Ben打自踏入聖誕節後都開始不停打呵欠。
「等！我地第一次約會喎，梗係要全套做齊！」Ben死撐著眼皮說。這也難怪，在約會之前他還在球場上訓練。
「你好似好攰喎」Jenny擔憂地問
「得啦頂得順，仲有幾張檯都到我地啦」
好不容易進到甜品店，Jenny隨意點了個芋圓，Ben點了一碗熱腐竹蛋糖水。
「你食嗰啲嘢咁oldschool嘅？」Jenny問
「頭先凍嘛，我覺得腐竹蛋都幾豐富吖。我都想阻止妳叫芋圓㗎喇，咁多生冷嘢，不過見芋圓有少少凍妳又聽話著衫就算啦。」Ben一邊吃著一邊為自己的細心自豪。
「你乜都唔講你覺得我會開心咩？」Jenny鼓起腮子生氣地問
「宜家搞到好似我無付出咁咯。你睇下，你明知自己凍都要除衫俾我著，明知自己攰都要死撐食甜品，明知想阻止我又唔阻止我。喂啊！你鬧下唔得咩？你就唔可以講唔俾咩？」Jenny不滿地戳著碗裡的芋圓
「噗…哈哈哈」Ben禁不住笑了
「仲笑？我真係嬲㗎！」Jenny生氣得戳走Ben咬剩一半的雞蛋
「我係笑有個咁好嘅女朋友！佢雖然脾氣好奇怪，男朋友體貼佢會鬧返轉頭，但同時睇到佢好愛錫佢男朋友」Ben喝下碗裡餘下的糖水說
「哼！口甜舌滑，罰你埋單！」
當然，Jenny不會讓Ben花費太多，最後他們都AA制。
而Ben的重頭戲還沒有上演，就是送禮物。
「哇痴線，已經凌晨1點喇？真係要返屋企喇」Jenny驚呼
「等陣先，差啲唔記得送禮物！」Ben取出收在袋裡的畫家帽，替Jenny戴上
「哇！好襯我啊，你又知我鍾意棗紅色嘅？」
「都話我係妳男朋友，又唔信」而事實，Ben也只是隨心選擇了這個顏色
「多謝你！不過我無預備禮物喎」Jenny說
「今個聖誕有妳咪就係最好嘅禮物」Ben搔搔頭，害羞地說
「哈！你真係識講嘢，未見過有如此厚顏無恥嘅人！」Jenny笑得合不攏嘴
兩個人在尖東的海旁一路走著，已經凌晨一點多了。
「走啦！坐地鐵定巴士啊？」Jenny問
「哇咁夜喇咩？點解妳阿媽阿爸無催妳返屋企嘅」Ben不明所以
「中五啦…仲管住晒咩，況且我同佢地講我今晚約左男朋友」
「吓，咁如果我今日無表白妳咪好柒？」Ben說
「係㗎！但我預測到你會表白！」Jenny自豪地牽起Ben的手說
兩人登上了巴士，不消多久Ben的眼皮已經垂下了。即便如此，Ben仍緊握著Jenny的手，冰冷的手緊握在Jenny溫暖的手心中，面對這個逞強的男孩Jenny只能哭笑不得。
Jenny不曾認真凝視眼前這個大男孩。他並不是最帥的男生，也不算很浪漫，偶然還有點小脾氣，但不知為何Jenny就是被那兇巴巴的他吸引了。
通宵巴士車程總是冗長，但Jenny恨不得讓這車程無限延長，好讓Ben倚在她肩膀一輩子。只是，這場華麗約會終究迎來結束，他們已經到家了。
「醒吓喇，過左隧道喇」Jenny搖搖Ben
「哎呀…原來我訓左咁耐…」Ben迷糊地說
「落車喇，返屋企先訓啦」Jenny說
回到將軍澳已經兩點多，而且這算是郊區，人煙罕至。除了呼嘯而過的巴士，就只有兩人走路揚起枯葉的沙沙聲。
「咁就一日喇，聽日開始又要努力溫習」Ben伸懶腰
「係啊，考完試仲有排忙，可能無得再好似今日咁癲啦！」Jenny也嘆氣
「希望下次再拍拖唔會太耐啦！到妳屋企啦，快啲沖涼訓覺！」Ben說
「等陣先！Mua！呢個約會就完美喇！」Jenny用一個嘴對嘴接吻蓋住了Ben的嘴巴，結束了這場約會
站在原地的Ben仍愣住，而在電梯裡的Jenny，也臉紅紅地扭捏著，回味剛才的接吻。
「她/他的嘴唇，好軟啊！」
作者(單身狗一名)喺度祝大家情人節快樂！