當問題少年遇上問題少女: 17.佢係天才定係努力家?

Polly吸左啖氣再講
 
「當我一上到天台，我見到Jessie自己用膠紙痴左個羽毛球場出黎先知，佢叻過我嘅原因，係比平常人更加多練習…果時我先知自己有幾醜…就算升左中學，Jessie都係冇同我講野咁滯…當佢俾教練揀入羽毛球隊果時我好開心，我以為可以同佢再拍多一次…不過佢仍然係未原諒我…所以…」
 
「所以佢就索性唔打學界，但係潘教練又好想用到佢，所以留佢係球隊」
 
「嗯…初時我仲諗，我應該可以代替到佢….但係…」
 
「今次混雙組合，係妳提出要Jessie歸隊?」
 




「嗯….我好想幫佢贏返一次…呢個係我對佢最大補償」
 
「咁好簡單，我地不斷SM文浩就得」
 
Polly檸一檸頭「你知道原因，我一定要借你力量先得」
 
原來兜咁大個圈，都係想我出賽
 
「不如我問你一個問題丫」
 




「咩呢?」
 
「你鍾唔鍾意我?」
 
突然間俾Polly咁問一問，真係唔知點答，正常男仔都一定問鍾意
 
「唔…妳係一個好女仔」我只可以咁樣答佢
 
「咁…..」Polly拖起我隻手
 




「我做你女朋友….你幫我出賽?好唔好?」
 
「傻妹，妳醉啦，返屋企先啦」
 
「你答我先啦」
 
睇黎Polly真係醉醉地，我要諗方法解釋佢知先
 
「Polly，妳真係好靚，而且又好好人，不過妳唔可以因為咁而同人拍拖架嘛」
 
「但係….得你幫到我咋!!你地唔係好鍾意搵我地學校女仔做女朋友咩?」
 
「係…我係好鍾意妳地旗袍校服女仔，但係妳都唔可以咁架嘛」
 
「咁你點先肯幫我呀….咁…我同你….咩左囉」




 
「Polly妳真係醉啦，總之我應承妳一定會幫妳，好唔好?」
 
「咁你….有咩要求?係咪要著校服同你…」
 
「唔洗，總之過幾次練波後我會同妳解釋，我送妳返去先啦」
 
去到Polly樓下，望下佢住嘅屋苑
 
嘩…….佢仲同我講屋企係呢到有兩個單位
 
「我到啦….唔該哂你…」
 
「妳快d返去休息啦」
 




佢轉身行左幾步之後，走返黎我面前
 
「做咩事呀?」
 
佢gut高腳錫左我個咀一下，當時我個腦空白一片
 
「多謝你….你真係一個好男仔….唔會乘人之危…」
 
Polly講完後好快返左入大堂
 
反而，我俾佢搞到個腦諗唔到野。死啦，無啦啦答應左幫佢….點好?
 
到左練波果日，Polly又變返平日係球場好嚴肅個樣
 
Chloe同文浩兩個就係我身邊不停咁問




 
「點呀?果晚有冇下文呀?」
 
睇黎佢地兩個真係好八掛
 
「冇呀，冇你地想像果D野」
 
「咁即係有其他野啦」
 
「唔…都有嘅，不過唔係你地所諗嘅男女之情」
 
「咁係咩呀?」
 
我慢慢講返D野俾佢地知，當然冇講Polly細個點樣帶頭欺凌Jessie，同埋係Polly樓下發生嘅事，俾佢地知道，仲得了嘅?
 




文浩拍一拍我膊頭「你自己洗濕左個頭啦，打算點?我可以讓個位俾你喎」
 
「點解我會應承佢呢….」
 
「你對女人嘅眼淚係冇抵抗力」
 
係我仲係到諗緊點算嘅時候， Polly走到我面前，一面少女般嘅微笑對住我
 
佢唔理在場有咁多隊員係到，向我撒嬌
 
「喂…你考慮成點呀?」
 
長痛不如短痛，都係狠狠地拒絕佢啦，可惜道高一尺，(女色)魔高一丈，正想我想拒絕佢果時，Polly眼窩中又有眼淚
 
死啦，係女校整喊女仔係死罪黎架
 
「Polly，妳…唔好喊住先好唔好?」
 
Polly開始喊出黎「果晚…果晚你又話會幫我嘅…原來你呃我!!!」
 
佢嘅喊聲開始引黎其他隊員望過黎，包括Jessie
 
點算好…佢喊聲愈來愈大…於是…
 
「好啦好啦，我應承妳啦我落場打混雙啦，妳唔好喊啦」
 
Polly望住我「真嘅?」
 
「係呀，真架，我唔會呃女仔架」
 
佢之後走返去堆女仔到
 
「黎啦黎啦收錢收錢，買得大贏得大呀老細」