男校病: 【1】

大家好，我叫江子泉，啲人通常都係叫我做阿泉，今年十八歲。

舊年呢個時候，我都仲係一個平凡既中學生，同A Level搏殺緊。

眨下眼，而家已經讀緊三大engine。除左有好多好煩既assignment要做之外，我每日就係柄埋自己係屋企做宅男。除此之外，關於我既背景，就只能講到呢度。

同有啲巴打一樣，我足足讀左七年男校，係七年！係呢咁多年入面，我識到一班可以出生入死既好兄弟，我地亦經歷左好多難忘回憶，亦玩到好多人地男女校玩唔到既野，有時仲玩到好癲好變態。





放心，我唔係講緊兩個有柄既人點樣係男廁裡面論劍，因為我係直既。

講到真真正正去玩人，男校都當然唔少得Happy Corner啦！我地最多都係人地生日果陣con下人咁既姐，務求玩到受害者面容扭曲，點到即止。

可能係嚮男校朝見晚見既都係一班男仔，搞到我之後每次見到女仔，都好怕羞，完全唔識得搵話題，可能係因為冇乜實戰經驗，簡單啲黎講，我係某啲人所講既毒男。

最諷刺既係，我對住班仔就一啲事都冇，傾乜都得，同個正常人冇乜分別，但一對住女，食晒螺絲，口疾疾，頻頻出醜已經算啦，仲要令班女仔對我既印象差晒，唉！

其實關於我中學所發生既往事，我都唔想回憶咁多。





中學，對我黎講，係一個悲喜交集既地方，係呢個社會既縮影裡面，我睇通左好多野，但呢啲都唔係最重要。

同好多毒男一樣，我地有一樣野永遠都恨唔到，就係讀緊中學果時，可以著住校服拍拖，好似啲MK咁，一放左學就同女朋友拖住手行街街，無視身邊行人既奇異既目光，雙雙墮入屬於我地自己既二人世界。

你問我，其實有冇拖拍係咪真係咁重要？我會答，其實唔重要。

只不過係，我都係一個寂寞難耐既小男孩。太耐冇掂過女仔，個人真係會痴左線。

見到人地有女既時候，內心就一臉葡葡，然後自己就想唔執輸，拿拿林搵番件同自己班朋友示威。





果陣時，我真係成日幻想自己可以拖住條女，然後係班friend面前好自豪咁同大家講：「邊個仲話我毒！」

當然，梗係到頭來連女隻手都未拖過啦！

而家諗番起，都真係幾幼稚。

就好似我地呢啲毒男，識女就只為希望溝到佢，根本就唔會諗同佢夾唔夾，亦唔會了解佢鍾意啲，一味只係諗住佔有佢。

或者所謂鐘意佢，都只係貪佢夠可愛，夠靚女，但從來冇欣賞過佢其他優點同內在美。

但係有時人就係咁犯賤，明明唔想提起以前既傷心事，但係屈住收埋係心入面，又會唔舒服。屈住屈住，最後咪只會搞到自己一身傷。

我相信每一個男仔既中學時期，都會有佢地既心儀既對象。之不過，我地都好清楚自己有幾多斤兩，人地對你又有冇感覺。





所以，基於咁多因素之下，我地最後決定保持沉默，唔選擇踏出表白既一步。唔講出口，係因為我地都好怕會係女身上收卡， 費事陣間連朋友都做唔成。

而收左卡，呢段「女神同兵」既關係，亦都會告吹。我亦都唔會再搵我既女神。

唯一既女神冇左，雖然可惜，但呢個世界，一半係男人，一半係女人，要識女其實唔難。

所以我而家好相信，緣份唔到，你唔係人地心目中果一類人，你點一廂情願強求都冇用。

你或者會問，人地可能唔介意你去表白呢，仲會轉過頭釋出善意同你做friend。

係，會有啲懂人情世故既女會唔介意，之不過，你係呢個moment，你好可能就已經選擇自動退出，寧願比返個下台階比自己，因為你都想大家都好過啲。

係呢度，我想同大家講一個，關於我暗戀一個女仔既故事。

一個暗戀左佢六年既故事。