【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 積極備戰
QQ900k釋出
我到而家都唔太明佢點解會對我動情，亦唔覺自己有啲乜長處係非我不可嘅，有時總覺得我同佢可以喺埋一齊只係一場鬧劇。唔諗喇，諗嚟都無意思，可能就好似阿媽講咁我哋咁細個嘅戀愛同玩泥沙都無乜分別，專登見家長都嫌嘥時間。
不過，可以同詩敏玩一世泥沙，我願意。
沖完涼出返去，都要關心下佢哋搞緊乜。
咦，唔見人嘅…老竇對住電腦做嘢，唔好打搞佢。
然後我發現咗詩敏同阿媽喺廚房入面，詩敏對住個爐灶唔知喺度整緊啲乜嘢。
我：「喂…妳喺度整乜呀，唔好阻住阿媽煮飯啦，約咗人打波㗎，妳想留個災場喺度呀？」
媽：「唔覺喎，佢好熟悉呢度個架步，點睇交個廚房畀佢都安全過交畀你好多。」
我：「媽妳唔使煮飯咩？」
媽：「我條石斑喺蒸焗爐入面游緊水，煲湯喺度煲緊，重有鑊菜煮緊，估唔到個四頭爐有生之年可以用到三個…佢話你唔食得飯，要特別炮製你喎。」
我：「點解我唔食得飯呀…」
敏：「你食到滯晒重邊有力打波呀！同埋你要減肥呀！」嗰兩公斤就…放過我啦。
媽：「聽新抱仔話啦，放心，你嚟緊兩個禮拜都唔會有飯食。」點解妳兩個係同一陣線…
敏：「重有唔好俾佢落大家樂食焗豬呀。」
我：「咁我嘅人生重有剩嘅，鋸扒得喇掛？」
敏：「得，但要受到嚴密嘅監視，酥皮湯塊皮唔準食，啲意粉食少少好喇。」
媽：「我哋返咗工無人看住佢㗎喎。」
敏：「放心啦，佢打完波前都唔會走得出我手指罅。」佢一路講一路喺雪櫃拆咗兩塊和牛漢堡出嚟煎，完全唔覺得佢係喺人哋廚房煮緊嘢。
媽：「咁仔仔就拜託妳喇，妳要幫我教返好佢。」
妳兩個玩夠未…此地不宜久留，我都係出返廳等開飯算；諗落又係，佢哋嘅興趣都係搵我嚟尋開心，點會謦唔埋吖；不過咁樣都唔等於我阿媽會鍾意佢，老狐狸諗乜唔係我哋小朋友估到。
詩敏都真係好快手，佢整咗兩大碟芝士蛋卷，加上面一大塊漢堡扒；問題係，食呢啲嘢點可以無飯㗎，點解妳哋唔明做完運動之後大啖大啖咁扒啲白飯入口係幾咁快樂。
其實一定明，因為越快樂等於越墮落。
呢碟嘢我諗落咗成四隻蛋都有，咁唔會唔飽嘅，只係唔太慣無澱粉落肚啫，同埋或者由於佢只係落咗好少油，所以就唔係太滑。
我老竇一路食飯，一路眼甘甘咁望住我碟蛋卷…
爸：「可唔可以…分少少嚟試下…」
媽：「作死你呀，想同呀仔爭食！」老媽用兇狠嘅眼神嚟望住佢。
敏：「對唔住呀，志華爹地，我都幫你唔到。」
爸：「同妳打羽毛球，好難有得贏㗎喎。」
敏：「你都未見過我打，點解咁講呢？」
爸：「混雙嘅話…對面條仔好難專心望住對…唔係…望住個波。」
媽：「食飯啦，唔好講廢話呀！」
敏：「哈哈，我驚隔籬個隊友都分埋心喎。」
又唔會嘅，識咗妳六年，妳而家已經係我女人，要望都係等返屋企上到床先睇個夠啦。
食咗個蛋卷漢堡，加啲魚同菜，其實真係唔太飽；不過無辦法，佢係做得啱嘅，如果食多碗飯係唔使指擬打到波，公開賽嗰幾日有機會抽到中午飯後開波，都要認真諗下點應對。
敏：「多謝晒志華爹地媽咪招呼，我哋落去打波喇。」的確幾好嘅，短短個零鐘，唔使怕對得耐大家尷尬，不過睇怕驚尷尬嘅係得我一個。
媽：「詩敏，得閒就上嚟玩啦！」
爸：「妳唔喺度嗰陣人哋識上嚟玩啦，使鬼妳叫。」然後有隻母老虎追打公老虎。
我同詩敏喺度等緊（車立）。
我：「妳一早計劃好今日上嚟見佢哋？」
敏：「無喎，我都無諗呢啲嘢。」
我：「但點解妳會有手信準備喺身嘅？」
敏：「我係諗住畀阿文同旖旎㗎咋…呢度重有一半剩，你幫我一陣畀埋佢哋兩個囉。」
我：「妳畀咪得囉，反正係妳嘅心意。」
敏：「你係咪唔記得咗，佢哋剩係知你去旅行㗎咋。」又係喎…為咗唔刺激旖旎我無同佢哋講。
我：「妳乜都無準備就見佢哋，唔擔心㗎咩？」
敏：「佢哋個仔咁惜我，應該佢哋都會一樣嘅。」
我：「妳真係好勇敢。」
敏：「你夠乜都無準備就同我表白啦。」
我：「哈，因為根本無諗過會有結果，是但啦。」
敏：「唓，都唔知你嗰陣係咪鍾意我嘅。」
我：「唔鍾意㗎。」
敏：「而家先同我講，作死你呀！」
我：「因為嗰陣我根本無鍾意嘅人，只會諗妳就係我最想鍾意嘅一個，直至後來每一日慢慢同妳相處，對妳嘅感情先與日俱增，其實我中三個暑假日日喺度諗，我同妳好似大纜都扯唔埋，唔知自己係咪可以下定決心去追妳，覺得開學之後呢場鬧劇好快就會無疾而終，但有一樣嘢，一直喺我腦海入面揮之不去…」
敏：「我個下體？」
我：「嗯。」
敏：「證明我好成功。」
落到去會所，我哋又匿喺汽水機條堀頭巷入面攬埋一嚿熱下身；放心，唔會打野戰，只係重有幾分鐘等埋嗰兩隻嘢嚟開波。
我：「妳條裙入面係咪運動褲嚟？」
敏：「傻咩，如果入面係褲我就唔著裙啦，貪唔夠焗咩？」
其實平時條貼身PE褲已經夠晒性感，一般嚟講羽毛球褲係可以鬆少少同長少少，不過佢嗰條就接近女排褲咁，可能呢個係佢個人喜好啦，我就唔知道佢係為咗視覺效果定係運動效果喇；不過對我哋男仔昅嘢嚟講就各有各好，例如Tiffany嗰條開口夠大一拉筋就好易射穿入面條底褲。
我：「可唔可以揭開嚟睇下？」
敏：「我而家係你嘅人…你重問我…」
見完家長啫，唔使好似一副已經嫁咗畀我嘅樣呀…
於是我揭開佢條裙嘅前襬，入面係粉藍色嘅滑身運動底褲，雖然唔係性感嗰啲，但襯返佢個sport look就恰到好處。
我：「乜咁大對比呀…走光好揚眼㗎喎。」
敏：「有無擾敵效果呀？」
我：「睇對面係邊個啦，妳想益阿文呀？」
敏：「你覺得佢會唔會有反應？」
我：「佢…可能真係無，或者妳唔著衫打佢個表情都係一模一樣。」
關於呢樣嘢，唔係因為我同詩敏嘅關係喇，就算中四之前，佢都係極少講女人，有時啲女隊員坐喺側邊走光任睇佢都好似興趣缺缺咁，但我又唔覺得佢係基嘅，呢個人實在非常難捉摸。
「鈴鈴，鈴鈴…」
敏：「嚟喇，出去接你個小魔女入嚟啦。」
對於Tiffany，我幾肯定佢對我係有意思，只不過礙於有詩敏喺度，佢應該會一直保持住而家呢個樣…嗯，以我嘅態度其實佢應該要放棄嘅，但…唔通佢想等？等到詩敏畢業就有機會出擊？其實話長唔長話短唔短，詩敏出年三月尾就last day…
經過啱啱呢個零月，我同詩敏嘅關係可以話已經清楚明白，按道理打風都打唔甩，就連曉彤嘅手尾都已經搞掂晒；睇嚟我應該快啲同Tiffany講清楚，不過佢又無明確表示過啲乜，我唔想咁odd，而且佢呢一年咁照顧我，對我而言都係一個重要嘅朋友…嗯，但我唔會鍾意佢喇…下年睇怕都會繼續同佢同班，好大機會重有一鳴曉彤，我希望可以所有嘢都風平浪靜。
我認為，等比賽完之後令佢知我同詩敏嘅關係已經情比金堅就好；到咗而家詩敏應該唔會介意喺學校公開我哋嘅關係掛，唔會再要我扮佢隻兵呀化？
又，阿文師兄好似真係對裙底無乜反應，一副坐懷不亂，虛懷若谷，堅壁清野，清心寡慾嘅樣；反而我就留意到Tiffany隻眼珠有少少唔安定，會不自然咁水平轉來轉去。
兩粒鐘話咁快就過咗去。
旎：「志華，就放榜喇，緊唔緊張呀？」Tiffany走咗埋嚟我同詩敏嗰邊。
敏：「佢放榜又點同你放榜喎，兩回事嚟…」
我：「唔係呀，我真係緊張㗎！」
本來都唔記得，但一提起放榜兩隻字就諗起同Miss Lam嘅約定，而且我今年花多咗好多精神溫書，確實係期望自己可以攞到一個更好嘅成績。
敏：「你唔係廢到嗰一分都攞唔到呀，唔好同人講你識我喎。」女神用鄙視同不屑嘅目光望住我，我感覺到如果我再fail英文睇怕分手就唔再係一件空中樓閣嘅事情。
我：「我緊張，係因為我唔止想要呢一分吖嘛！」
敏：「係就最好啦，如果唔係我都唔知你放完榜重邊有心情打比賽…實累死我。」
我：「妳咁快…諗住打到入四強嗱？」
睇過賽程表，八月四放榜，放榜前有三圈，放榜後有兩圈，老實講我覺得打到頭三日已經叫交到功課…無乜諗過放完榜重有波打。
敏：「諗下唔得咩。」
旎：「不如我哋而家一齊研究下點揀科吖。」
我：「而家…欸…都得嘅。」
敏：「咁我同阿文走先喇，你哋畀心機啦。」
雖則我無諗住同詩敏繼續玩見家長遊戲啫，但係我都唔想咁快同妳分開㗎嘛。
於是Tiffany捉咗我去會客區度坐，不過佢唔多似係想問我嘢，而係將我頭先交畀佢嗰盒紫薯饅頭開封食得津津有味，誘惑當前就梗係…我都食返粒啦，如果俾詩敏見到實鬧鬼死我，但我真係肚餓。
我：「如果妳揀科有問題，唔係問佢兩個師兄師姐重化算咩？」雖然我係同班同學。
旎：「喂。」佢本來已經坐得夠貼，而家一嘢用膊頭撞落我個身度，奇奇怪怪咁望住我。
我：「點呀？」我有啲怕咗佢。
旎：「你同詩敏係咪一齊咗喇？」