【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 仍能情深愛上
120k釋出
補充下個schedule先，下個禮拜五月中我就考中文oral，隔一個月六月中就考英文oral，七月尾開始打錦標賽，雖然無乜可能，但如果打到入決賽就係八月七號，而放榜就係八月四號。
嗯，無嘅…由而家開始到七月尾都係日日練波㗎喇，我同Tiffany考完試百無聊賴點打都得，反而係擔心詩敏同阿文喺學校有嘢忙，而且佢哋六月尾都要考校內試，話就話唔多重要啫，加埋詩敏有時重要同小朋友補習。
除咗本身星期三同五嘅校隊練習，教練都盡可能星期一放學book埋禮堂畀我哋，即係一個禮拜我至少都有三日會返學校；至於其他時間，就睇下Tiffany同詩敏會唔會想加操，係嘅我就book會所個場。
自從同詩敏打返波之後，我覺得自己心態都唔同咗，唔係指我同佢嘅關係，而係好多方面都係；個人思考好似清晰有條理咗，以前做卷好易做做下迷迷哋，但而家就睇清楚自己做緊乜，知道自己識啲乜，唔識啲乜，發揮成點，將每一分嘅精力都變成workdone，而唔係喺個腦入面迷思內耗；打波都係，以前成日隨心情而打，殺到high high地就殺得就殺，唔理嗰球係咪用殺最易攞分，又唔理個位置同角度係咪適合殺，會唔會易落網同out…總之，好多嘢都唔同咗。
我亦都知道，而家唔係同詩敏謦私事嘅好時機。
考完試到放榜呢個蜜月期，我重以為Tiffany會對我做啲乜，出奇地…係乜都無，除咗間唔中會叫我請佢食雪糕之外…就算我哋兩個喺會所練波，佢都無做啲乜奇怪嘢；而佢嘅技術亦都越趨成熟；唔計詩敏嘅話，我諗佢已經係我哋校隊數一數二嘅女仔，所以而家練波係好舒服，因為唔使就住嚟打。
或者…佢係放棄咗我？等埋放榜同比賽先？開學先放長線釣大魚？呀…點解我要自己攞嚟煩。
而我同詩敏呢，雖然無溝通過啲乜，但言談中我相信我哋已經有咗共識，就係等比賽完先再理其他嘢，只要我哋互相信任，心中有對方，現況係點其實唔太重要。
不過呢，同佢練完波，有時返到屋企都係要摷返佢條底底出嚟用一用，做下正經事；你都知啦，就算練波練到周身散晒，某啲器官都重係會有多餘嘅精力，我又唔係詩敏，唔會想聞住啲西米露味瞓覺。
話咁快會考就去到尾聲，就係英文oral，考完我都肯定自己可以合格；其實每次考前我都會特別留意下會唔會撞到一鳴同曉彤，雖然無法避免，但最好就唔好撞到正啦…如果…同佢哋是但一個考oral group discussion就…精彩咯。
敏：「喂，考成點呀？」
詩敏著住整齊嘅白色校服喺人哋學校門口接我。
我：「咪話咗唔使接我囉，喺商場等就得。」
今日佢約咗我去一齊買羽毛球鞋，商討下嚟緊啲練波時間點安排，同埋順便慶祝我考完會考食返餐晚飯；無錯，今日將會係我同曉彤出事之後同詩敏食嘅第一餐飯。
敏：「吖，對你好都唔領情嘅，真犯賤。」
我：「妳就考試吖嘛，怕你辛苦。」
敏：「我都係喺圖書館溫完書就過嚟咋嘛，學校嘅試理得佢啦，唔合格唔通要我留班咩！」
我：「嘩，乜妳而家咁曳㗎？留班…好呀！」
敏：「留你個頭呀，你係咪真係合格㗎？」
我：「做乜懷疑我…明明攞F重難過合格。」
敏：「我喺度諗，如果你繼續fail，或者你可以照升中六，出年考DSE，咁咪可以同我一齊入U囉！」
我：「哈哈，好好笑呀，妳好叻女呀。」
敏：「我認真㗎！你唔覺得有可能㗎咩？」
我：「我唔知，唔想諗…喂！下年邊有DSE呀！真空年嚟㗎！」
敏：「係喎…柒咗添…」詩敏伸咗條脷出嚟，想咬！
我：「為咗笑我，妳都越嚟越低B㗎喇。」
敏：「鬼叫你咁情聖咩。」
我：「唔好提喇…畀個書包我拎啦。」
敏：「哈，你憑乜幫我拎書包呀？」
我：「無話幫妳，想練下腕力咋嘛。」
我哋兩個肩並肩，由學校門口慢慢行到去巴士站，然後上咗巴士，佢去咗下層右手邊對望位嘅正向位坐喺窗邊，我喺佢隔籬。
唔知點解，呢種曖昧嘅感覺重開心過拍拖，好似以前乜都無發生過，重頭嚟過互相認識咁。
敏：「喂，聽唔聽歌呀？」
我：「好呀。」
唔知佢係特登定點，每次搭巴士佢都鍾意用電話聽歌，而每一次…都總會聽到啲令人心動嘅歌；就係咁，佢畀咗個右耳塞我自己戴落隻耳仔度。
咦…又係伊麪，乜咁啱呀？
上一次聽你嘅歌，已經係十個月之前嘅事。
「為何這樣 為何竟消失方向
為何心裡 消散是這道牆
沒法解釋失落失神
心裡邊 有點慌張
為何這樣 為何竟偷偷戀上
完全因妳 使我換了立場
逝去戀火如今再度高漲
感謝妳重新的把我欣賞
情令我愛我痛我感觸 不敢回想
舊日舊事舊創傷 改寫情感的方向
此刻人迷惘 無法自拔 跟妳戀上
回味與妳碰上再點起 初戀幻想
像是做夢又似真 只想能找到方向
感激尋回了 仍能情深愛上」
就正如我所諗…真係好應景…而正當我喺度細味緊啲歌詞嘅時候，巴士已經行咗兩個站，啱啱去到另一間中學停低咗。
…！
有兩個人嘟八達通上車，曉彤…跟住一鳴…
我同詩敏坐嘅位避無可避，結果我同曉彤嘅視線就相撞埋一齊，而喺佢後面嘅一鳴都發現咗我同詩敏嘅存在。
曉彤呆咗企喺度，我諗自己個樣都係相差無幾…一鳴就拖住曉彤行，轉咗去樓梯位行咗兩級，但…曉彤並無跟住郁，喺樓梯口度企到定一定，定睛望住坐位上嘅我同埋詩敏，伸長咗隻手拉扯住梯級上面嘅一鳴。
曉彤放開咗隻手，向我哋行過嚟，再坐埋喺詩敏對面。
彤：「…敏…」