當問題少年遇上問題少女: 15.問題少女的背境

「我都唔知呀，不過唔…食果d馬仔呢…我地咪咩馬仔嘅?」
 
「黃色一舊舊果d咪馬仔囉」
 
「Jessie叫佢做薩奇馬」
 
「薩奇馬?」
 
「咁Jessie有冇講佢鄉下邊到呀?」
 




「佢好似…講過俾我知….佢係…大連…係!!佢鄉下係大連果邊」
 
「嘩….咁北呀?」
 
「咁Jessie佢可能唔係漢族人」
 
佢地三個望實我「你點知架?我由佢小學識到而家都唔知佢係咩人」
 
我解釋俾佢地聽「佢姓『佟』係唔係?」
 




「係呀，好少人用呢個姓」
 
「仲有薩奇馬，係外族語。Jessie佢可能係一個滿洲人」
 
「滿洲人?」
 
「即係滿清果d呀，佢係女真人，清朝係佢地女真人嘅朝代」
 
「佢…佢係滿族?」
 




我點一點頭「既然佢鄉下係大連，佢識講外族語，又姓佟，佢好大機會係一個滿洲人」
 
「但係佟姓…唔係漢族姓咩?」Chloe R哂頭咁問我
 
「Jessie好大機會係滿洲姓，當年民國成立，滿族剪辮改漢姓，滿族八大姓之一嘅佟佳氏同赫舍里氏，就改左姓佟，佢地紛紛走出關外生活，大部分係遼寧、吉林同黑龍江生活」
 
Chloe望一望文浩「喂，你仲同唔同佢拍呀?佢祖先害死你祖先喎」
 
「唔?文浩你係姓朱架咩?」
 
「呀…唔係，我係袁崇煥後人」
 
「咁我地又唔知Jessie係唔係滿洲人，係又點?叫佢賠咩?」
 
我都開始對Jessie背景有d興趣




 
「Polly妳話Jessie自己一個住，佢咪成日要兼職囉?」
 
Polly啜一口果汁「以我所知，佢要幫人補習去賺生活費，始終教會唔可以俾太多生活費佢，而且佢仲係租d舊樓住」
 
「但係點解佢唔打學界?」
 
「佢係鍾意打羽毛球，但係佢應該有心理陰影，所以唔再比賽」
 
「不過今次佢又咁順攤出賽嘅?」
 
「可能教練開左個好條件俾佢啦」
 
「如果…Polly妳同Jessie打女雙會點呢?」
 




Polly個樣好有信心「一定會比Michelle同Jeanie更厲害」
 
我諗一諗「可能…呢個係教練部署Jessie復出其中一步」
 
「丫…你幾瞭解教練喎」
 
「如果係我，我會咁做」
 
Polly放低果汁「冇錯，教練就係想咁做」
 
文浩睇一睇錶「Polly妳會同我地一齊食晚飯定點?」
 
「我都話留左成日俾你地囉，食咩你地話事丫」
 
Chloe舉手「大喜屋!」




 
「冇錯!!!!」Polly超級興奮
 
好快Chloe就book左位，距離食飯仲有幾個鐘，所以我地四個係玩具反斗城行
 
Polly同平時嘅佢好唔同，佢將最純真嘅一面展現出黎
 
正當我地係冒險樂園玩緊果陣，Chloe乘機用手肘撞一撞我
 
「喂，其實Polly而家好似冇男朋友架喎，你唔考慮下?」
 
點解一定要我同佢地學校女仔拍拖呢?
 
「妳咪多事啦」
 




「唔係喎，我頭先見你兩個好好傾」
 
「啱傾者」
 
「莫非…你鍾意Jessie?」
 
「妳咪傻啦，我點會鍾意一個未同佢講過野嘅女仔?」
 
「你死啦，同時睇中左我地羽毛球隊兩大美人」
 
就係我諗緊點樣反擊果時，Polly佢玩完遊戲返到我地身邊