［純愛短篇番外］以朋友之名嘅愛情，我地各自嘅單相思: 14. 從未看到別人

梁玥嘉同楊楠恩忽然間靜咗，一言不發地望向李穎容

「佢同事Eva⋯」李穎容緩緩地開口講道，「我前兩日問張子萊呢個女仔係唔係佢嗰type，佢話唔知⋯」

梁玥嘉同楊楠恩兩人唔知講咩好，好似講咩都會踩到地雷一樣，所以只好靜咗落嚟

「佢好靚呀可⋯？聽張子萊講，係個工作能力強而且高學歷嘅人嚟，宜家好少女仔又靚又做得嘢呀可⋯？」李穎容微微耷低頭，「笑起嚟又好睇，知性又溫柔⋯」

李穎容嘅表情，梁玥嘉都睇喺眼內，梁玥嘉察覺到李穎容忽然間冇晒自信一樣





「你好過佢呀～再靚又點？佢可以令張子萊好似對你咁對佢咩？」楊楠恩先開口，「咁多年嚟喺張子萊身邊嘅係你！世上邊有咁多純友誼？你面前有咁大個板喺度都睇唔到？」

楊楠恩指住梁玥嘉，梁玥嘉無奈地點頭

「呢啲嘢，旁觀者清啦～張子萊由以前開始就對你特別唔同。」楊楠恩一臉認真地講道，「張子萊從來都冇認佢中意你係真，但佢都冇否認佢中意你喎～佢有邊次係真係講到明佢唔中意你？」

李穎容仔細地諗，好似又真係冇聽張子萊講過佢唔中意自己，但佢都冇認過呀～就係咁樣先麻煩⋯！

⋯





張子萊同Eva、Gordon佢地都食完飯，打算留屋企，李穎容比佢早一步離開餐廳；佢地三人都打算搭地鐵番屋企，但Gordon搭紅色線，同張子萊、Eva唔同路

Eva同張子萊一齊企喺一旁，但張子萊卻好似刻意同佢保持距離一樣；Eva心裏明白，都冇特地開口講啲咩

「表白⋯要準備啲咩呢⋯？」張子萊喺心裏喃喃自語道，「要花？定係要準備啲咩⋯？」

Eva微微耷低頭，見過張子萊對李穎容嘅方式之後，Eva就完完全全咁睇清楚張子萊原來都有另一面，平日對女仔都溫柔嘅佢，都會有特別溫柔、格外親近嘅時候

「Cyrus⋯」Eva柔聲地叫咗張子萊一聲，張子萊望向Eva，「嗰日同你一齊嘅女仔，就係你中意嘅人係唔係⋯？我知我咁問有啲突然，但我只係好奇想知道，佢係唔係就係你中意嘅人⋯？」





「係。」張子萊毫不猶疑地回答道

「如果早啲識你嘅人係我，咁你中意嘅人會唔會係我⋯？」Eva定睛地望住張子萊問道

「唔會。」張子萊微微一笑後搖搖頭

「嗯⋯」Eva點點頭，朝張子萊微微一笑講道，「我就係中意你呢份認真同狠心⋯」

張子萊落車後上一層，行到去出閘機前，眼睛嘅餘光見到李穎容企咗喺出閘機旁邊，張子萊拍卡出閘後行到李穎容身旁

「你企喺度做咩呢？」張子萊行到李穎容面前，嘴角不禁上揚，「仲唔番屋企？」

「因為突然間有啲想食宵夜糖水，但又唔想自己一個人去食，所以想喺度等下，睇下有冇邊個可以同我一齊去食。」李穎容嘅嘴角微微上揚

「你咁樣講起，搞到我都有啲想食糖水。」張子萊伸手捉住斜孭袋嘅帶，「你想食咩呀？」





兩人一齊行去附近嘅糖水鋪，張子萊對於李穎容喺度有意無意咁等埋佢有啲意外，但心裏係開心嘅

李穎容有諗過張子萊會唔會送埋Eva番屋企，但佢嘅直覺話佢知喺度等佢冇錯，所以李穎容都係揀咗相信直覺等佢

張子萊偷偷地望咗李穎容一眼，同李穎容一齊嘅時間格外珍貴，就算兩人成日都可以見面，張子萊仍然會想見佢多啲

張子萊望住坐喺自己對面嘅李穎容，李穎容輕輕一撥秀髮，縱使已經唔會再好似以前一樣心動得緊要，但喺張子萊嘅心底知道，佢係好中意李穎容

人同事可能會改變，但張子萊對李穎容嘅感情從未改變，亦從未間斷；身邊出現再多嘅女仔都好，喺張子萊嘅眼中只有李穎容一人⋯

兩人食完糖水之後沿路行番屋企，行到去李穎容屋企附近嘅時候，又見到嗰個中年大叔

李穎容比張子萊先發現嗰個大叔，自然地提手挽住張子萊嘅手臂





「嗰個大叔喺前面。」李穎容自然地望住前方，細聲地對張子萊講道

張子萊抽手，李穎容抬頭望向張子萊，張子萊伸手拖住李穎容嘅手

李穎容嘅心臟頓時緊縮咗一下，今次係第一次比張子萊拖住，以前張子萊最多都只會捉住佢嘅手腕，但從未試過咁樣拖佢

張子萊同李穎容一齊番到去屋企，嗰個大叔喺外面走廊徘徊着，李穎容拉住張子萊行入屋，然後直閂鐵閘鎖上大門

「個大叔仲喺出面⋯！」李穎容一閂上門便講道，「 點算呀？你要點走？」

「我有得走咩？佢喺出面⋯我宜家咁走，佢咪知你一個人住。」張子萊無奈地講道，「你打個電話比樓下管理處，叫佢地留意。」

「好呀⋯」李穎容行到梳化坐低，「咁你點算⋯喺度瞓⋯？」








IG Link: https://www.instagram.com/nd_cotttoncandy/?hl=zh-tw