地下鐵的約會: 番外：如三分球般投進你懷裡 (3)
練習後，玥婷、浩然、Ben和Jenny一行人一起去吃晚飯。
「攰死，仲要返屋企做功課」Ben說
「有幾攰？我都專登睇你練波啦」Jenny說
「又唔係同妳講…」Ben表示無奈
「宜家我都坐係度㗎」Jenny說
「我都係調返同B豬坐喇～」玥婷說罷就離開了座椅，浩然也很識趣地一把推走Ben
「喂咁我坐邊啊？」
「坐我隔離啊咁都唔明？」Jenny一把拉Ben進去卡座
兩對男女，一對恩愛，一對互相憎恨，相映成趣。
浩然和玥婷不停製造話題讓Ben和Jenny互相質問，而Jenny也不負所託，直截了當懟得Ben面紅耳赤。
「其實你地咁襯不如一齊啦」玥婷建議
「妳收皮啦」Ben和Jenny異口同聲說
「咁都可以一齊…」Ben和Jenny各自心想
當浩然問到聖誕節的節目時，Ben和Jenny再次異口同聲說自己不會打擾玥婷和浩然。
「我就自摺㗎喇，唔使擔心我」Ben首先說
「我都係，唔想睇人放閃」Jenny也附和
「咁啱啦，你地兩個一齊出去咪得咯」玥婷興奮地說
「咪搞我！」倆人再次異口同聲說
「掂啊，就咁啦」浩然拍拍Ben的肩膀說
Ben和Jenny不停地以理由推搪這個「約會」，甚至成了同一陣線。
結果吃完飯後，Ben不知不覺竟和Jenny親密了許多。
「喂走啦，你坐巴士吓話？」浩然問
「係啊，聽朝又要遲到」看著手錶時針指著九時的Ben無奈嘆氣
「支持你坐的士㗎，走先啦bye」
由於玥婷和浩然同住荃灣，因此直接坐地鐵回家。而Ben就比較慘，家住遙遠的將軍澳，無論是巴士或者地鐵都動輒需要一個小時。
一個人在陰森的車站等車，感覺不好。
和冤家一起在陰森的車站等車，感覺更不好。
「喂妳唔走嘅？」Ben問
「你夠唔走啦…」
車來了，Ben沒有理會Jenny逕自上車。
想不到的是，Jenny也跟著上車。
「阿姐，妳唔好跟蹤我啦」
Ben對於全日唯一一刻可以安靜下來都被打擾感到很無奈，他也猜不透為什麼他會惹上這個外貌可人但內裡痴女的她。
「大佬，我都住將軍澳㗎，坐巴士得罪你？」
不知為何，Ben知道Jenny都是住將軍澳後有點小激動。
本來車程已經很長，再加上一個煩人的東西在，Ben只好放棄放空的時機。
「妳住將軍澳邊度啊？」Ben問
「關你咩事啊，想溝我？」Jenny問
其實，Jenny這些對話都是從她愛看的「溝仔策略」學習的，什麼欲擒故縱、有意無意的對視。但Jenny能應用的，卻只有自己的率直和失言。
兩個孤獨的人，坐在同一排雙人座上，有各自的心思。
Ben在想，他該如何開口邀約Jenny聖誕節結伴出外。
Jenny在想，她該如何說出自己對聖誕的期待。
「喂，妳聖誕有咩做啊？」Ben問
「無啊，溫書咯」Jenny隨意回覆
「咁慘啊…一日都唔玩？」Ben試探
「都唔係唔玩嘅，但玥婷有仔就唔會理我啦」Jenny裝作失落地用手指不斷翹著自己的髮絲
「都係嘅…」Ben想說出那句話，卻在說之前咽了回去
晚上的街頭竟下起雨來。除了匆匆回家的行人，就只有那被打在玻璃的雨水化開的燈紅酒綠。
「又會突然落雨嘅…」Jenny摸摸自己的書包，大意的自己竟沒有留意天氣。
「今日天氣好似本身都麻麻地喎」Ben沒有察覺到Jenny的徬徨，間接地恥笑Jenny
「咁…你個仆街」Jenny氣得說不出話
Ben心想：「咁都要嬲，港女到…」
隨著巴士駛離燈紅酒綠，他們已經快到將軍澳了。
「妳係唔係無遮啊？俾妳喇」Ben遞給Jenny他唯一的傘
「懶有型啦你。你唔使咩？」Jenny一語道破
「我…我淋雨唔緊要！」Ben只好辯駁
「算啦你，一陣傷風打唔到籃球啊。我到喇，你唔使理我」說罷，Jenny就走到下車門
Ben緊緊跟隨其後，不是因為他變態，而是他始終不放心一個女生在深夜淋雨，畢竟校服濕透是頗引人犯罪的…
「喂，我遮妳啦。」Ben一把將Janny拉進傘中。
兩個人共在傘下，熱烘烘的曖昧感覺油然而生。Ben屏息著，生怕Jenny知道自己的緊張。Jenny緊緊地拉著Ben的衣角，害羞得不發一言。
「我住二期啊，拜拜」Jenny小碎步地跑走，顧不得地下的濕滑。
結果，一不留神滑倒。Ben放下手上的雨傘立即扶起Jenny。
「啊屌…好痛啊」Jenny摸著自己的背部說
「叫左妳㗎啦！跑乜鬼吖，我又唔係唔遮妳」Ben絲毫沒有憐憫之心
「咁…邊個叫你成個直男咁喎！又唔識照顧人，我一早話無遮就應該俾我吖嘛。唔…唔好以為自己靚仔大晒喎！」Jenny雖然受傷，卻一直咄咄逼人
Ben面對這個瘋子般的女生只得無奈地笑。一個樣貌足以迷倒眾生的少女內裡竟是如此的任性…
「得喇，使唔使我孭住妳上去啊？」Ben也想不到自己會說出這樣的話
「孭吖，睇吓你驚啲定我驚啲」
其實Jenny只是輕輕地摔了一跤，但玥婷教落要更浮誇才可獲得冷酷的Ben的注意。想不到那膠到仆街的演技竟讓Ben動了憐憫之心。
「幾多樓啊？」Ben冷酷地說
「你認真㗎？」「妳覺得呢？」
「35樓…」Jenny只好妥協
坐電梯時，只有Ben和Jenny獨處。
「喂…既然我地聖誕都無野做，不如一齊出去啦」Ben擰頭問Jenny
這句話說自Ben真的匪夷所思，但Ben對於Jenny的主動、率性，十分感興趣，也漸漸對她產生好感。
「你話，我地聖誕一齊出去？」Jenny不敢相信她所聽到的。踏破鐵鞋無覓處，得來全不費功夫，竟然被男生主動邀請了。
「係啊，妳唔去就算啦」
「去去去！」Jenny隨即從Ben的背跳了下來
「妳唔係整親咩？」Ben驚訝地問
「呃你又要同你講咩？」Jenny朝Ben做了個鬼臉後，蹦蹦跳跳進了屋。
Ben待Jenny進屋後，終於禁不住自己的興奮不停地大叫「yess yess yess」。他終於成功約到異性出去了。
另一邊門後的Jenny、也正慶祝這凱旋而歸。
「等班bitch成日笑我無拖拍，宜家有啦」Jenny興奮地說
想不到這場雨，為倆人的紅線牽前了一大步。