當問題少年遇上問題少女: 5.一對歡喜冤家的誕生

「喂，小妹妹」
 
「都話左我唔係小妹妹囉，我有名架」
 
「我地夠知妳叫Chloe囉，不過妳咁矮，學咩人叫Chloe呢?」文浩不停係到串Chloe
 
「咁你可以叫我中文名架嘛!」
 
「咁妳叫咩名丫」
 




「做咩呀?想追我呀?」
 
「痴線」
 
「我叫余嘉靜，叫我阿靜就算啦」
 
「妳一d都唔靜」
 
阿靜係檯底踢左文浩一腳「係咪仲串呀!」
 




「咁阿靜，文浩個拍擋係點架?」
 
「佢呀….佢俾教練稱為天才少女，我地呢個隊員打羽毛球嘅天份真係好好，只不過…」
 
「不過咩?」我開始對呢位天才有d興趣
 
「佢性格好怪，完全唔鍾意同人傾計，不論食飯，小息佢都係自己一個人，放學會以極速離開學校」
 
「佢唔會練波架咩?身為校隊，佢都要練波架」世上竟然會有呢種人?
 




阿靜擰一擰頭「佢好少黎練習，而且佢連球拍都唔會準備，佢用學校提供嘅公家拍」
 
我第一次聽到羽毛球隊嘅隊員係冇自己嘅球拍而要用學校嘅公家拍
 
就連文浩都覺得佢拍檔好奇怪「咁佢打學界果時呢?」
 
點知阿靜俾我地嘅答案仲令我地覺得奇怪
 
「佢從未打過學界比賽架」
 
一個未打過學界比賽嘅球員?俾教練稱為天才少女?
 
「但係…妳地教練點會叫佢做…」
 
阿靜碌大隻眼望住我地「講你地知，你地都唔會信，我都係要親眼見到先可以相信。佢可以用一塊公家拍，著一對白飯魚，將我地學校個學界女單冠軍打到體無完膚，唔止係女單…連女雙兩個隊員分別同佢打，都輸左。佢…將我地四間真光嘅羽毛球隊都打低哂」




 
「但係咁犀利嘅球員…竟然唔出賽?」
 
「嗯，呢個係我地真光女書院，應該係四間真光最大嘅謎團」
 
「咁靜靜呀，妳有冇佢張相呀?」
 
阿靜聽到文浩咁樣叫佢，立即紅都面哂咁樣「你…你咁叫我架…」
 
「個名幾襯妳呀」
 
阿靜面紅紅咁咬左下唇，然後拎出電話再搵左好耐
 
佢呢個隊友真係神秘，連佢FB都係用粉紅色玫瑰花做profile picture，而且佢FB都只係同阿靜係球隊上嘅對話
 




「拿，佢D相呢，就永遠都係著校服，我好難先搵到俾你地睇」
 
阿靜將羽毛球隊照俾我地睇，果張仲要係年度羽毛球隊好正經嘅相
 
呢個女仔，真係好正經下。佢扎住真光招牌孖辮加埋套旗袍校服
 
其實佢好似周可茵
 
「佢叫咩名呀?」我邊睇張相邊問
 
阿靜飲一啖佢嘅紅豆冰「佢叫佟梓晴，Jessie Tung。佢仲係我地學校嘅高材生」
 
我地三個踏出冰室，係禮貌上都要問下阿靜住邊。不過佢真係老實不客氣
 
佢將個書包扔俾交浩，然後用一個命令口吻對佢講




 
「你!送我返屋企!!」
 
「我?點解呀!」
 
「俾哂你拍擋資料你喎!!送下我返屋企都應該呀?我一個女仔返屋企好危險架!」
 
老實講，我真係睇唔到妳有邊忽會有危險
 
「咁阿靜妳住邊呀?」我都係好有禮貌咁問佢
 
「我住黃埔」真係啱呀，文浩又係住黃埔
 
 「咁你就送阿靜返屋企啦」
 




「唉…行啦，搭地鐵啦」
 
「我要搭巴士!!」阿靜嘟長個咀抗議
 
「你陪佢啦」
 
於是文浩就俾阿靜拉左去搭巴士，而我，就自己慢慢行返屋企
 
估唔到，係我地隔離嘅女校會有d咁嘅學生係到