地下鐵的約會: 番外：如三分球般投進你懷裡 (4)
好不容易，兩位情竇初開的中學生盼到了平安夜。
「執靚仔啲啦，咪失禮我啊」浩然在Ben家裡替他打扮
「得啦屌，我本身靚仔點整都係靚仔㗎啦」Ben說
「你收皮啦，有條女肯同你出去就打晒J咁」浩然不禁揶揄
另一邊，玥婷和Jenny正生疏地化妝。
「喂啊，太濃喇。我平時都唔化妝嘅」Jenny照著鏡子說
「痴線，宜家好淡咋，淨係遮左妳啲黑眼圈同打左少少粉底咋」玥婷說
「算啦化妝好煩，我本身都靚㗎啦」Jenny起身就走，卻被玥婷按下
「今次妳第一次拍拖，一定要靚爆鏡先得！一陣仲要同妳襯衫」玥婷連忙繼續幫Jenny化妝
下午六時，兩人準時出現在旺角地鐵站。
人群中的Jenny是多麼的耀眼！一頭為約會而染的金色秀髮，以及玥婷梳弄的空氣瀏海，配上粉白色衛衣及緊身褲，加上Jenny弄來了母親的香水，盡顯身材、型格卻又自然得體。
「哇…」Ben看得目瞪口呆，想不到脫去校服的Jenny更加像一個少女。
「望夠未啊鹹濕仔？」Jenny毫不留情地打在Ben的腹肌上
「啊Sorry…妳今日又…幾靚喎。」Ben說
「你都幾靚仔啊。咪住，你即係話我淨係今日靚啦？」Jenny瞪大雙眼質問
「我無啊…行啦book左檯就黎遲到」Ben找到了一個藉口推搪了這個問題
Ben預訂了旺角某放題餐廳，這是玥婷建議的，因為Jenny最愛吃放題。
「你又會book放題嘅？」Jenny喜出望外
「我估妳鍾意食嘛」Ben自豪地說
「好細心啊…」Jenny心想
Ben本身以為Jenny那麼苗條吃放題必定虧本，只可惜他的預測是錯的。Jenny一開始就瘋狂下單，雖說是放題可是這未免太誇張。看著滿桌子的刺身，和咀嚼著壽司的Jenny，Ben由心產生畏懼。
「第時一齊左食飯點算…」Ben心想。Ben意想不到地幻想著和Jenny拍拖。
「食嘢啦，做咩唔食啊？」Jenny問
「哦好好好」Ben連忙吃飯免得Jenny懷疑
結帳時，不論店員還是Ben都十分錯愕。Jenny和Ben一桌吃了40碟刺身還有20隻雞翼，還有更多…
「點解妳食咁多都唔肥嘅？」飲食控制很嚴格的Ben十分驚訝
「嘿嘿…因為我有跑步咯！」Jenny自豪地說
「吓…上次妳跑得咁慢」Ben回想上次在球場把Jenny抓回去
「咁係因為我無著跑鞋咋嘛」
「係啊係啊妳最勁」Ben無奈
兩人吃完飯，在旺角無所事事。
「不如去尖東睇燈飾啦」
「我想去西九棵大聖誕樹喎…」Jenny建議
「好！去啦咁，坐地鐵？」Ben轉頭問
Jenny半個身子已經踏進的士內。
「坐乜嘢地鐵啊，直接去啦！」Jenny將Ben拉進車內
優柔寡斷的Ben竟會與直率的Jenny成為朋友。
不消一會就到達西九。只見Jenny一下車就蹦蹦跳跳地走到聖誕樹下，嚷著要拍照。
「幫我影相吖，有幾靚得幾靚！」Jenny站在兩棵光芒四射的聖誕樹中間說
「人靚就點影都靚嘅，但妳就…」
「你講咩話？」Jenny以為Ben在讚她，因此走到他身前
「呢個位靚，停！」Ben一直在等待Jenny自然流露的時機
「咔嚓——」Ben拍下了他最滿意的照片
「喂啊，呢個位唔靚喎」Jenny埋怨
「妳自己睇下～」Ben自豪地遞上電話
「哇…ok喎」照片中的Jenny正燦爛地微笑看著鏡頭，背後的人群恰巧被她遮住，而燈飾化開如花海在背景裡。
接下來，Jenny收起一貫直率的性格，乖巧地聽著Ben的知識和建議，拍出了很多角度完美的照片。不知不覺拍了一個小時，倆人都累垮了，可是Jenny收穫了半年IG圖片的存貨，而Ben也成功贏得美人芳心。
一對不是情侶的男女坐在海旁的長椅上，吹著海風喝珍珠奶茶。
「啊，呢啲生活真係好chill」Jenny喝著珍珠奶茶說
「妳又鍾意飲珍珠奶茶咩？」Ben問
「鍾意啊！黑糖珍珠奶少冰微糖」Jenny搖著她手裡的珍珠奶茶說
「有時，我都好羨慕妳可以咁直率講嘢唔使轉彎抹角」Ben說
「其實有時我覺得婉轉係一種語言藝術，但我學極都唔識」Jenny喝著珍珠奶茶說
「有啲說話去到嘴邊講唔到其實好辛苦」
「你啱。」
兩人觀看著海旁的人來人往，當中不乏情侶。
「妳話玥婷同浩然宜家玩成點呢？」Ben問
「肯定好開心啦，拋低我地喎」玥婷說
「平安夜唔同男女朋友過唔通同我地過咩？」Ben說
「起碼我地4個今個聖誕無人Lonely Christmas」Jenny若有所思地說。明眼人都知，她是在暗示一些關係，一些情感。
「妳啱啊。唔係妳我可能都係喺屋企訓覺，用一句唔想睇人放閃隱藏孤獨。」Ben一本正經地說
「唔係無拖拍嘅孤獨。無論係朋友定屋企人，呢個年紀好似都無乜人係真正交心嘅。個個都係為好處或者為左維繫而維繫，話下次約出黎食飯根本就係一個藉口推搪今次嘅邀請。」
「係。好似真正交心嘅得浩然一個，不過今晚多左個樹窿，哈哈」Ben將手裡的珍珠奶茶一飲而盡
「我多謝你先喇。節日無人陪係慘嘅。不過依家你咪有人陪咯」Jenny小心翼翼地靠在Ben的肩膀上。
這是一個明目張膽的試探。
Ben先是驚嚇了一下，但他又覺得Jenny的倚靠純粹是給予節日的一點溫暖。而他又覺得剛才自己說的正經說話或許讓Jenny覺得十分無聊，現在的倚靠恰巧掩蓋了一切。
一個純粹的倚靠，在滿街閃光的平安夜裡顯得更加獨特。
不知倆人的動作維持了多久，Ben說了一句：
「不如俾我主動一次？」