【愛情】 我同女仔傾偈就會肚痛: 第三章
喺踏入課室，正式開始考試之前，真正嘅戰場已經喺門口開始緊。
「同學考DSE呀？唔使緊張，填返份問卷定一定驚先。」
「我上年都係噉㗎咋，放心啦唔會阻你好多時間。」
「同學你個電話二字頭嘅？留個手提電話畀我哋啦。」
「多謝晒，填完個問卷包你考試順順利利呀！」
本來人生路不熟，突然遇到啲咁熱情嘅人確實幾有驚喜。只係當佢哋慢慢露出真面目，而你又俾五、六個人包圍、填完一份又一份嘅問卷，幾多驚喜都會變做厭惡。可惜我新嚟新豬肉唔識反抗，如果唔係一開始就唔會幫佢哋填。
更加唔好提，幾個月後我先至佢哋原來係傳銷狗，成日扮晒好關心你啲成績前途，另一方面又會係噉打擊你啲自信，實則想Sell啲課程、海外升學計劃畀你。
除咗呢樣嘢，考其實試嗰陣都幾順利，冇遇到啲咩說話豬隊友、攻擊型收音機、黑絲短裙擾敵等等。考完中文幾份卷，我已經開始適應試場嘅壓力同氣氛，冇再喺臨考之前肚痛同埋瘋狂筆記。
加上每考完一日，班Group嘅同學仔會分享啲見聞同討論題目答法、又會考試之前互相打氣，令你感受到一班戰友一齊出生入死、成個B班直情前所未有咁團結。
最特別嘅，當然仲有Miss So同Claire姐鼓勵。
尤其Claire姐本身冇乜義務，但係都特登搵咗個Dse時間表，喺考試日每朝Send個Message幫我打氣。唔經唔覺，Claire姐喺最尾呢兩年對我影響越嚟越深，唔單止會解答我啲學業問題，又會喺Miss So方面畀意見我，某程度同我仲Friend過啲同學。
正當我諗住專心應付Dse嘅時候，意外又會突然出現。
「男班長，你溫緊書？」
「係呀，後日考英文呀嘛」
「咁你溫成點」
「幾好呀，你晏畫先幫我哋幫完咋喎」
一睇到Miss So個Message，我以為佢係想督促吓我。點知下一句，佢就揭曉咗今次搵我嘅目的。
「咁你得唔得閒？我有小小野想問吓你...」
Miss So主動搵我，我當然無任歡迎，只係冇諗過佢下一秒就直接打電話嚟。
「喂。」
「Hel、Hello…...」太過突然嘅關係，搞到我抖大啖氣先敢聽佢個電話。老實講，喺接呢個電話之前，唔知點解我有種唔好嘅預感。
「唔阻你㗎嘛？」
「唔阻呀...做咩咁、咁突然打嚟嘅？」
「電話傾方便啲呀嘛。」
「咁係關於咩......？」
Miss So突然靜咗一陣，然後慢慢進入主題：「其實係......關於鄭Sir嘅。」
「吓？條友又煩住你呀？」
一聽到鄭Sir呢個名，我不受控噉有啲激動。自從大埔海濱公園之後，加埋佢本身傷害Miss So嘅往績，我已經變到好憎鄭Sir呢個人。尤其上次件事見到佢咁格硬嚟，我都估佢會對Miss So死纏爛打。
「嚴格上又唔係嘅......」Miss So一如以往咁難捉摸，講出一個我意想唔到嘅答案：「其實係我開始想...想試吓同佢復合。」
果然好嘅唔靈醜嘅靈，可能我真係有把烏鴉口，先會噉樣求其噏吓都中。
我聽一到Miss So話想復合，潛意識就浮現出佢喺海傍喊到聲淚俱下個樣。究竟鄭Sir係畀咗咩藥佢食，先會令Miss So對住一個傷得自己咁深嘅人有復合念頭。
或者佢呢個例子，正正係代表緊愛情係盲目嘅。
當思考滲透咗感情，自然唔再理性、亦唔再可靠。
「發生咗啲咩事？」雖然我第一句就想劈頭反對，但係佢既然問得我意見，我應該要好似Claire姐噉，理性啲去解答問題。
「唉...其實又有啲復雜......」就係噉，Miss So就將成個故事由頭講一次。
簡單嚟講，鄭Sir本身確實係一腳踏兩船，而東窗事之後，佢只係好簡單噉解釋一次，冇特別諗住去挽留Miss So。當時Miss So更加係好錯愕，覺得對方個態度好似自己冇做錯到，甚至對佢仲好冷淡。
去到同我睇完戲嗰日，Miss So就開始覺得要放低鄭Sir，決定唔再主動搵佢。
不過Miss So始終對佢仲有感覺，所以喺下定決定心之前，特登打咗一大篇文畀佢。內容大致都係矯揉造作、想分手但係又留一線，唔多唔少喺度期望有奇蹟出現。
唔好彩嘅係，過多幾日鄭Sir真係突然主動返，仲約咗佢出嚟傾吓，然後發生咗上次大埔海濱公園嗰件事。
鄭Sir解釋佢一開始點解咁冷淡，係因為想俾啲空間大家冷靜吓，同埋俾佢諗清楚自己究竟想要啲咩。最尾佢覺得自己係愛Miss So多啲，所以就同Miss Lau嗰邊斬纜，一心一意想同Miss So復合。
Miss So好明顯因為噉而心軟，開始陷入猶豫嘅局面。
喺我角度嚟睇，當然唔贊成佢哋復合。尤其我曾經聽過一個講法，係話出軌只會得零次同無數次。雖然我都唔想咁極端，但係用兩部電話呢啲咁有技巧嘅出軌手法，令我覺得佢唔會咁容易真心悔改。
「我覺得你可以試吓......同佢分開半年至一年先？睇、睇吓佢係咪真係有心同你復合。」
「如果佢最尾都係出軌，噉會唔會變相晒咗好多時間？」
「噉萬一佢連幾、幾個月都冇心等，噉、噉咪知佢其實...冇想像中咁愛你。」
「都係嘅......」
言語之間，其實隱約聽得出Miss So好有衝動想同返鄭Sir一齊，搞到我都即刻有啲驚。驚佢咁容易心軟，只會令鄭Sir更加唔識珍惜佢，最尾要迎接第三次嘅傷害。
更何況我本來就唔想見到佢拍拖，或者話就算要拍拖，我都希望佢搵到個最完美、最適合佢嘅對象。
至少噉樣我會容易接受啲。
「你如果唔想等咁耐...想即、即刻畀多次機會佢...我都會支持你嘅......」
雖然我唔想佢哋一齊，但係站喺作為朋友嘅位置，我起碼想佢知道我永遠會企喺佢嗰邊嘅。
只係講完呢句，我估唔到自己會忍唔住喊。
我好快扮俾屋企人嗌我，放低個電話撳住啲情緒，費事佢聽到我喊會覺得奇怪。
最後佢怕自己會阻到我好多時間，所以之後冇再繼續傾落去。
有時聽完Miss So啲感情嘢，無論係佢個前度定係鄭Sir，我都會好羨慕佢哋。因為佢哋同樣可以令到Miss So對自己動心，而我就算同Miss So關係再好，始終唔會做到佢嘅男朋友。
或者呢個係我嘅命運，時機唔啱就係唔啱，我由出世開始已經注定係細佢十年嘅學生，就算幾努力去討好佢，都唔會令佢覺得我係一個合適嘅對象。可能終有一日，我要放棄對佢嘅感情、以一個學生同朋友嘅態度同佢相處，先可以繼續留喺呢個位置。
呢刻我冇心情再繼續溫書，只係靜靜哋聽住阿烽佢哋講嘢。呢段期間我哋就算喺屋企溫書，都會On住個Rc一齊溫，一嚟冇咁寂寞，二嚟有咩唔識可以互相指點吓。
「喂雞豪，噉最尾你決定幾時表白呀？」
「吓...可能Grad Din嗰陣掛？到時應該最後一次見，衰咗都冇咁柒呀。」
本來我以為自己傷心過度，一時間有幻聽。
直至佢哋講多啲Detail，我先肯定雞豪真係鍾意咗人。
「屌！認真咩？臭雞你都鍾意？」聽到一半我忍唔住插嘴，質問返究竟發生咩事。
「咩臭雞呀，阿Wing係唔同㗎。」
「你真係唔識㗎喎，上次咪講過囉。」
「唉，佢上次唔知屙尿定爆石Miss咗呀嘛，我有提過佢話傾緊要嘢。」
佢哋一唱一和噉插我，講緊嘅係大埔海濱公園嗰陣。原來我喺幫Miss So期間錯過咗嘅秘密，就係雞豪鍾意咗人。
「屌，唔差在講多次畀我聽啦。」呢刻我就算本身幾傷心，都忍唔住要聽吓個故仔。
話晒雞豪以前開口埋口都係臭雞，宜家竟然會有暗戀對象。
講起上嚟，雞豪本身之所以咁憎女人，其實都係有段故嘅。
嗰陣我哋正值中三，係選修揀科嘅一年。
「嘉欣呀？你選修科諗住揀咩呀？」
「呃...應該揀地理？聽講幾易讀，另一科就未諗好。」
當年嘅雞豪......唔係，應該話嘉豪，仲係個血氣方剛、會鍾意女人嘅中學生。
而佢嘅暗戀對象，就係呢個叫做嘉欣嘅女仔。佢特登去試探嘉欣，就係為咗自己起碼有一科同對方一樣，噉升上高中就可以有多啲時間親近對方。
「嘉豪！數學3a嗰題你做咗未呀，可唔可以借嚟睇吓？」
「搞掂咗喇，不如我教埋你點做？」
「好呀唔該......你數學真係好犀利喎。」
「呢、呢題好易啫。」
毒撚性格內向，令佢同嘉欣嘅交流其實唔算太多。最弊後生仔總係特別衝動，佢可能係按捺不住心入面嘅青春慾火，亦可能係以為自己同對方已經好Friend。總之喺考完Final後，嘉豪就忍唔住同對方表白。
「你...你話咩話？」嘉欣個樣有啲驚喜，想向嘉豪確認一次。
「我...我話我鍾意你......你可唔可以做我女朋友？」
嘉豪趁住Lunch Time冇乜人，嗌咗對方出走廊表白。
「吓...哈哈，但係我同你唔係好熟咋喎？」
「我哋可以一、一路了解㗎嘛，我覺得你份人好Nice、同你又啱傾......」
「Sorry呀，你份人都好Nice嘅，不過我已經有鍾意嘅人喇。」
嘉豪事前完全唔知對方有意中人，隨即一面呆滯，但係佢亦心知肚明，明白自己收咗張好人卡。
「好喇，咁、咁我都祝你同佢......」
「嘉欣！一唔一齊去廁所？」呢個時候，班房入面走咗另一個人出嚟：「咦，你哋傾緊偈呀？」
「哈哈，唔係呀，佢搵我表白咋嘛。」嘉欣嗰啲語氣與其話係驚喜，不如話係輕率。佢其實對嘉豪一啲感覺都冇，所以一直保持笑笑口嘅狀態。
「吓，唔係呀嘛？嘉欣一早鍾意咗其他人喇喎。」嗰個女同學聽到之後捂住把口，好驚訝噉望住嘉豪講。
呢個情況未算尷尬......最大嘅問題係，女仔通常會成班人一齊去廁所。
「Wow——嘉欣俾人表白喎。」
「但係你哋有傾過偈架咩？」
「嘉欣你『執到』喇，仲唔快啲應承人！」
幾個女人你一言我一語，好快成條走廊嘅人都知發生咩事，佢哋個個望向嘉豪呢邊食住花生等睇戲，有啲仲細聲講大聲笑。
「哎呀，唔好講笑啦！係咪去廁所呀，仲唔快啲行！」呢個時候嘉欣開始覺得尷尬，忍唔住要拉大隊走人。
可惜一切已經太遲，佢哋走咗之後，其他人自然對住企喺原地嘅嘉豪起哄。
「掂喎嘉豪，佢點應你呀？」
「講經咩，你睇佢嗰樣就知食咗檸檬啦。」
「女死女還在呀，唔好咁傷心！」
面對湊熱鬧嘅同學冷嘲熱諷，嘉豪當然覺得無地自容，快快手離開現場。
所謂一傳十、十傳百，事後嘉豪表白失敗呢單嘢幾乎傳遍成級。令佢喺學期完結之前，周不時要承受同學嘅閒言閒語。
對佢嚟講，歸根究底都係因為嘉欣當眾公開咗佢表白。
自此之後，嘉豪就成為咗雞豪。
所有女仔喺佢眼中都變成臭雞，而佢亦會避免同任何女同學相處。一方面你可以話佢因愛成恨，另一方面佢又似係蒙上咗陰影。
到咗中四嗰陣，嘉欣順利同咗佢鍾意嘅人喺埋一齊。
偏偏嗰位對象，同佢哋一樣係讀地理。
或者其實唔係巧合，而係當雞豪為咗嘉欣選修地理，嘉欣都為咗佢嘅對象而選修地理。長期望住佢哋上堂打情罵俏，就好似喺雞豪嘅傷口上面灑鹽。經過一年時間，雞豪就算成續唔錯，最尾都忍唔住放棄選修地理。
噉究竟呢個視女人如臭雞嘅雞豪，係點樣重新踏上暗戀之路？
喺我三催四請之下，佢終於肯講多次我上次錯過咗嘅故事。
因為傷害佢嘅嘉欣，雞豪決定放棄選修，所以原定嘅上堂時間都變咗做去圖書館自修。
而呢段自修嘅時間，令佢意外邂逅咗另一個女仔。