當問題少年遇上問題少女: 6.問題/天才少女的出現

第二日放學，文浩死都要捉住我
 
「你搞咩呀?我唔玩菊花架喎」
 
「總之…係陪下我好唔好?」
 
「放學都要人陪?」
 
「行啦，一陣你就明架啦」
 




我同佢慢慢行，去到真義里果時，佢停低左
 
「你搞咩?係真光附近停低?」
 
「呀….一陣講你知」
 
「難道你想伏擊你個拍擋?」
 
「唔係呢…」
 




好快，所有謎都解開哂啦，係我地企係到之時，同時亦係真光放學時間
 
係我地身邊出現左一把女仔聲
 
「喂，等左好耐?」果把聲好熟，而且好開心咁
 
我一轉身，係阿靜自己一個係學校行出黎
 
「乜咁啱呀，文浩黎伏擊佢拍擋喎」
 




不過文浩面色有d難睇
 
「Jessie?佢已經走左啦」
 
「咁快?咁你係到等邊個呀?」
 
「我….我等…靜靜架」
 
佢等阿靜?搞乜?佢地幾時咁熟?尋日先識咋喎
 
「你地…搞乜?」
 
「阿傑呀…呢到學校…行遠d先講啦」
 
「哦…哦…」我俾唔到反應佢地




 
不過我地幾個走果時，有不下3個應該係阿靜嘅同學笑住咁望住佢
 
我望一望佢地兩個，行得好埋
 
噢~~我終於明啦，春天來了啦
 
「兩位，我嘅任務已經完成，告辭」
 
文浩聽到之後，非常緊張
 
「喂….未得呀」
 
下?未得?
 




「我唔做電燈膽啦，你地兩個去甜下啦」
 
阿靜面紅紅咁對我講
 
「Jessie話，佢考慮出賽」
 
「咁妳同文浩講咪得囉，我唔洗知架，我負責同佢練波」
 
「咁你真係唔出賽呀!?」阿靜好直接咁問我
 
我用一個怪怨眼神望一望文浩
 
「你講左幾多野出黎呀?」
 
「全部」




 
呢個真係一個老婆奴黎…
 
就係咁樣，文浩係24小時之內就俾阿靜攻陷左，而我就開始電燈膽生涯
 
到左大考後，我同文浩兩個人走入真光，開始同佢地一班真光妹練習。
 
係球場上，我不停開波俾文浩接。雖然佢係B隊成員，但係實力上都有返咁上下
 
Miss Poon見到我開波技巧唔錯，於是我就俾教練委任左去專門開波俾其他球員接
 
呢一班女仔打羽毛球實力唔差，可惜基本功弱左少少，未能夠將個波打去眼望嘅目標
 
「打準D!係!準D…唔好殺波住」教練不停向一班隊員落指示，現場一班隊員都嘻嘻哈哈咁講笑，訓練時比較輕鬆，然後，大家突然間向門口望過去
 




係門口，有一個扎起髮髻，個樣有少許高冷嘅女仔企左係到。佢著住普通體育校服同埋白飯魚。佢慢慢行到教練身邊，打左聲招呼，然後就去拎起一塊公家球拍，行去隊尾排隊
 
阿靜走黎我身邊同我講「佢就係Jessie啦」
 
我一球一球咁發出去，終於到Jessie接我嘅發球。既然佢可以打低咁多對手，即係實力上有返咁上下，所以我都打算試一試佢實力有幾多

我開出一個高遠球，係好普通嘅一球
 
Jessie望一望個波，輕輕退後幾步，然後將個波猜返俾我
 
佢呢一下猜波，個波嘅落點非常靚，係界邊落地。就憑佢呢一下，就顯出佢實力同其他隊員唔同
 
猜完波之後，佢又排返去隊尾。佢回左10球左右俾我，每一球落點都係同一位置，絲毫不差