男校病: 【2】

關於識女仔呢個問題，我以前會好關心，但而家就唔係好志在，因為話晒我自己都算係一個對感情專一既人。鍾意一個人既時候，唔會一心二用，更加唔會奢望要一腳搭兩船。

作為一個有膊頭嘅男仔，我梗係唔會做啲咁Cheap嘅野啦。

不過呢，同時作為一個讀engine嘅毒撚，冇女識到是常識吧！更何況媾呢！我地成班仔，一冇野做溫晒書做晒assignment，寧願一齊打多幾舖LOL、追多幾套新番動畫好過啦！

所以，識女呢家野係急唔黎，唔係你話想識就會自動出現，都係順其自然啦！

起碼我而家都仲享受單身既生活，唔似得啲人為左條女少少事都搞到冇左忽肉咁，都咁大個人啦，自己都識衡量投放幾多感情落去啦！有時人既野，認真你就輸架啦！





言歸正傳，點解我會無端端想寫一個關於我同佢嘅故事？

無他，都係為咗令自己個心過得安樂啲，有啲野就算你得唔到，可以響內心入面懷念一下，都未嘗唔係一件好事，起碼都叫對自己既一種解脫。

簡單啲黎講，只係自我安慰既一種方式姐。

呢個故事，就要從我中三果年開始講：

我本來一直係男校度過住啲好安穩既生活，無風無雨，無是無非。





真係歌都有得你唱架，「年少多好」，以前真係乜都唔使煩，只顧讀書同玩。

對於一個正正常常，但又介乎摺同唔摺之間既男仔黎講，平時最大既娛樂都莫過於同一班同學去街場打波，weekend出去睇戲，平時放左學去網吧打機咁，同其他男仔都差唔多。

我冇乜嚐好，除左打機上網之外，乜野課外活動都冇參加，其實都幾寡。

而我運動就唔算叻，體能麻麻地，跑幾下步都會氣喘，但大家都依然好就我，因為大家都覺得無論玩咩都好，都係just for fun姐！

我果時都係度諗：其實平平淡淡咁都幾唔錯呀，起碼我享受呢種生活。





之不過，呢一段平淡乏味既日子唔係維持左好耐，就比一件事既發生，令我風平浪靜既中學生涯頓時激起千重浪......

「阿泉，你尋晚有冇上Facebook睇呀？」

有一日，小息果陣，同我同班既小學同學阿輝，突然走過黎同我講。

我同阿輝，小一識到而家，以前都老友鬼鬼，不過自從升埋上同一間中學之後，我同佢就冇以前咁熟，因為我同佢都有各自既圈子。

佢少有地煞有介事，仲有啲難言之隱。

我就問佢咩事：「有咩就唔好吞吞吐吐，直接講啦！」

「小學班人話要搞gathering喎！」

「所以呢？」我反問。





「我地升左中學三年，一次gathering都未搞過喎！你唔會好驚喜既咩？」

「咦！係喎，講起又好似真係未搞過。咁大家都想見下面，想搞好正常既姐。」

等我仲以為有咩驚天大新聞，原來都只係碎料一單。

你或者會問我，乜我唔會掛住班小學同學咩？我掛，不過又唔係太擺係個心度，因為人生唔同階段，就會同唔同既人相處，佢地都只不過係過客黎姐。

我再問佢：「咁而家有幾多話個想去呀？」

「十幾個咁啦，我地B班既好多都會去。」（我地小六讀6B）

「阿峰、阿瑋果啲去唔去？」





「佢地未覆喎......」

呢個時候，佢托一托副毒撚金絲眼鏡，露出一個奸詐既笑容，細細聲同我講：「有邊個去都唔重要啦，乜你唔係最想見到阿...邊個....咋咩？」

我唔係好知佢想點，佢又講到一舊舊咁，於是我再問：「下，咩邊個呀？」

「你唔好扮晒野啦，其實我地好多舊同學，都知道你對佢有feel既！」佢話。

「邊個佢姐！」

「阿敏呀。」

「阿⋯⋯阿敏！」

係呢個時候，我聽完阿輝講呢兩個字，成個人好似突然間比一度電打通左任督二脈咁，成身軟晒。





阿敏，就係果個傾倒眾生既靚女班長，人稱小學三大校花之一。平時有啲男仔會對佢無事獻殷勤，有啲仲懶係親切咁，幫人地改左個花名叫敏敏。

「喂～敏敏～」

聽落都唔知點解會有陣狗公味。

自從佢中學入左間紅磚牆女校之後，我就一路都冇同過佢聯絡。

果陣時，雖然我地都係小學雞，但係對住靚女，我地潛意識地都係會起痰，因為佢真係好pure好true！尤其係佢笑果下，谷起個小酒窩，實在太可愛啦！

其實唔只我一個人，班入面仲有幾個男仔都對佢有意思。

只係，見過有人嘗試向佢表白，點知最後食左檸檬，個個就即刻淆晒底。





就係咁，三年已過，佢只能夠成為我地記憶中遙不可及既女神。

我地唯一打聽到番黎既，就係佢而家係學校排球隊成員，估唔到佢搖身一變成為運動健將，真係打得又睇得，而我對運動女就情有獨鍾，佢係我心目中，又加晒分。

「喂喂喂！」阿輝講。

我回過神，就問：「岩岩講到邊？」

阿輝搭搭我膊頭，好似有好野明益我咁，話：「阿敏都去喎，你無理由唔去見下佢架！」

「順便......睇下有冇機會同人地增進下感情呀嘛，哈哈！」阿輝又笑。

「去，我幾大都去啦！」我強裝笑顏，其實心入面一路掩住忐忑不安既心情。

事關我太耐冇見過佢，我怕自己會緊張得滯，失晒方寸。