投胎後竟然成為翻譯魔法師（魔法 冒險）: 8
尋晚好似玩得太過火？今日起身到依家，安娜好似都有意無意咁避開我，睇嚟真係要同佢道歉先得⋯⋯
經過一整日嘅忙碌，我終於係黃昏嘅時間可以偷閑，嘗試搵吓安娜嘅下落，但係唔知點解好似成個農場都搵唔到佢咁⋯⋯
當我經過小山丘，我在一次見到安娜母親的墳墓。
「真係對唔住呀姨姨，我唔係有心蝦佢⋯⋯」我雙手合十，對着墳墓三鞠躬。
「我都唔知點算好⋯」邊個喺度講嘢？
「波比，我好亂啊⋯其實相處咗咁耐，我又唔覺得佢會係壞人喎。」係女仔嘅聲音？
我慢慢走向聲音嘅方向，發現聲音係來自小山丘上嘅空地，我用草叢做我嘅掩護，偷聽下人哋講咩。當我認真聽嘅時候，我就認得出性感嘅主人係邊個。
「其實我真係好開心，一直以來都冇乜人願意同我做朋友⋯⋯」嗰個女仔繼續講：「由細到大，大家都見到我係半精靈，都對我有偏見⋯而且我又唔擅長表達喎，成日都講錯嘢，又冇人明白我。波比呀⋯好多謝你肯陪我傾偈呀。」
「吠吠！」同樣嘅方向傳來狗仔歡愉嘅叫聲。
「如果有機會嘅話，我都想介紹佢比你識。同你講啦，我終於知點解佢咁特別啦，原來佢係轉生者！你唔知咋，尋日佢喺房間度做出左一個好大嘅火球，我練習左咁耐火球術都未試過做到咁強大嘅火球⋯我係咪好冇用？」
「吠！」「哎呀！你唔好舔我啦？哈⋯嘿⋯哈哈⋯」
莫非安娜喺度同一隻狗仔自言自語？估唔到平時望落去好冷漠嘅佢，都會有咁少女心嘅一面。
「上次咪同你講咗佢幫我開生日會嘅，真係好特別㗎！原來佢原來嘅世界有咁多特別野，我真係好想見識吓。係啦！」經過一陣搵嘢嘅聲音，安娜開心咁講：「佢送咗支笛俾我！我好鍾意呀！我成日都同你講我好想學音樂嘅，終於有機會啦！唔知佢點解會揀呢份禮物俾我呢？雖然係老師特登平價買俾佢，做我嘅生日禮物，但係佢都有我心呀，你話係咪？」
「吠！」「不如我吹俾你聽。」「吠吠！」「好啦！我新手嚟㗎咋，吹得唔好唔可以笑我㗎。」
聽住安娜同狗仔傾偈，真係覺得好搞笑，同時都覺得好可愛。
安娜將地放喺嘴邊，先進行調音，然後就開始吹奏。雖然我唔知佢吹奏緊咩歌，但係愉快嘅旋律令到我感到好愉快，有一種好似聽到每一個音樂都喺度跳舞嘅感覺。快得來，又唔會過分急速，令到每一個音都混合一齊。同時間佢又唔會吹到好似新手咁，斷斷續續。如果安娜真係練咗幾次，就已經吹到一首咁完整嘅歌，咁佢音樂嘅天份真係好高。
係時候同佢道歉。
「精彩！真係好精彩！睇嚟買呢支笛俾你真係明智嘅選擇。」
「邊個？」「吠！」安娜同狗仔都比我突然出現嚇親。
「仲有邊個買支笛俾你？」
「點解你會喺度㗎？你喺度幾耐啦？」安娜立即驚訝咁問。
「大概讚我唔係壞人，話我肯同你做朋友嗰度開始囉～」我笑住咁望住佢，只見到佢整個面都已經紅晒⋯
「你⋯聽到晒？」我點點頭。
安娜超級怕羞，立即擰轉身，唔想對我有任何視線接觸。我慢慢向佢走近：「有咩所謂姐，聽到同聽唔到都一樣㗎啦，無論點都好我哋都係朋友嚟㗎，你唔會係想我走？如果係咁我走囉⋯⋯」
「唔好！」「咦？」
安娜口吃咁講：「我⋯我⋯唔係想你走⋯」
「咁就好啦！幾驚你踢我走啊，咁我就無家可歸～」我笑住咁講。
「咁我又冇咁殘忍⋯」
「題外話啦，你吹得好好聽喎，練咗好耐？鍾唔鍾意支笛？」我伸出手，示意想攞一攞支笛，安娜亦都願意俾我。
「還好啦。練咗幾日，支笛嘅音色真係唔差。」咩話！幾日？唔講仲以為練左成個月，咁睇嚟佢真係好有天份。
「呢幾日已經咁好，俾你再練落去咪做音樂家！？」我誇張咁講。
「太誇張喇，嘿！」安娜見我稱讚佢，揞住咀偷笑。
見到佢笑返就好啦，佢笑起上嚟真係好靚，好過黑口黑面嘅佢好多⋯⋯
「見你笑返就好啦，尋日嘅事⋯對唔住⋯我唔應該咁過火⋯」我向佢道歉。
「咩啊？咩尋日⋯哦！你講緊尋晚件事？我冇嬲喎。你以為我嬲你？」安娜摸一摸隻狗仔，嗰隻叫做波比嘅狗仔已經瞓緊覺⋯⋯
「吓？係呀⋯我見你一枝箭咁跑走咗，以為你會好嬲⋯」諗返起尋晚嘅事都感到尷尬⋯
「我冇嬲啦，傻仔。嘿！」安娜對着我微笑，喺夕陽嘅照耀下，安娜彷彿成為左一個天使，有女神光從佢背後滲出，如果有部相機喺度就好⋯
安娜突然間靠近我，臉龐越嚟越接近我嘅臉，然後在我耳仔低聲地說：「但係如果我真係鍾意你，咁⋯你係咪會負責先？」
突如其來嘅問題令我不知所措，我即刻俾佢嚇到口吃：「吓？！我⋯我⋯其實⋯即係⋯」
「尋日先撩完我，今日就唔負責任啦？」安娜用誘人嘅眼神對我放電：「咦？你做咩面紅啊？」
「我⋯冇⋯冇⋯面紅呀⋯」冇面紅就假，見我自己都感覺到成個人都熱晒⋯⋯
安娜越靠越近，同我四目交投，然後奸笑：
「嘿！仲玩你唔到！一人一次當打和啦。」
原來佢喺度玩緊我⋯⋯點解我會有一種可惜嘅感覺⋯⋯
「話說你識唔識吹笛？」安娜突然間問我。
「我以前有玩過音樂，不過未試過吹笛，不如你教下我？」我好奇一問。
估唔到安娜真係願意教我，佢教我點樣透過改變嘴型，將空氣集中吹入笛嘅內部，並且發出聲音。
經過少少時間嘅練習，我總算成功掌握到技巧。但係好神奇，我唔知係咩事，當我吹笛嘅時候，我個腦海裏面會出現返 Do Re Mi 等音階，然後我嘅雙手自然就會按住笛子上不同的洞孔，並發出我想要嘅聲音，彷彿就好似有嘢自動幫我吹奏音樂。 唔知道呢一種係咪好似我識自動翻譯嘅超能力，好有可能係我投胎嘅時候，愛麗絲女神比我嘅祝福？
「哇！你好勁喎，竟然咁快學識？」安娜佩服地望向我：「咁不如你唱一首歌俾我聽吓？」
「吓？吹咩歌？」我驚訝地問。
「咁你以前喺你嘅世界會聽咩歌？總會有一啲有笛嘅音樂掛？」安娜好奇咁問我：「快啲啦！我想聽吓你哋嘅音樂。」
一時三刻我諗唔到吹咩歌。諗返起以前打機嘅時候會聽嘅音樂，我腦海突然間出現咗一首有笛嘅歌。
「我吹得唔好唔准笑我㗎！」安娜瘋狂點頭，彷彿催促住我快啲開始。
於是我吸一口氣，準備吹奏我曾經最鍾意嘅音樂: TheFatRat - Monody (feat. Laura Brehm)
我腦海裏面回想返呢首歌嘅旋律，嘴巴和手就好自然地郁動，吹就出我想要嘅音符。安娜就目不轉睛咁望住我，喺夕陽下欣賞住呢一首歌。
"Summer in the hills ,those hazy days I do remember. We were running still, had the whole world at our feet..."
雖然前路就好似充滿着迷霧一樣，但係冇可能因為困難就要退縮⋯
"Watching seasons change, our roads were lined with adventure. Mountains in the way, couldn't keep us from the sea..."
人本身就會面對挑戰，一生嘅改變如四季更換，乃是十常八九。即是有萬重山，都擋唔住我哋出海探索嘅自由。
"Here we stand open arms, this is home where we are, ever strong in the world that we made."
坦然接受命運，只要有心，四海為家，仍可自強不息。
"I still hear you in the breeze, see your shadows in the trees, holding on, memories never change..."
彼此追影，永不忘記，摘下回憶，創造奇蹟。
我去到清唱嘅部份，直接用英文將呢首歌唱出嚟，最後亦都吹返完尾。我望向安娜，只見到佢呆呆咁望住我。
「點解你會識得用通用語唱歌？你唔係唱緊你家鄉嘅歌咩？」睇嚟我嘅翻譯技能將成首歌改成通用語嘅歌⋯⋯
「哈！我即興改嘅咋⋯哈哈！唔知你鍾唔鍾意⋯⋯」
「好聽！真係好好聽，歌詞都好有意義。計我話，如果你唔做魔法師，大可以做吟遊詩人。」安娜雙眼發光咁望住我。
「過獎啦！不過希望你真係鍾意啦。」我拍一拍佢個頭，然後摸一摸：「就算大家嘅過去有幾咁不堪，再多嘅挫折只不過係磨練，既然命運已經係安排好，咁就等我哋坦然咁接受啦！你一定會搵到自己鍾意嘅嘢！到時你要好好把握住佢啊。」
我見安娜冇出聲，變縮開手望向佢，喺夕陽下山一瞬間，最後嘅陽光照向安娜嘅面，露出通紅嘅臉⋯
我突然間諗起，好似有樣嘢叫做「摸頭殺」⋯⋯
「呀！時間唔早啦，我哋要快啲返去啦，行啦行啦！」我收起笛子，將佢包好並放入安娜嘅袋，然後同波比呢一隻狗仔道別後，就返去。
正當我哋返到去，居然發現屋企入邊有客人。
「唔好客氣啦！阿達。安娜我由細睇到大，我當咗佢半個孫女，小小心意有咩所謂。」熟悉嘅聲音從家裏傳出，我同安娜打開大門，已經見到維達大叔向我哋招手。
「你哋望吓今日邊個嚟咗？」我哋望向餐枱，估唔到居然係⋯⋯
「呵呵呵⋯今日老夫正正想搵你兩個，賞面同我呢個老嘢食餐飯嗎？」
「師傅！？」「埃爾登伯伯！？」