【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 突如其來見家長

作者榜十五重大里程碑釋出


去完旅行返到屋企，唔多唔少都會俾屋企人審問下，不過佢哋個樣呢…就好似喺度奸笑，警告我唔好搞大女朋友個肚咁。
有時我都唔知佢哋係開明定點，一時就唔理我，一時就惡攪我，一時就危言聳聽，我有時覺得佢哋係悶得滯搵我嚟玩多過真係關心我。
我：「畀我抖下啦…我下個禮拜打比賽㗎喇…」
媽：「係喎，好似話你女朋友係你partner？」
我：「係呀，之前咪同妳講咗囉。」
好慶幸我而家可以光明正大用女朋友嚟稱呼詩敏，如果唔湯唔水我都唔知可以點同佢哋交待。
媽：「係咪贏咗就結婚喇？」


我：「咪玩啦，我中六㗎咋。」
媽：「唔緊要㗎，香港夠十六歲就可以結婚，等阿媽幫你簽同意書就得。」
爸：「係呀，下年拖住老婆讀中六，實型到爆，校長訓導都吹你唔脹，阿仔今鋪威晒。」
媽：「但最慘老婆係讀中七呢，哈哈哈哈哈！」
我：「唔好玩啦！你哋肯佢屋企人都唔會肯啦！」
媽：「哦，呢啲係禮金問題嚟嘅啫，添下添下就肯㗎喇，呀仔唔使擔心！」
我：「唔呀！唔結婚住呀！同埋都唔會贏到呀！」
爸：「吖，未打就知？乜咁陰功㗎咩？」
我：「我哋第一次打公開賽，志在參與下㗎咋。」
媽：「係喎，你都好似就放榜㗎喇喎。」


我：「放心啦，唔會有任何問題。」
媽：「諒你都唔敢，一陣老婆都走埋佬，哈哈…」
乖啦，求下你哋俾我早啲沖涼瞓覺…由於比賽時間係介乎朝九到晚五，所以詩敏話要同我set返好個生物時鐘，聽朝九點就嚟我樓下度一齊做gym。
喺沖涼嗰陣我終於得閒約人打波。
我：『Tiffany，我返到香港喇，聽日晏晝一唔一齊打波？』其實我有少少想佢話唔得閒，咁我就或者可以晏晝同詩敏佢去玩。
旎：『可以呀，幾點呀？』
我：『二至四啦，好唔好呀？』啱啱睇過有位。
旎：『OK，咁我幫你叫埋阿文啦。』
我：『唔該，乜原來你兩個咁熟㗎嗱？』
旎：『乜喎，話晒都係partner嚟吖嘛，同埋前幾日悶得滯我都約佢打咗日波。』


我：『哦，咁好啦，聽日見。』
作為partner，唔知佢哋會唔會有可能呢？不過阿文呢個異性絕緣體，睇怕就…其實佢唔係因為條件差所以絕緣，而係因為大家都知佢絕緣而唔黐埋去…喺佢唔主動嘅情況下，應該無乜可能。
到咗第二日，我九點正就去會所門口接詩敏，由於佢已經嚟過好多次，加埋咁靚女係人都認得，唔使我開門佢就已經入咗冷氣大堂度等我。
太好喇！日日都可以同女神見面，而且佢又著得超級正…其實唔係真係咁正，因為一開波我就俾佢虐待，先係十五分鐘stretching，然後五分鐘weight training，再嚟四十分鐘帶氧運動，完成後就再嚟多個循環，我開始懷疑下晝我重有無力打波。
結果我哋玩到十一點半，個人已經散咗一半，今朝餐早餐可以話無食過兼嘔突咗出去。
我：「妳去邊呀？唔使沖涼咩…」
雖然下晝打波又會周身濕晒，但總無理由而家身水身汗出去食飯㗎，女神就確實無乜所謂嘅，我就唔想自己成身臭汗俾成街人用歧視嘅眼光望住。
敏：「吓？我哋而家重喺度沖？梗係上你屋企沖啦。」佢一面理所當然咁講，用疑惑嘅眼神望我。
我：「今日…星期日嚟，我屋企人喺度…」
敏：「哦，原來你驚見家長。」佢重係一面精靈。
我：「而家上去係妳見咋嘛，又唔係我見。」
敏：「你係驚我見你家長？」
我：「我有乜好驚喎，妳又唔係不良少女，不過妳乜都無準備…而且我爸媽佢哋怪怪地㗎，唔知佢哋會同妳講乜，我都幫唔到妳。」
諗深一層其實佢中四五咁玩我可能同不良少女都相距不遠矣；不過睇樣呢，係唔會有人信佢玩埋啲咁嘅嘢，只會覺得我係一個變態鹹濕佬喺度蝦佢。
敏：「咁咪好囉，即係無得準備，是但啦，靚女終須見家翁嘛，差在遲同早啫，上去啦，都係兩個鐘啫，總好過夜晚先嚟私片。」


估唔到咁突然會無端端見家長，我就乜都唔想理喇，斷估佢哋唔會搞出個大頭佛掛；話時話妳有信心自己係靚女當然好事，都唔使咁快叫家翁呀？乜妳好心急要嫁畀我咩。
我：「妳OK未㗎？我開門㗎喇…」
敏：「OK！我諗好咗三分鐘自介㗎喇，中英文都得。」對於佢嘅信心我真係佩服得五體投地。
我棄療喇，乜都唔想理，你哋慢慢享受…
媽：「呀仔，你又話出街食嘅，做乜返上…」
敏：「志華嘅爹地媽咪，你哋好呀！」
佢差在未成隻兔仔咁蹦蹦跳入去。
媽：「妳…好…嘩！新抱仔做乜咁突然上嚟嘅？」
敏：「哎呀，伯母你咁叫我我會怕醜㗎。」
媽：「使乜怕醜，有妳做新抱實在係我哋屋企嘅光榮嚟！」
爸：「真人…靚女得太緊要！睇嚟我個仔對上嗰十世一定過得好陰功，所以今世先…」
敏：「嘻嘻，唔好笑人哋啦，係嘞，我哋啱啱喺沖繩返嚟，呢度有少少手信孝敬你哋。」
乜話？！乜玩法嚟？又話乜都無準備！點解可以無端端喺個運動袋入面拎咗一盒紫薯撻同一盒紫薯饅頭出嚟…
媽：「嗚！太感動，個衰仔去完旅行毛都無一條帶返嚟，好彩有妳咋，詩敏…」
我：「阿媽…妳明明話成個沖繩嘅嘢妳都已經食…」


媽：「呢個不肖子，睇嚟係時候要換過件。」
敏：「嗯，都係，攞去退換，換過個好啲嘅！」
媽：「太遲喇…已經過咗保養期，嗚嗚…不過，如果可以變個孫出嚟，我就可以唔使對住個衰仔…」
睇嚟，呢度無我存在嘅空間。
敏：「哎呀…咁快唔得呀，我未學識湊仔。」
媽：「湊仔好簡單㗎咋，等我教妳啦，不過…睇到我件失敗作可能我都係唔識湊。」
敏：「點會喎；係嘞，我可唔可以借個浴室嚟用下呀？」第一次見家長係嚟借浴室沖涼，實在係高端玩法，唔知呢個世上就有無第二例呢？
媽：「辛苦晒妳咯，身水身汗，快啲去沖涼啦。」
寒暄幾句之後，詩敏就入咗去浴室沖涼…
媽：「呀仔你臭肨肨坐喺度做乜呀？」
阿媽一路食紫薯撻一路問我，好似嫌我啲汗味會污染咗佢啲和菓子嘅美味咁，鍾意食又唔早講…
我：「我咪…等人哋沖完涼到我沖囉…」
媽：「做乜唔一齊沖喎。」
我：「咪玩啦，你哋喺度㗎…」
爸：「睇嚟我哋俾人嫌棄阻住佢嘅好事喎。」


媽：「睇嚟新抱仔成日上嚟沖涼咁喎。」
爸：「咁無理由淨係上嚟沖涼咁大嘥㗎？」
媽：「無眼睇…我去繼續煮飯…」
阿爸唔出聲，喺我面前打開咗包紅薯饅頭，明明…平時啲親朋戚友送嘅手信係擺喺度無人食放到等我攞嚟做晏晝…
我伏咗喺飯枱上面，瞇埋眼好快就瞓著咗，因為我唔夠瞓，同埋真係好攰。
等咗陣，詩敏喺浴室出返嚟拍拍我膊頭。
敏：「喂…起身喇…到你沖。」
詩敏換咗套衫，由啱啱嘅單車褲sport top鬆身T變成…我眼球凸咗一凸，平時個平實高冷純黑女球王去咗邊？佢竟然著住一條純黑色連身羽毛球短裙，漆黑嘅背景下有幾條鮮紅色嘅波浪紋做點綴，修身嘅剪裁使佢優美嘅身段玲瓏盡現，令我不禁吞咗一啖口水。
我：「妳…做乜換咗條裙嘅？」
敏：「打公開賽，人哋想靚女啲吖嘛。」
佢重要喺我面前㧻㧻手指，真係瞓著都俾佢搞到即刻扯旗，唔得，快啲入去沖涼冷靜下先。
我：「哦…我去沖喇，妳陪佢哋慢慢玩。」
確實我係唔想理嘅，平時對住佢哋已經無晒符，詩敏嚟到唔知佢哋點諗呢…嗯，諗返起曉彤父母平實好多，對住佢哋反而無乜壓力，應該一鳴都可以同佢哋相處得唔錯，大半年有多應該都見咗家長喇掛，不過佢兩個又好難講。
阿爸阿媽應該鍾意詩敏？女神又靚女，性格大方活潑，識同人講嘢，應該可以攞到佢哋歡心…其實好難肯定，兩老平時對住咁多人，又下屬，又律師會計師，又上線下線對家公司啲人，重有麻煩嘅客戶，睇嘅嘢一定同我好唔同，不過我又諗唔到詩敏有乜明顯嘅缺點。
要講嘅話就係靚得滯，靚到隨時可以飛咗我。