［純愛短篇番外］以朋友之名嘅愛情，我地各自嘅單相思: 08. 不安的心

後一晚，22:30

「叮噹～」

屋企嘅門鐘已經係第三晚喺呢個時間響起，李穎容心裏一顫，怯怯地行到門前，先將防盜鏈扣上，再從魚眼鏡向外望咗一眼

「叮噹～叮噹～叮噹～」

又係嗰個著住普通T-shirt短褲，好似飲醉酒嘅中年大叔企喺家門前，又一次不斷咁樣㩒門鐘





「叮噹～叮噹～叮噹～」

門外嘅中年大叔不斷地㩒李穎容屋企嘅門鐘，門鐘一直響過不停

李穎容即刻就輕手輕腳地行入房，慌張地拎起手機想打比張子萊，但搵到張子萊嘅號碼，想要㩒落去撥號嘅時候，李穎容猶疑咗

「張子萊話佢最近會忙，佢會唔會仲喺公司⋯？」李穎容坐喺床邊喃喃自語地問道

李穎容猶疑咗一陣之後都係冇打電話比張子萊





「算啦，佢咁忙都係唔好煩佢啦⋯」李穎容放低手機，「聽日可能冇事㗎啦⋯」

李穎容帶住呢種想法，又忍受咗長達五分鐘嘅門鐘聲，但佢冇諗過去到第四晚時，成件事變得更可怕⋯

⋯

第四晚，22:05

「叮噹～叮噹～叮噹～叮噹～叮噹～叮噹～」





「叮噹～叮噹～叮噹～叮噹～叮噹～叮噹～」

「叮噹～叮噹～叮噹～叮噹～叮噹～叮噹～」

門鐘已經持續地比人㩒咗10分鐘，同一個人，差唔多嘅時間⋯

李穎容完全唔敢出房，佢冇諗過嗰個大叔可以連續四晚嚟㩒佢門鐘，今晚仲要㩒咗10分鐘都唔停；李穎容一個人心裏好慌張，又唔知點算，而且佢唔知呢個大叔會做啲咩

呢個時間張子萊仲喺公司，不過已經準備走，今日嘅工作已經做好，所以可以番屋企休息一下

「我走先啦，你地加油啦～」張子萊企起身著上西裝外套同時對Alex同Gordon講道

「得啦，我地都差唔多㗎啦，你走先啦不過！」Alex抬一抬下巴

放喺西裝外套口袋中嘅手機響起嚟，張子萊拎手機出嚟睇，見到係李穎容打比佢





「喂？」

「你喺邊呀？」電話裏頭傳嚟李穎容嘅聲音

張子萊一聽，第一下已經呆咗一呆，李穎容把聲同平時有啲唔同，好似有啲沙啞

「做咩呀？又有人㩒鐘？」張子萊企喺自己嘅座位前輕皺起眉頭

「我本來唔想阻你做嘢，但我真係、真係好驚呀⋯！」李穎容帶住哭腔講道，「佢已經連續㩒咗我門鐘成15分鐘啦⋯！張子萊你喺邊呀⋯！我真係好驚呀⋯！」

「得，我宜家趕嚟。」張子萊心裏頓時緊張起嚟，快步離開公司

望住平日上落速度都算快嘅升降機，今日好似發生咗啲咩故障一樣特別慢





張子萊行出公司大樓，Eva同Chole買完嘢食行緊番嚟，見到張子萊大步大步地行出嚟，一副慌張著急嘅模樣

「Cyrus喎～」Chole望向Eva，指一指張子萊，「佢走啦？」

Eva同Chole正打算行去同張子萊講拜拜，但張子萊好快就截咗架的士上車

「千祈唔好開門」張子萊send咗過message過去比李穎容，「過緊嚟」

張子萊覺得今日架的士都開得特別慢，平時明明開得好快

「司機麻煩開快少少。」張子萊著急地講道

的士一停，張子萊比完錢之後講咗句「唔洗找」就直接跑向李穎容嘅屋企

張子萊一出升降機行進走廊，見到一個中年大叔行緊出嚟，個中年大叔望咗張子萊一眼，然後口裏邊講着：「冇理由冇人⋯」邊行向前梯





張子萊淡定地從大叔嘅身旁走過，大步地走向李穎容嘅單位

「我喺門口」張子萊send咗個message比李穎容

Message一變咗藍剔後，就聽到傳嚟急速嘅腳步聲，李穎容跑出嚟開門

一見到張子萊，忍唔住鼻子一酸就攬住張子萊無助地喊起嚟

「佢走咗啦。」張子萊講道同時推着李穎容入屋，手伸到背後將鐵閘同木門閂上

「佢連續㩒咗好耐啦⋯！」李穎容帶着哭腔講道，「佢呢幾日晚晚都喺度㩒啦⋯！」

「我咪叫咗你有咩同我講⋯」張子萊背靠着木門，「你做咩唔話我知？」





「你話你最近忙嘛⋯」李穎容細聲地講道




IG Link: https://www.instagram.com/nd_cotttoncandy/?hl=zh-tw