【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 終曲——未完的結局
作者榜九位釋出。
呢三隻嘢明顯已經係醉到失去理智，妳估妳哋實贏嘅咩，而劍冰就一副老江湖咁嘅樣喺度擰擰頭，聽聞D1啲人仔玩得好癲，睇怕都…
頂！個火鴨絲炆米點解可以咁好食嘅。
點鬼知班小魔女真係連輸咗六七鋪，而傻強都只係輸多咗一鋪，今勻真係出事喇。
強：「頭先…邊個話輸咗要裸泳呀？」
咪最興奮嗌得最大聲嘅小魔女A，即係最靚女可愛似瀨川音符嗰位平胸妹妹，佢個樣即時變晒，塊面紅上加紅。
「乜喎…係你哋輸先要罰咋嘛…」
豪：「但無話妳哋輸唔使罰喎，只不過任妳哋定罰則咋嘛。」
強：「係囉，你重話好呀！輸咗，就要裸泳，係妳自己話好，妳兩個姐妹都聽到，而家咪妳輸咗。」
呢兩條友…讀書成績唔差，做乜都死剩把口，我對住佢哋都頭痛，音符妹妹而家真係有口難言，所以呢，做女仔真係唔好亂咁飲酒，講嘢都最好小心啲…只不過，女仔講唔到嘢啫，隻眼可以出水㗎嘛。
我：「詩敏，不如妳去制止下佢哋啦。」
敏：「由得佢哋啦，又係佢哋自己玩得咁興奮。」
彤：「嗯…妹妹仔唔撞過板唔識大個女…」
曉彤，妳係咪講緊妳自己？同埋，點解妳坐咗喺詩敏隔籬嘅…
「喂呀…你哋整喊人喇…」
豪：「重好講，裸泳又係妳哋提出，睇乜鬼雞雞呢…而家害咗妳哋個姐妹喇。」
強：「哎呀，最多唔睇妳囉，落到水自己除咗游個圈咪算囉。」呢啲係咪叫讀理科讀壞腦？
「唔好喊啦，最多我幫妳哽咗佢代妳受罰嘞，俾人望兩嘢又唔會少咗忽肉嘅。」原來咁睇得開…
當個女仔想喊，有時已經唔關個原因事，要喊就會喊，尤其係當飲完酒。
豪：「好喇！當我錯，小弟賠個不是，我自㨃！」
豪氣干雲嘅肥豪單手攞起個酒樽，一飲而盡；妖，咪扮嘢啦，嗰度頂晒龍咪得嗰半杯…不過好似好咗少少，音符介符於喊與唔喊之間，可能諗緊…
呢個時候上埋最後嘅官燕同美點雙輝…個侍應急急腳放低啲嘢就走人，應該唔想睇到我哋喺度癲。
豪：「師妹妳估下，我可以一口氣食到幾多塊核桃酥？」睇嚟你哋個腦嘅極限就喺呢度。
我：「喂！咪玩食物啦，下世做非洲小朋友㗎。」
豪：「你最無資格講呢句嘢，係咪要同我鬥多？」
我：「你都黐線，我唔想你搞到我無得食咋。」
有十四塊，我同一鳴，易等冰伉儷各攞一塊，其他人應該都無興趣或者食唔落。
而音符諗咗一諗，做咗個六嘅手勢出嚟。
豪：「咁睇少我？」
音符就加多兩隻手指出嚟。
豪：「妳信唔信我可以一次過食晒十塊？」
音符堅決咁擰擰頭。
講真吖，我覺得結婚搵佢呢啲做兄弟就啱，係驚佢玩下玩下玩埋其他兄弟啫，都無譜嘅。
然後個低B仔就逐塊逐塊將啲核桃酥放入佢個血盤大口度，呢啲點心核桃酥其實好細塊，我諗我都放到七八塊，大概半分鐘到佢就放晒十塊核桃酥入個口入面。
詠：「唔準浪費食物呀，要吞晒落肚先當你贏。」
豪：「啞嗯嗯。」BB話嘅『梗係食』。
跟住佢就開始活動上下腭，慢慢將口入面嘅酥磨碎，真係睇到都戥佢慘，唔識氹女仔唯有硬食啦，雖然我都數唔到以前自己硬食咗幾多次。
敏：「傻強，講個笑話嚟聽下。」
強：「詩敏，好好玩咩？我唔覺囉，噴餅碎一啲都唔好笑，我唔會中計，一係妳過嚟講。」
係人都知呢兩隻game要溝埋玩，我笑點低，聽到餅碎兩粒字已經想笑，肥豪繼續努力緊但就見到佢個肚喺度震下震下。
冰：「見你食得咁辛苦，不如幻想下嗰十塊係鮑魚酥而唔係核桃酥。」
敏：「鮑魚就梗係臊㗎啦，要點乜嘢汁食？」
強：「停呀！再講就舐撻㗎喇…」
旎：「點喼汁！」
強：「嘩！屌…」唔使講傻強已經滿身滿面餅碎，再狼狽咁跑咗去廁所善後，我諗嗰度有兩塊嘅量。
「哈…哈哈…哈。」音符終於識笑。
曾經有句廣東話口令係咁嘅，又喊又笑，烏蠅打醮，蠄蟧攋尿，老鼠行橋…好配合此情此景。
最後肥豪都成功將口入面僅餘嘅餅吞晒落肚。
豪：「嗱，笑返就唔準再喊㗎喇。」
「低B…唔喊囉…」
豪：「唔使喊㗎，裸泳只不過係與天地並生，與萬化冥合，唔需要覺得羞恥。」真夠堅持…
「乜喎！我喊係因為我無嘢畀你哋睇咋嘛！」
吓…乜原來係咁？好似唔應該係咁㗎喎…
算，唔理喇，你哋慢慢玩；見詩敏食緊官燕我又攞碗嚟食，雖然幾好味，但我從來都唔明點解呢碗同腐竹雞蛋有九成似嘅嘢要賣幾嚿水。
彤：「喂！做乜搶咗我碗燕窩呀？！」
我：「妳都飲到醉晒食乜都無味啦，益下我…」
彤：「攞返嚟呀，賤人！」喂！咪箍我條頸！
敏：「你兩個慢慢爭，唔好撞到我！」
好似少咗個人？一鳴去咗邊？佢…挨住Wing姐膊頭喺度喊緊…最後，我同一鳴劍冰三個埋咗張單，暑假就喺呢種瘋狂嘅狀態下落幕。
※※※※※
好似漏咗啲嘢？船P搞唔成？
搞係搞得成嘅，只不過我唔想重覆喇，尤其係今次我又俾人掉落水，雖然有一鳴陪我。
知喇！你哋想問我音符點吖嘛，肥豪傻強兩個揀咗套白色橫身窄窄地中間有個金屬圈嘅比堅尼畀佢，算係幾啱佢嘅身型；而佢真係無食言走去船頭望住個海解開件泳衣跳落水，當然之後旖旎就即刻執返嗰兩塊布跳落水幫佢著啦；至於個窈窕嘅pat pat喺陽光底下有幾靚就自行想像。
※※※※※
敏：「喂！作死你呀，又話接我返學，你竟然要我喺自己樓下等你？！乜嘢服務態度呀？係咪今時今日唔使做兵就惡喇？」
我：「唔係…暑假玩得太癲，一時唔知醒…」
敏：「有幾癲呀，咪又係同我扑嘢，行啦，我唔想遲到呀，喂…咪住，你個書包好似少咗啲嘢咁嘅？」
我：「呀，少咗啲乜吖？」
於是我又望一望詩敏個書包，哦！原來係呢個！
我：「放心啦，我一直都放咗喺書包入面，唔記得掛返出嚟咋嘛，嗱，妳睇下。」
敏：「信你呀，擺到明係嗰陣時怕咗曉彤臨急臨忙塞落書包，之後就完全無咗件事咋嘛。」
我：「唔好拆穿我啦，女神。」
新嘅學年，又係新嘅故事，新嘅開始。
新·►♂學校女廁的激情♀◄正文全文完