【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 心意難測的女人
QQ300k釋出（下）
旎：「唔知我哋重有無機會做同學呢？」
我：「過幾日補課咪繼續做同學囉。」
旎：「唔係呀，我指正式嗰啲呀。」
我：「我一定會升返原校，想做同學拜託妳唔好因為打波而溫少咗書，所以到考完會考之前妳都唔好嚟搵我哋練波喇，知唔知？」
旎：「咁你呢？一路考一路練呀？」
我：「有乜問題，考完咪星期三五返嚟繼續打囉，嘻嘻，讀多人哋一年係霸道啲㗎喇。」
旎：「真係好過份…係呢，補課你會唔會同我坐呀？」順帶一提，聖誕後掉位我同佢姐妹坐。
我：「我…又有乜所謂，妳唔怕妳姐妹唔開心咩。」
旎：「佢點會喎…係呢，其實你覺得我點？」
扭計，扭雪糕，鍾意整蠱人，奇奇怪怪，曳細妹。
我：「有乜點…唔知妳想講邊方面。」
旎：「男仔會唔會唔鍾意我呢啲？」
我：「…，唔會嘅，妳唔使太擔心…」
旎：「我咁大個女都未俾男仔追過…」
其實…我真係明，雖然係好女仔，但樣貌唔出眾，動作唔起眼，喺中學呢個大部份人都未拍拖嘅環境，通常都唔會咁快俾人睇上，膚淺嘅男仔梗係搵個靚㗎啦，如果唔係我哋幾個搞到滿城風雨，我相信詩敏到而家一樣大把男仔追求。
我：「咁…中學生無內涵㗎嘛，個個都追女神，想要個靚女女朋友…所以咪…咁囉，唔使介懷，呢啲男仔唔係好東西…」
旎：「你中三同詩敏表白時都係咁？」
我：「算係啦…但，我嗰陣根本就從來都無諗過要同佢表白，或者同其他人表白；我唔認識佢，唔認識自己，亦都唔知愛情係乜，剩係知道佢係一個靚女，因為一齊打羽毛球有啲熟；可以話係一塌糊塗。」
旎：「咁而家呢？」
我：「而家…就算見唔到佢，聽唔到佢把聲，摸唔到佢，唔可以同佢一齊，佢喺我心入面嘅地位都唔會變。」
我好清楚，就算做兵嗰陣我都唔係真心愛佢，當時嘅自己應該愛初音重多過愛佢，而我為初音心動嘅原因都唔止係因為性…所以，先會有背叛女神呢件事嘅發生，直至而家我都好後悔呢個決定傷害咗兩個女仔，令到佢哋決裂；所以家下我敢講，無論天跌落嚟我都唔會再背叛自己個心，我同佢係乜嘢關係根本唔重要。
如果要講返由邊一刻開始深愛詩敏，應該就係曉彤昏迷嗰陣，我同佢一齊坐喺病床兩邊溫書時開始。
旎：「你…會唔會覺得我無波？」旖旎帶住一絲哀愁嘅眼神問我。
我：「唔使覺得…有眼睇到，唔係無嘅…重有得發育，好快就有B，信我…」
旎：「哼…十分專業，非常眼利…如果，會考科科好似自己心口咁就好。」
如果係咁，詩敏睇怕可以唔使讀中六…
我：「唔係個個男仔都鍾意大波嘅，小巧玲瓏都有市場㗎，每個人口味唔同。」
旎：「小巧玲瓏好似係包埋精緻，嬌俏，可愛，柔嫩嘅意思喎…你覺得我係咩？」
我：「唔好咁諗啦，妳其實好好。」
旎：「如果我同你喺荒島，你會唔會同我一齊？」
我：「咁我都…無理由有個女仔喺前面…日日打飛機㗎…」唔好迫我啦，小妹妹…
旎：「我好驚一個男仔唔鍾意我…」
我：「未必嘅…唔使咁擔心。」
旎：「如果我表白，俾人拒絕，到時唔知點算好…」
呢個時候我又諗返起Tamama，last day表白，一切動盪嘅根源，少咗呢件事學校會清靜好多。
我：「每一個人…都會經歷嘅…我表白完都只係做咗年幾嘅兵。」對世人而言係咁。
旎：「如果我打定輸數，我係咪唔應該表白？」
我：「唔係，表白唔係為咗得到對方，而係為咗將自己嘅心意真誠咁傳達到對方嘅心入面。」
係呀，呢個係我標準答案，不過我講就叻，實際上我已經俾Tiffany迫咗入個死角入面。
喺呢個孤男寡女共處一室嘅環境，Tiffany而家呢副樣，擺到明九成想同我表白…但唔得，唔係我覺得妳唔好，只不過…我一定會拒絕妳，準備攞把利刃將妳希望拮穿嘅我心跳得異常咁快；旖旎對唔住，我同妳暫時係唔會有可能，可唔可以…俾我用第二個方式嚟愛惜妳，千祈唔好變成…我唔想睇到妳好似曉彤咁。
點算…我無預計過…呢一幕嚟得太突然。
Tiffany嘅眼眶變到水汪汪，深情咁望住我，將個身越哄越埋…唔好咁得唔得…知道表白會失敗所以就強上，放過我啦，我唔會再容許任何一個女仔強姦我。
Tiffany輕輕咁惜咗落我塊面上，大約一秒。
旎：「多謝你，我返去溫書喇，你都畀心機。」
我呆咗坐喺原位，睇住佢孭起書包迤迤然離開，到底…佢係想點？不過至少我可以鬆一口氣先。
佢係知道會失敗，所以放棄？
唔想影響考試心情，所以遲啲先？
想曖昧到有機會成功先…再嚟過？
我乜都唔知，只係知道自己意志非常堅定。
之後嘅補課當然會見到Tiffany，不過佢就好正常；補課啲人通常都返唔齊，遲到早退，先生都懶得理我哋點坐，佢有時都會坐咗嚟我隔籬，但就無表達過啲乜，敵不動我不動之下我都由得佢，同佢講返讀書啲嘢就算。
除此之外都有約我出嚟溫書，但就四個小魔女一齊，我都早就慣，亦慣咗自修室其他男仔想用機關槍射死我嘅眼神嚟望住我…大家都明，雖然小魔女唔係靚到女神咁，但四個一齊嘅威力都唔嘢少。
2010年4月16日星期五。
敏：「你真係唔當會考一回事㗎喎，下星期一就考Physics，三點幾打到而家無停過。」
我：「知唔知乜嘢叫做坐B望A？但我而家唔係大口氣，因為呢個…真係事實嚟。」
敏：「哈…如果你今年downgrade C，我一定會笑死你，等你串串貢咁。」
我：「無所謂啦，都係combine cert啫，會考呢啲年年都可以考嘅，但係個錦標賽係最後一年我同妳可以參加。」
敏：「原來你都知道。」
我：「咁就一年，上年嘅呢個時間，我喺度祈禱希望曉彤可以快啲醒返去考試，就好似上個禮拜嘅事咁。」
敏：「隔咗一個禮拜再去考，唔怪之得唔使溫。」
我：「只要我諗返起曉彤當時個樣，啲公式同答案就會自然浮晒出嚟，唔會唔記得。」
敏：「係囉…醫院溫書真係特別入腦，啲式我而家都重用緊。」
我：「希望曉彤攞到好成績啦，唔好俾一鳴個死仔包搞到分心溫唔夠書。」
敏：「應該唔會嘅，係呢…你出年好大機會同佢哋兩個一班㗎喎…」
我：「都無乜特別嘅，佢哋唔介意就得，我唔會…為咗呢啲原因而轉校。」
因為妳喺度，我就會喺度。
敏：「你唔好同佢打架就得…好喇，唔恰啲中四喇，你過對面開波繼續啦。」
會考，都係咁啦，已經麻目咗，一科一科咁考，星期三五就返學校繼續練波，其他時間就溫書，話咁快考埋最後一科主科，五月十一號星期二嘅生物科。
咁啱我同Tiffany同一個考場…
我：「Tiffany做乜呀…考完試俾我抖抖得唔得？」
旎：「你就一路考一路玩！我好耐無打過波喇。」
搞乜鬼妹妹仔咁熱血嘅…比賽嗰個又唔係妳…定係佢其實係為咗同我一齊打波？就好似我為咗詩敏而咁勤力返去練…
我：「妳咁早返去都無用㗎！全世界都重上緊堂，重要等禮堂考完試清場。」旖旎直情係推住我背脊咁行。
旎：「咦，唔係喎，可以返去同詩敏姐姐食飯㗎喎！」
我：「唔係幾好。」
旎：「做乜唔好喎？」
我：「我話唔好就唔好。」
旎：「做乜呀，對住女神怕醜呀？」
暫時…我都唔係好想因為打波以外嘅嘢去搵詩敏，我都唔知點解，而唔係因為旖旎阻住我哋。
我：「妳理得我吖！既然考完試，同妳去慶祝下啦。」講真我都好感激佢嘅，無論係一開學帶我融入呢班，又或者係陪我哋練波。
我帶咗佢去酒店食lunch buffet，咁就唔使招呼佢，等我可以hea返陣先。
唔係講笑，雖然我好憎背Bio，但由於我上年得條C，又應承咗某個惡魔女人要攞多十分，所以Bio升grade志在必得，呢三四日背到我反肚咁滯，為咗一科我唔會再讀嘅科畀足心機，實在係始料不及…所以我重攰過考其他科。
旎：「嘩！好開心呀！原來你咁惜我！」
入到酒店電梯佢已經興奮到…
我：「喂，妳唔好誤會啲乜…純粹慶祝考完試。」
旎：「無誤會呀，多謝你先。」
講真我都好耐無食過buffet，因為而家無人陪我食，父母去我又懶得陪佢哋…
不過呢，Tiffany又真係幾擦得。
Hea到兩點幾我哋就返學校，咁啱羽毛球教練係考官，好簡單就release咗個禮堂出嚟畀我哋用。
敏：「點呀，旖旎妹妹考成點？」
旎：「無問題！我話嘅！」
我：「喂，妳剩係問佢唔問我嘅？」
敏：「呀？你唔係諗住下年再繼續考咩？吖！我唔記得咗添，你係末代考生嚟㗎喎…希望你英文合格啦，如果唔係，真係唔知點算！」
其實玩我係咪真係咁開心？唔怪之得妳咁鍾意同我玩女神與兵同初音妹妹遊戲…
文：「考完試嗱？恭喜兩位，咁開波啦。」
旎：「你…你哋打住先…我飽得滯…」
我：「叫咗妳啦，任食都唔係食咁多㗎！」
讀書時讀書，打波時打波，真係好。