［純愛短篇番外］以朋友之名嘅愛情，我地各自嘅單相思: 09. 他的例外

張子萊感覺到李穎容整個人都微微顫抖着，佢知道李穎容真係好驚，但聽到李穎容驚到喊起嚟嘅張子萊，啱啱真係擔心又焦急

張子萊嘅心裏好擔心李穎容會有咩事，工作同李穎容比起嚟，李穎容當然比較重要，李穎容係人，工作係死物

「你有咩要同我講知唔知？」張子萊再次講道

「嗯⋯」李穎容點點頭，然後鬆開手抹抹眼淚，「你留多陣再走得唔得呀⋯？我驚⋯」

「嗯，我陪你一陣就走。」張子萊點點頭





張子萊喺李穎容屋企留到12點幾然後先走

「你聽日可唔可以都嚟⋯？」李穎容捉住張子萊嘅手腕，「我怕佢聽日又嚟㩒鐘⋯但⋯如果你忙就算啦⋯」

張子萊望住李穎容呢份偶爾嘅柔弱，又點會捨得拒絕佢？

「得啦，我聽日收工就過嚟啦～」張子萊對李穎容講道，「我番去啦，你鎖好門啦。」

「嗯⋯」李穎容點點頭





李穎容喺見到張子萊之後，心裏頓時鬆咗一口氣，感覺只要張子萊喺身邊，佢就會覺得安心

⋯

翌日

「你收幾點？」李穎容send咗個message問張子萊

張子萊：今日準時收工





張子萊：你仲喺公司？

張子萊今日唔留喺公司開OT，諗到琴日李穎容真係好驚，所以今日都係準時收工陪佢番屋企

「我放咗工啦，我行過嚟等埋你」

張子萊執好枱面上嘅嘢，然後打卡放工

兩人番工嘅地方距離唔遠，都係兩、三個街口嘅距離，所以李穎容行過嚟都唔會真係花好長嘅時間

李穎容行到嚟嘅時候，張子萊啱啱好落到嚟地下，兩人一齊搭車番屋企

「買飯番去食？」張子萊問道，「我好肚餓！」

「食咩呀？」李穎容問道





兩人喺巴士站等車，同樣地搭同一架車番屋企嘅Eva都喺呢度等緊車

比張子萊早離開公司嘅Eva回頭望嘅時候，見到張子萊同一個女仔一齊，Eva只係企喺張子萊嘅前面

「你都收工啦？」Eva主動地搭話

「哦係呀～」張子萊笑一笑

李穎容同Eva對望咗一眼，然後同步地望向張子萊

「我同事Eva。」張子萊先對李穎容講道，再望向Eva，「我朋友李穎容。」

「嗨⋯」「嗨～」





兩個女仔對望打咗聲招呼，Eva望住李穎容，心裏默默地猜想佢係唔係張子萊中意嘅嗰個女仔

「你都係喺呢頭番工呀？」Eva先友善地示好

「哦係呀～都係呢邊。」李穎容點點頭

李穎容喺原地踏咗兩步，然後打咗兩個噴嚏，張子萊望住李穎容，李穎容感覺到張子萊望住佢，然後抬頭望向張子萊

「你冇帶外套？」張子萊問道

「冇呀，好明顯啦係咪？」李穎容無奈地講道，「今日出門口見有太陽嘛～」

「你出口唔睇天氣報告㗎咩？今日天氣涼呀小姐。」張子萊輕皺起眉頭，「你要唔要外套？」

張子萊將搭喺手上拎住嘅外套遞比李穎容





「唔洗，我okay。」李穎容搖搖頭

Eva望咗張子萊一眼，女人嘅直覺話佢知，眼前呢個女仔，就係張子萊中意嘅人

「所以食咩？」張子萊問李穎容

「我唔知屋企仲有冇餸。」李穎容講道，「食外賣？」

「都得都得，想食咩先得㗎？」張子萊又問道

Eva望住兩人，眼前嘅兩人之間，好似⋯已經冇插足嘅餘地⋯

巴士緩緩駛到停低，張子萊為咗遷就李穎容而坐樓下；Eva則行咗上樓上靠窗嘅位置坐低





「真係冇人比得上佢，就算你再靚再優秀都好。」Eva記起上一次張子萊對佢講嘅說話

「輸在⋯我識佢唔夠早嗎⋯？」Eva望向窗外，「就算佢對所有人都好，但總會有一個例外嘅存在⋯」

Eva先落車，佢回頭望向巴士，張子萊同李穎容望到Eva，兩人同時對佢揮手講拜拜

巴士緩緩開走，Eva唔明白又有啲明白一樣，耷低頭自嘲一般笑了笑




IG Link: https://www.instagram.com/nd_cotttoncandy/?hl=zh-tw