當問題少年遇上問題少女: 23.扭傷腳嘅拍檔

「妳冇事嘛?」我坐係佢身邊問
 
當佢見到我之後，就好勉強自己咁起身「冇…冇事」
 
但佢個樣已經講我知佢好痛呢
 
「妳咪死頂啦，我扶妳返屋企啦」
 
「去…去我屋企?唔好啦…其實唔太….」Jessie整力阻止我送佢返屋企
 




「我知道妳自己住天台屋，唔緊要」
 
然後佢以一個不可相信嘅眼神望我
 
「係Polly講嘅，我仲知妳有個自制嘅羽毛球場。行啦，我扶妳啦」
 
未等佢開口，我已經扶起佢，一步一步咁行
 
「其實…你唔洗扶我，我休息一陣就得」
 




「有咩所謂，妳係我拍檔，我要照顧妳。就算唔係球場，男仔照顧女仔係份內事」
 
「唔…唔該你」
 
我扶住Jessie一步一步咁行去佢住果座唐樓，我地望住樓梯，然後對望
 
「送…送到呢到得啦」
 
「妳隻腳仲痛緊，我陪妳上去啦」
 




「但係…」
 
「行啦!」
 
不過點扶呢?如果公主抱嘅話，佢就會變AOC入邊嘅衝撞車咁，所以我用左另一個方法，
我孭佢上去。不過都唔野少架，都成五層樓架
 
我孭住Jessie慢慢行上樓，去到五樓果時再上一層
 
“依”一聲推開左天台嘅鐵門，然後再行出去天台。經過其他人晾嘅衫，一個用膠紙痴成嘅球場出現係我眼前
 
「妳…就係呢到練波?」
 
「嗯…我每日溫完書會出黎練波，我屋企係前面」
 




我跟住Jessie指嘅方向行過去佢屋企，經過佢晾嘅校服，係門口放低佢果時，佢表情仲好痛
 
我係Jessie手上接過鎖匙，打開佢道閘同大門，走入佢嘅天台屋
 
Jessie屋企非常簡陋，一個小小嘅廚房仔，一個小洗手間，然後有張摺檯同書檯，之後就係張碌架床
 
Jessie平日係瞓下格，而上格就用黎放雜物
 
「Sorry呀…有冇嚇親你呀?」
 
「唔會，我以前有屋企人都係住深水埗天台屋」
 
「嗯…」
 
我將佢放低係床上，幫佢除鞋襪。係佢白白皮膚上，腳上有個位腫左少少




 
「妳有冇冰?」
 
「冰呀?好似冇」
 
我打開佢冰箱睇一睇，真係乜都冇。所以我去羽毛球袋到拎出急救包，入邊有幾個冰種
 
“啪!”我拍開個冰種再敷落Jessie隻腳到
 
「妳敷下先啦」
 
「唔該你」
 
然後我地聽到Jessie個肚傳出「咕……..」
 




佢好尷尬咁摸住自己個肚
 
「妳未食野?」
 
「剛先同人補完習….」
 
我望見袋中仲有野食，就拎出黎遞俾Jessie
 
佢望見之後呆左
 
「你….係邊到買?」
 
「我媽咪自己整，夏天我地會食呢d小食」
 
「呢個….係蘇子葉餑餑」