投胎後竟然成為翻譯魔法師（魔法 冒險）: 7
「你⋯你做緊啲咩啊？！」安娜驚叫。
「安娜!等一陣!你聽我解釋先!」我慢慢走近，想同佢解釋…
「企係到!你啱啱嗰火焰…係魔法？點解你會識魔法？你究竟係咩人？」可唔可以唔好講到我你壞人咁…
「我講你都唔信⋯⋯」「快啲講！」「咁你應承我，無論聽到啲咩，都唔好驚訝⋯⋯同埋最緊要係⋯⋯唔好同其他人講！」
安娜點一點頭。我深呼吸一口氣，將我嘅事講晒比安娜聽。由我轉生投胎，到我遇到愛麗絲，最後點樣攞到呢本書。
「唔⋯⋯」果然應該唔信⋯
「原來係咁，我明白啦。」竟然咁就信！？
「你真係相信？你唔覺得成件事好奇怪咩？」「有咩咁奇怪？」
「姐係…」我枱托下巴：「又投胎，又神選之人，又魔法，你唔覺得好奇怪咩？」
「有咩咁奇怪啊？你係咪唔記得咗我嘅血統有一半都係精靈族？」安娜搖一搖頭：「話晒我母親嘅祖先一直都信奉創始之神，如果我冇記錯就係愛麗絲⋯⋯」
有冇咁橋呀⋯⋯
「再加上我半精靈都可以使用魔法，有咩出奇？再加上轉生者這個嘅傳說一直都存在，過往一直都有轉生者解決危機嘅歷史，有幾出奇？」
我真係俾佢搞到我O咗嘴，信都算啦，居然仲可以咁從容不迫⋯
「咁你覺得點⋯⋯你知道咗我真正身份，你覺得點樣⋯⋯」我真係唔知道，如果人哋知道我嘅真正身份，大家會有咩反應？就好似你嘅朋友突然間同你講，佢係外星人一樣，真係接受到？
「咁有咩點姐⋯」安娜慢慢行入房，坐低喺張凳度，望出窗外嘅星空。「就算你係咩身份，都只不過係人一個，都有情感⋯⋯突然之間去到一個陌生地方，無任何熟悉嘅人⋯⋯」安娜呼一口氣，望向我：「你⋯係咪好辛苦呢？」
「我⋯我⋯」
「你係咪好掛住屋企人、朋友同熟悉嘅人？」
「其實⋯⋯」
「根本喺度識唔到新嘅朋友，仲要重新適應，係咪好攰⋯⋯」
「⋯！」
正當我沉默之際，安娜突然間抱着我，係我耳邊講：「唔使驚㗎，辛苦你啦⋯以後有乜嘢都可以同我講㗎⋯⋯」
「我⋯⋯唔⋯多謝你⋯⋯」我已經忍唔住不斷留眼淚，雙手亦慢慢抱着安娜⋯⋯
------------
「原來你講嘅係真嘅，你嘅鄉下真係一個好特別嘅地方。」我同安娜一齊坐喺地下，安娜坐喺我旁邊，一齊喺度傾偈談心。
「特別都算特別嘅，可惜就係好忙碌，每個人都好似冇晒靈魂⋯⋯」以前香港嘅生活⋯諗起都頭痛⋯
「你原本嘅世界都幾特別喎，一夫一妻制、男女平等、仲有你講嗰個互聯網，所有嘢都好神奇，有機會見識一下就好啦⋯」
「都得嘅，學我咁樣重新投胎⋯嘿⋯啊！」我膊頭俾人打咗一拳。
「你咁樣即係咒我去死姐⋯」安娜鼓起臉，喺度扮嬲。
「講笑咋⋯⋯」
突然間瞬間又變返沉默，最怕空氣突然安靜⋯⋯
「係喎，咁你而家有咩打算？」安娜問我：「你始終都有自己要做嘅事，冇理由永遠都留起呢個農場。」
「都係嘅⋯⋯但係短時間內我都唔知有咩可以做⋯我想練習好我嘅魔法先。」我打開手掌，用魔力製造一個火球：「係我嗰個世界每個人都係普通人，根本就冇魔法嘅存在。咁難得俾我有機會做到魔法師，我梗係想玩多啲魔法啦。」
「魔法唔係玩㗎啦，要好俾心機先可以練得好⋯⋯」安娜擺喺一款說教嘅樣：「如果你想學魔法嘅，我可以幫下你㗎⋯」
「咩話！？你都識魔法嘅咩？」 同佢生活左一段時間，真係而家先知⋯⋯
「咁話晒我都係半精靈，魔力天生俾人類多都好正常，而且我記得我好似係自學，後來大個咗認識埃爾登伯伯，我依家嘅魔法都係由佢嚟教。」唔怪得埃爾登伯伯咁豪爽送支咁貴嘅笛俾安娜，原來唔係師徒關係⋯
等陣先⋯我依家用緊埃爾登伯伯所寫嘅書學習魔法，安娜又係跟佢學魔法，都算係半個同門喎。有多個人練習又真係好似有幫助⋯不如就試吓啦⋯
「咁不如我哋以後都一齊練習？反正我都係跟埃爾登伯伯學魔法，呢本書就係佢寫嘅⋯⋯」
「咦？真係師傅嘅筆跡喎！呢本野你喺邊度搵㗎？」安娜好奇咁問。
「咪就係埃爾登伯伯嗰間書店度，我見佢周圍擺，所以就攞咗嚟睇。佢又好好人咁送俾我，咁冇理由唔要啦～」
「咁你啱啱嗰個係咩嚟？」
「啱啱嗰個？」
「即係你用把口噴出嚟嗰個火球⋯」安娜模仿我噴火嘅動作，個面有啲似雞泡魚，望落去都好得意：「你一噴，呼！個火球吹到好大，但同我哋平時了解嘅火球術又好似唔同？係咪你鄉下嘅秘術？」
「咩你哋呢度都有秘技呢種稱呼？我以為所有魔法都係秘技？」
「梗係唔係啦，其實正常學習魔法應該要去主城嘅魔法學校學習，佢哋有課程表以及特定嘅教學內容，全部都經由魔法教育部制定，好正規㗎。所有魔法都會由魔法部內不同部門監管，而每一個魔法都會被魔法使用及安全部標記並註冊，所有未經註冊嘅魔法都算係秘術，理論上係違法嘅。」
咁似哈利波特嘅？居然會有魔法部⋯不過都唔出奇嘅，當魔法成為日常生活一部份，就需要有人監督。但係魔法學習都要有教育部安排，咁同讀死書冇分別個喎⋯⋯但係令我最在意嘅係⋯⋯
「理論上違法？何謂理論上先？」我好奇嘅係點樣算犯法，始終唔希望未來出出下街俾人拉咗都唔知咩事，好似香港咁⋯⋯
「唔⋯點解釋呢？即係咁⋯」安娜嘗試組織：「所有魔法應該都要被監管，並且註冊⋯」我點一點頭。
「但係其實每個魔法，只要你輸入嘅魔力有分別，或者你將佢使用嘅時候，你想像唔到有其他嘅元素，其實都有機會已經變咗質。」
「的確係呀，所以埃爾登伯伯本書上面咪寫，魔法主要係靠我哋嘅想像力。」
「冇錯呀！就係因為咁，就算你用火球術，同我用嘅火球術，其實都存在不同，所以嚴格來講我哋兩個都算用緊秘術。」
「下？！咁每個人都好容易犯法⋯」
「所以正正因為咁，多數魔法部門對於秘術嘅監控同限制都好少，只係做吓樣。」
原來所謂嘅「理論上犯法」，講緊嘅就係魔法部嘅疏忽⋯⋯都好嘅，咁我都可以安心啲咁中二病。
「咁其實秘術都唔係好特別姐⋯」
「咁說話又唔係咁講呀！」安娜認真望住我：「雖然亂咁用魔力都可以話自己用緊秘術，但真正稱得上為「秘術」，其實都要有一定條件。例如係實用性、可行性、對魔力嘅需求等等都屬於考慮因素。所以用一招稱得上「秘術」嘅魔法，其實都好難。」
「咁發明以及使用秘術嘅人咪都好勁？」
「都係㗎⋯因為秘術一般都係靠個人想像力，冇辦法好似火球術、光箭呢啲傳統魔法咁系統化學識。」安娜期待咁望住我：「所以你啱啱嗰個魔法？」
「的確係我參考我鄉下嘅漫畫，自己研發嘅⋯⋯」
「真係㗎！？咁你好有潛質喎，明明自己學咗魔法冇幾耐，就已經學識點自創秘術。」安娜皺一皺眉：「但係咩叫漫畫？」
「你當係故事書，只不過充滿着圖畫咁敘述故事。」話說我都好想繼續追番⋯唔知道《海賊王》出晒未呢？《轉生史萊姆》都好正，幾時出第三季⋯我仲好想睇《回復術士》⋯
算啦⋯都係唔好再諗⋯
「話說我想問你一個問題⋯⋯」我望住安娜⋯
「你問啦。」
「其實你係咪唔係好討厭我？」其實我真係好在意，話晒突然間出現喺人哋嘅生活，仲要打攪到佢哋，我都好過意唔去⋯加上見到安娜好似唔係太鍾意同我傾偈⋯
「吓？點解你咁諗？」安娜驚訝咁反問。
「咁我見你之前有唔太鍾意同我傾偈，聽我講我以前嘅故事又偷聽，唔肯問我⋯⋯」
「原來你知㗎？」安娜開始面紅，雪白肌膚令到佢嘅面顯得更加紅。
「咁你個耳仔咁得意，每次偷聽都郁吓郁吓咁，我又好難唔知個喎。」我笑住咁指住佢個耳仔，輕輕掂左一下，點知⋯
「嗯吖！」安娜突然間發出嬌喘嘅聲音，嚇到我即刻縮手！
「做咩啊你！？突然間叫到咁？嚇死人咩？」安娜冇反駁，只係見到佢塊面越嚟越紅，唔敢直視我。
「人哋⋯隻耳仔好敏感㗎⋯」佢好怕羞咁講，佢怕怕醜醜個樣，同佢平時扮到好冷酷嘅樣完全不一樣，可愛好多，整到我有少少想蝦佢，嘿！
「吓？做咩啊？塊面咁紅嘅？」我換過姿勢，半跪咁望住佢，然後一手壁咚：「你唔會係⋯對我⋯」
「痴線㗎！」安娜迅速咁捐走，然後走去門邊，對我大叫：「你呢個蠢材！」然後就一枝箭咁跑走咗⋯⋯
我係咪玩得太癲，唔記得咗呢個世界嘅人應該相對保守⋯
睇嚟聽日要跪玻璃啦⋯