投胎後竟然成為翻譯魔法師（魔法　冒險）: 4

夕陽無限好，只是近黃昏⋯⋯天空被夕陽點燃，整個天空都變得橙紅色，而每一片白雲亦都被燃燒起，整個天空就如火海一般，璀璨奪目，何其壯觀。
但係我已經冇心情再去欣賞黃昏嘅美，因為我就嚟趕唔切返去⋯⋯
我兩手抽起每一件被絆腳草繩捆綁着的貨品，一邊努力地跑回農舍。幫大家科普一下，絆腳草繩，顧名思義就係用絆腳草織成嘅繩，絆腳草係呢個世界隨處可見，如同雜草一般嘅存在，堅韌無比。佢哋生長嘅時候多數都會自然地纏繞在一起，因此有不少行人都會被纏繞在一起的絆腳草絆倒，因此得其名。

終於在日落之前趕到返去，我一支箭跑到去倉庫，就已經見到維達大叔等待着我。

「咁遲㗎，仲趕唔趕得切？死啦！我第一次幫人搞生日會，會唔會唔成功⋯⋯」維達大叔開始好緊張，見到一個肌肉大男人竟然為咗搞生日會緊張，個畫面真係有少少滑稽⋯⋯於是我雙手捉住佢膊頭，用堅定嘅眼神對住佢講：
「怯，你就輸成世。要做嘅就做到最後！掙扎啊！！！」維達大叔起初被我嘅認真眼神嚇親，但隨即亦收復心情，對住我一齊大叫：「掙扎！」

講真⋯唔知點解我突然間有一秒覺得大叔有啲似胡力威師傅⋯





我哋二人合作喺廚房度已經準備開工，我已經係尋日寫好晒所有食譜俾維達大叔，原本仲擔心佢會應付唔黎，但係自從妻子過身後就已經開始下廚嘅男人，十幾年嘅下廚經驗睇嚟都幫助到佢，加上我從旁指導，一疊又一疊嘅美食已經準備出爐。

今日嘅菜式有魚湯、燒春雞、京都骨，當然仲有生日唔少得嘅生日蛋糕⋯⋯好啦⋯我承認我唔識整蛋糕，亦都一時間變唔到蛋糕出嚟，所以嚴格啲來講係⋯生日麵包⋯

基本上，呢個世界嘅調味料同我哋原本世界差唔多，甚至有更多嘅特別調味料，可惜我仲未有機會嘗試。不過都足夠我模仿返地球上唔同國家嘅菜式。至於生日蛋糕⋯就用麵包代替⋯鬼叫你窮呀頂硬上！

當我攞出麵包嘅時候，我發現一個問題，個麵包仲硬過磚頭⋯⋯應該係放得太過長時間，令到當中嘅水份被抽走⋯⋯
我以話不說將整個麵包放在鑊裏加水蓋。而維達大叔就唔明白我做緊啲咩⋯⋯





「個麵包太硬，係因為入邊嘅水份被抽乾，所以其中一個解決方法係將個麵包用水蒸熱，咁樣可以令個明白相對回復返水份。」

「竟然仲有呢種方法，我仲以為麵包變硬咗，就只可以送湯。」維達大叔恍然大悟。

我將圓形嘅麵包切成三層，並將大叔自家製嘅乳酪，混入今日我在山上採摘嘅爆漿莓和藍莓製成嘅果醬，並將混合乳酪當成忌廉咁搽上麵包。
冇計啦⋯ 忌廉係呢個世界上真係好奢侈，況且根本就唔夠錢去買現成嘅忌廉，我又唔識整⋯⋯

在夾層之中放入藍莓和草莓，最後就用乳酪鋪平表面以及側面，並在表面放上藍莓以及已經切好的草莓做裝飾。

考慮到麵包比起蛋糕更加難切，我已經預先切好咗，到時唯有叫安娜沿着切口扮切蛋糕。





望到完成品，維達大叔不禁驚嘆：
「原來你鄉下嘅人就係會食呢一個豪華嘅食物慶祝生日⋯真係好奢侈！」

「咁又唔係嘅，我鄉下貧富懸殊好嚴重，有啲人平日冇嘢做都可以買個蛋糕做下午茶，有啲家庭就貧窮到連三餐都不計⋯⋯好矛盾㗎⋯⋯」

「居然係咁⋯⋯咁真係辛苦晒你鄉下嘅人民⋯⋯」

「好啦，係時候要快啲裝飾，以免安娜返到嚟就尷尬，大叔麻煩你幫幫我手。」

「好！冇問題！」

我將蛋糕放入雪櫃⋯係冇錯，你絕對冇聽錯⋯真係一個雪櫃！
我起初都好好奇點解呢個地方居然會有雪櫃！？仲要係石造⋯⋯
但當我放入蛋糕並觀察內部嘅結構，我就明白到佢嘅原理。簡單兩個字 - 魔法





我喺雪櫃嘅背部發現有一個細細的魔法陣，魔法陣發着藍光，並滲出寒氣，當我好奇究竟係邊個製造呢一個雪櫃，偉達大叔竟然講出一個熟悉嘅人名：埃爾登伯伯

係時候裝飾下個客廳，我喺原本嘅木桌上鋪上了頭先喺城鎮買的桌布，並拿出維達大叔以前整嘅木製花樽，最後放入我在路邊摘嘅花。整個客廳已經比維達大叔清潔左兩三遍，超級乾淨同企理。然後維達大叔掛起一條一條印有三角形旗幟嘅繩，上邊每一個旗幟都印有一隻字，最後會組成「安娜生日快樂」嘅句子。
一切都準備好，就係等安娜返嚟。

正常時間其實佢應該一早已經出現喺農莊，但係我都唔知點解維達大叔咁有信心佢會喺我哋裝飾後先返到，好似早有計劃咁。

「佢返嚟啦，準備啦！」偉達大叔喺窗簾嘅旁邊偷看窗外影像，見到安娜嘅身影，就立即企到門邊。

「我返嚟啦，原本仲諗住可以早啲返，點知俾做布料嗰個婆婆攔住咗⋯⋯」大門被打開，安娜一打開門，就見到我棋喺門邊：「你做咩企喺度⋯⋯你想點啊⋯⋯」明顯地佢有點措手不及。
我一於將計就計，露出猥瑣嘅表情，對住佢奸笑：
「冇嘢啊，我等緊你咋嘛，嘿嘿⋯」我立即關上大門，安娜嚇到想奪門而出，可惜俾我撳住：「同埋呢⋯⋯我想同你講⋯⋯」

「生日快樂！」「阿囡，生日快樂！」

「吓！？發生咩事呀？」安娜驚訝咁望住我哋兩個，先見到原來客廳桌上已經放住一度有一道菜，正在等佢品嚐。

「快啲過嚟坐啦，啲嘢食都凍哂啦。」我立即行到去飯桌上，將所有煲蓋到拎起：「你老豆為咗俾你有一個特別嘅生日，特登搵我幫手，俾你感受下異國風情嘅生日會。快啲試吓我嘅家鄉菜啦。」

「雖然呢個係我主意，但係佢都好辛苦，尋晚幾乎冇瞓咁幫我諗點幫你慶祝生日，佢今日仲要四點幾就已經出門口收集材料。」大叔拍一拍安娜背脊：「都好有心㗎，應該唔使驚啦。」

「多謝爹哋！多謝你⋯⋯」見到佢鍾意，我都放心啲，但係唔知係咪我自作多情，當安娜同我答謝嘅時候，我見到佢個面好似有少少紅。

「好啦我哋開餐啦！」「大家食飯！」「大家食飯！」
就係大叔一聲號令之下，我哋嘅胃口一齊開動。

食完飯之後，就梗係要食蛋糕啦，我另外再攞多兩隻紅雞蛋，係用咗一種紅色可食用嘅花醃製而成，我琴日凌晨朝早去搵，就係為咗爭取時間令到雞蛋可以染上紅色。佢哋兩父女見到明顯感到驚訝，幫我向佢解釋紅雞蛋亦都係其中一個傳統慶祝生日嘅食物，佢哋先明白。

「我就覺得奇怪嫁啦，點解你尋晚問我有咩紅色花可以食，我仲以為你諗住叫我個女生日食花，哈哈哈哈！」

「多謝你，真係好多謝⋯⋯」看那一邊又驚喜又好奇嘅眼光望住生日蛋糕同紅雞蛋，一邊感動地望向我，搞到我都唔好意思。

「哈⋯傻啦，今日你生日，你大晒㗎嘛，快啲吹蠟燭啦。記得許願完先好吹！」

生日蛋糕嘅味道都算唔錯，唔知係咪啲麵包浸乳酪浸得太耐，神奇地變林左都幾好食。大叔狼吞虎嚥咁食蛋糕，又好奇地研究紅雞蛋，見到剝開蛋殼後，雞蛋仍然係白色，唔知點解好似有啲失落⋯成個大細路咁，都幾得意。

安娜入邊食住蛋糕，睇佢個樣應該蛋糕幾啱佢口味，從來未食過生日蛋糕嘅佢，睇嚟都幾鍾意。佢周不時都望向我，但當我望向佢嘅時候，又會即刻眼神收縮，扮睇冇望過我。真係奇怪⋯⋯

熄晒所有嘢食唒所有野，就係時候拆禮物。大叔送咗一件羊毛衫比安娜，不過聽安娜後來講返，大叔每年都好似會送衫俾佢做生日禮物，所以都冇乜特別⋯⋯

「好啦，到我嗰份啦，希望你鍾意啦⋯⋯」我拿出一個盒子，遞比安娜。

「呢個係⋯⋯」安娜雙眼發光，不敢相信我送俾佢嘅禮物⋯⋯





「登登！係木笛啊！我仲買埋本木笛入門書俾你，咁你就可以自學啦！」我得戚咁望住佢：「 估唔到呢？」

但我望住安娜，見到佢眼泛淚光，嚇到我即刻唔知點算⋯⋯維達大叔拍一拍我膊頭，帶我遠離飯枱，係我耳邊細細聲講：「我估佢應該太感動，所以先會咁，你唔使太驚。佢由細到大都想學音樂，但可惜我哋又冇咁多錢俾佢學，所以佢應該好鍾意呢瞓禮物。」佢清一清喉嚨，然後更加細聲咁問我：「不過呢，你呢一支木笛，我睇得出係上等貨，你係邊度買㗎，最少都要一個金幣，即係差唔多1000個銅幣⋯⋯」

「吓！！！一千⋯⋯」「噓！」
我立即暗住口，細細聲咁回答：
「我咪就係喺埃爾登伯伯嗰度買，佢話係下欄嘢，連埋本書，收咗我30個銅幣就算⋯」
「估唔到佢咁多年都仲係咁闊綽，搵日真係要多謝下佢先得⋯⋯」
「你地兩個⋯⋯」

安娜雙手捧住支笛，望向我哋兩個。
「哈哈⋯⋯冇嘢冇嘢，啱啱講緊個紅雞蛋咋嘛⋯⋯」大叔向我單眼。
「哦⋯啊！係呀！紅雞蛋嘛，記得下次要浸足廿四小時先喎⋯」我夾硬接落去⋯⋯

只見安娜不作聲咁行到我面前，雙眼盯着我，令到我唔敢亂咁講嘢⋯⋯突然間，佢雙手抱着我哋兩個！

「好多謝你哋，呢個係我最難忘、最開心嘅生日會！」安娜終於到流下眼淚。
「傻女！你鍾意就好啦⋯」大叔抱住佢，用手拍着安娜的膊頭。
我就唔知講咩，只好企喺度，一碌木咁，俾安娜抱住。不過見到佢開心，咁享受個生日會，我都算係心滿意足。

安娜嘅18歲生日會，總算順利進行。