［純愛短篇番外］以朋友之名嘅愛情，我地各自嘅單相思: 13. 失去他的感覺

喺唇要掂到張子萊嘅臉頰時，李穎容停咗落嚟，冇錫落去

「中意你係真，怕失去你都係真⋯」李穎容伏低喺梳化邊位，「希望你一直單身⋯」

李穎容細聲地講出一句無比自私嘅說話，只要張子萊一直單身，咁就可以一直喺李穎容嘅身邊⋯只要佢一直單身，咁自己就可以保持住同佢嘅關係⋯

「我咁自私，對唔住⋯」

⋯





「我都話佢唔會嚟㩒鐘，再㩒就報警拉佢啦⋯」張子萊喺廁所梳洗完行去梳化坐低再發一下呆

「張子萊⋯！」李穎容叫咗張子萊一聲，但又冇再講落去，只敢喺心中講：「如果到30歲我地都仲喺單身嘅話，我地結婚好唔好⋯」

「做咩⋯？」張子萊喺廁所行出嚟問道

「冇，冇咩，唔記得咗要講咩～」李穎容笑咗一笑問道，「食嘢啦～我煮咗早餐～」

「你以前都唔識煮嘢食。」張子萊拎起叉





「自己一個出嚟住，都要學下呢啲嘅～唔通日日都食外賣咩～」李穎容笑咗一笑講道

張子萊笑咗一笑，抬頭望向李穎容之際，發現李穎容早就望住佢

兩人嘅視線對上，好似因為彼此了解所以唔洗講啲咩都會心有靈犀一樣

放喺手邊嘅手機震動，將兩人都帶咗番嚟現實，張子萊望一望手機螢幕，然後接聽電話

張子萊同打電話嚟嘅人講咗兩句之後就收咗線，李穎容輕輕抿唇，然後抬眼望向張子萊





「邊個呀？」李穎容好奇地問

「Eva，打過嚟問工作上嘅嘢。」張子萊將手機放喺一旁

「咁勤力嘅？今日係假期喎～」李穎容講道

「佢本來就係勤力嗰類人。」張子萊講道，「好做得嘢。」

「人又靚，又做得嘢，真係好～」李穎容笑了笑，都唔知道係自嘲定點，「你話呢？」

「你都唔錯呀～」張子萊笑笑口講道，「Eva學歷高、能力強，人又靚又善良。」

「點解聽起嚟好似踩緊我咁嘅⋯」李穎容無奈地講道，心裏有啲擔心

一個咁靚嘅女仔、咁優秀嘅女仔，每日番工都喺張子萊嘅身邊⋯張子萊會唔會心動？會唔會因為嗰個女仔嘅工作能力、外表而動心？





「啱唔啱你口味？」李穎容忽然間開玩笑般問張子萊

「唔知呢～」張子萊輕輕一笑後回答

明明已經拒絕咗Eva表白嘅張子萊，呢一刻卻回答李穎容一句唔知道

李穎容先係一愕然，然後又默默地笑了笑，一言不發地笑了笑；李穎容聽到張子萊咁講時心都慌張咗一下，咩叫唔知？

「佢地日對夜對，會唔會有感情㗎⋯！」李穎容喺心裏擔心道，「呀⋯點算呀⋯」

張子萊耷低頭食嘢嘅同時，偷偷地笑咗一笑

⋯





「李穎容！你仲唔表白要等幾時呀？」梁玥嘉緊張地問道

今日放工之後，李穎容約咗梁玥嘉同楊楠恩出嚟食飯，作為好姊妹，當然要了解下進度

「你睇下楠恩呀！楠恩都拍拖啦！你睇下你！」梁玥嘉輕皺起眉頭，將李穎容「教訓」一頓，「仲唔同張子萊表白！要做朋友做到幾時呀？」

「30歲之前會表白掛⋯」李穎容都唔太肯，遲疑地講道

「30歲之前！？」楊楠恩一臉驚訝，「你都中意咗佢幾多年啦？仲要等多幾年！？」

「到底你有咩講唔出口呀？你唔係等緊佢開口呀嘛⋯？」梁玥嘉無奈地問道

「佢又冇話佢中意我⋯」李穎容自己都有啲無奈，「而且，萬一真係表咗白但佢原來只係當我係朋友嘅話，咁我地到時就會連朋友都冇得做⋯」

「穎容你諗下，佢對你真係隨傳隨到，佢對你真係好唔同呢～」楊楠恩忍唔住開口講道，「你諗下前幾晚，你一句話驚，佢真係飛過嚟搵你咁濟，佢對你係冇好感嘅話，佢點會咁做？」





「我真係唔知，我淨係知道，無論點都好，只要最後留喺佢身邊嘅人係我就足夠⋯」李穎容微微耷低頭，心裏嗰種自私嘅感覺又浮現出嚟

對張子萊嘅感覺，李穎容實在太過清楚，佢完全唔敢想像失去張子萊嘅感覺，諗都唔敢諗，失去張子萊，嗰種心痛難耐一定非常人可忍受

餐廳嘅門打開，梁玥嘉最快留意到門口入嚟嘅客人

「喂⋯」梁玥嘉用手肘撞一撞楊楠恩，然輕輕踢咗李穎容一下

兩人望向餐廳嘅門口，見到係張子萊，但佢同Eva一齊，另外仲加多個男同事Gordon

「咦～你地喺度嘅？」張子萊都見到佢地，行去李穎容佢地張枱隔離打招呼

「約咗嚟食飯嘛～」梁玥嘉講道





Eva望到李穎容，同李穎容微微點點頭；李穎容都微微一笑，張子萊同李穎容對上視線，然後笑咗一笑後，張子萊同Eva行到去後面啲嘅枱坐低




IG Link: https://www.instagram.com/nd_cotttoncandy/?hl=zh-tw