【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 要將冰山劈開
205k釋出
我擰轉頭一望，見到專搞事嗰兩隻嘢。
我：「你兩隻嘢嚟做乜呀？」由於無諗過會有其他人嚟睇我比賽，所以我都有啲O嘴。
豪：「嚟睇你打波囉，唔通睇你揸波咩！」
強：「我以為你打乒乓波俾人謴咗嚟㗎咋。」
認真九唔搭八，讀到A level都重係咁嘅款，難為詩敏要同佢哋上堂日日都對住佢哋。
我：「妳叫佢哋嚟㗎？」
敏：「我…無呢啲咁嘅惡趣味嗜好。」
我：「你兩隻嘢大拿拿畀成嚿水嚟睇我打波？」
豪：「梗係啦，唔通你請呀？」
都好嘅，難得咁耐無見過佢兩個，暑假出嚟聚一聚都唔錯，如果打完比賽之後我重郁到嘅話…唉，不過越多觀眾就越大壓力，一陣嗰場又肯定係苦戰嚟，我唔想輸畀呢兩條瞀俚睇。
我：「做乜唔早啲嚟呀？頭先女甲女乙好好睇喎…」
入場費一百蚊其實就可以入場由朝睇到晚，對於唔係鍾意羽毛球嘅人嚟講我唔相信會有人咁無聊，但入嚟淨係為咗睇一場一粒鐘嘅比賽確實又係戇居，而且女雙真心好睇就係人都知。
豪：「頂，你估我唔想咩，啲女人話要行街先，等咗N耐先集合到，我又費事一個人入嚟先…」
強：「屌！咁我咪蝕晒？做乜無人同我講㗎？我要睇乳搖呀，死人肥豪賠返一嚿水嚟！」佢一路講一路A咗幾下輕拳落肥豪隻手臂度，然後所有攻擊力都俾肥豪嘅HP完全吸收晒。
吓？女人，乜嘢女人呀？唔通呢兩隻嘢溝到女？按道理無乜可能㗎喎…明明我喺學校都無聽到乜嘢風聲；但又好難講，畢竟我要顧住考會考，四月到而家都已經過咗三個幾月。
敏：「得喇…一陣實有得你睇。」
詩敏妳使唔使咁大方呀？雖然妳係的確阻止唔到身體嘅搖動，由中一開始已經係。
強：「厭咗喇，唔睇，我要睇新女！」
敏：「撩架打呀！仆街！」
唉，身為一個局外人，我都好難知道佢哋而家幾個一齊上堂係會乜嘢德性…
詠：「詩敏！」
嘩，一聽到聲淫Wing已經跳埋落嚟賽場攬住詩敏，你哋係咪真係暑假太得閒無嘢做…
敏：「Wing，妳真係嚟睇我比賽呀？」
詠：「梗係啦，點可以唔嚟支持妳喎！」
就喺佢兩個姐妹情深緊嘅時候，重有一堆識嘅人魚貫咁入緊嚟…一鳴，曉彤，Tamama，重有…另外三隻小魔女；Fuck，點解會咁多人㗎？！
我：「你哋使唔使咁墟冚呀？」
豪：「梗係要啦，唔係全靠Tamama你兩個邊有得修成正果？快啲拜下個扯皮…唔係…係扯紅線嘅月老先。」肥豪一手捉住Tamama衫袖摵咗佢過嚟。
T：「志華，詩敏…好耐無見。」
我：「喂喂…我幾時講過我哋已經修成正果呀？」
豪：「你唔使唔認喇！旖旎已經出賣咗你兩個！」
旖旎…真好嘢，又係一個八婆，我都懶得諗係用邊條路線傳到去肥豪佢哋度喇…重以為係曉彤添，不過心諗曉彤而家應該唔會無聊到同其他人談論我哋至係；不過知道咗都好嘅，唔使我再多花唇舌嚟同佢哋講啲乜。
我：「Tamama你今年成功表白未呀？」
T：「未…未呀…」
自從我同詩敏俾全校炒花生開始後，Tamama表白未已經變咗做我間學校嘅一個梗；例如有人問你，就考試都重唔溫書？又或者，你又話要追隔籬班嘅班花，幾時追到手？你都可以用一句，Tamama都未表白嚟回應…聽聞間唔中重會有啲唔同form嘅女仔三唔識七走嚟問佢表咗白未，然後再問佢使唔使而家幫你手，搞到佢塊面紅晒之後就會笑瞇瞇咁走咗去…
一鳴曉彤加三隻小魔女就坐咗喺旖旎隔籬，一鳴同我揮手say咗個hi，其他嘅嘢心照啦，都唔知有幾耐無見過一鳴同Wing喺同一個場合出現，不過都過咗成年應該唔會有嘢喇掛。
豪：「喂，你個廢J，點解你係打呢個場而唔係嗰邊嗰個場㗎。」
因為冠軍戰同季軍戰係一齊開波，論fans一定嗰邊多，為睇波就梗係睇嗰邊，啲乜鬼校園記者，影相佬，風頭躉都塞晒過去；兩邊場對比都好大下，季軍戰呢邊嘅觀眾明顯地係疏落好多，而嗰邊就甚至有人寧願企喺樓梯。
我：「我想㗎咩…呢啲純屬抽線問題…」
豪：「渣就渣啦，要靠抽線先贏即係水皮啦。」
雖然個死肥仔講嘅係事實。
強：「嗯，計我話一定係佢佗累詩敏。」
我：「你兩隻嘢到底嚟做乜㗎！」
我差唔多想一手一塊拍打落佢兩個塊面上。
敏：「喂！唔好玩喇！就開波！」
如是者我就俾詩敏捉返去個羽毛球場上面準備，今日嘅對手就係牛皮糖組合，頭先睇過張入場單張，個男嘅叫做重壑，女嘅就叫做劍冰…搞乜鬼，睇名都輸晒，一個冰一個壑，又硬又冷又靜，打極都打唔郁咁；唔理喇，反正一個鐘之後就知生死。
話時話，佢兩個會唔會打混雙打到上床嘅呢？一條條寒冰插入溝壑入面，會唔會係咁樣？
開波前同佢哋握手嗰陣，佢哋係毫無表情的。
然後就係開波，邊個開先都分別不大，因為佢哋一定會用拉吊戰術，詩敏有傷突擊能力減弱，基本上可以肯定呢場比賽有排磨，只不過論磨嘅話幾乎可以肯定我哋會處於下風。
第一球阿冰試探性咁開咗球高遠球過嚟，我都輕描淡寫咁切返過去；幾乎可以肯定只會有兩個可能性，一係放網畀詩敏接，一係挑返個高波嚟後場畀我；如是者，我哋就不停喺高遠球，切球，挑球，放網四者來回做前後場調動；比較唔同嘅係佢哋幾乎完全左右分工，兩個人都只會前後移動；而我同詩敏就斜式擺位，加上對手控球技術甚佳落點刁鑽，好多時要左右跑晒全場嚟接波，尤其係對面極鍾意不停挑左右後場跑到我成隻嘢咁…
喺敵不動我不動嘅情況下，我哋嘗試同佢鬥磨；主因係知道佢兩個防守能力好強，就算我喺後場強行發炮都隨時只係俾佢哋消耗體力，到時優勢又無體力又無就可以唔使打直接棄權。結果我哋每一分都要打成十幾拍先分到勝負，互磨下我哋就好似沖繩刨冰硬撼萬年冰川咁，打極都都唔郁呢對冰壑組合；喺呢種沉悶嘅交戰策略下，我哋意志越見消沉，反觀佢兩個就好似樂在其中咁，不過都仍然係面無表情嘅；當然啦，因為佢哋已經領先到十一比五，嚟到中場休息。
我都懶得望上去睇啲同學乜表情，因為分數差距有啲大，實在唔係幾好意思，但一般人又點會明白我哋呢啲唔係打開大賽同佢哋呢啲D1球手嘅水平究竟係差幾遠呢。
敏：「嗯…再係咁打一定輸。」
我：「會唔會我哋轉埋左右企好啲？或者可以減少我哋嘅體力消耗。」
敏：「人哋呢個打法係練到專業水平，你覺得臨時照抄有無可能贏到佢哋？」
我：「睇怕就微乎其微…」
敏：「咪係囉，所以我哋都唔好打得太君子喇。」
我：「即係點？有乜奇招可以用？」
敏：「欸…奇招就無，但你就唔好太斯文喇，我希望你可以唔好理對面嘅打法，狂野少少…呀，唔係，應該話係將你嘅野性全面咁釋放出嚟。」
我：「可唔可以唔好咁抽象？」
敏：「即係咁，就好似你呢個低B仔咁，日日抽計數機手氣黑到爆，剩係識每日接我返學放學，死忍爛忍日日食車仔麪，獻殷勤，同我磨落去等我應承做你條女你都係唔會成功的，只要我前提並唔係要迫切咁同你喺埋一齊，因為有個低B仔會成日喺女廁度畀我玩。」
我：「點解妳唔早啲教我應該點溝妳呢，女神大人？」都幾荒謬，打打下波就謦兒女私情，不過我哋而家落後緊，確實對舒緩緊張心情有啲幫助。
敏：「你呀！無鬼用，要個心儀女仔教你點溝佢，你重係咪男人嚟㗎？！」
我：「講下笑啫…而家。」
敏：「曉彤咪一早教咗你囉，搵個機會㩒我落床，等我反抗唔到我咪係你女人囉。」