【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 兄弟鬩牆
QQ榜一釋出，要砌贏啲擦acc嘅大文豪全靠各位小朋友😘
一鳴佢車咗我一巴，力度之大…唔可以叫一巴，係一掌打落我顎骨度，我一時反應唔切失埋平衡成個人跌低咗喺地下，好彩我重識用手頂住埲牆如果唔係實一頭扻落去。
屌你老母冚家鏟！
黐撚線發乜撚嘢神經咁大力打人！
我想執起張凳就車返落佢個頭度，但剩餘嘅少少理智制止咗我咁做，打起上嚟實收唔到科…
我：「係咪曉彤…」我知道實關曉彤事。
鳴：「你做乜撚嘢搞到佢一返學就喊到而家！」
我：「佢…喺邊？」
鳴：「喺保健室。」
我：「佢講咗啲乜…」
鳴：「乜都唔肯講，唔好話唔關你事呀！」
我：「好對唔住…係我…」
鳴：「食屎啦你！唔好同人講你識我！」
打完我，鬧完我，佢轉身就想走人；呢個時候我重未起返身，向前爬一步捉住咗一鳴隻褲腳。
我：「你識唔識我唔緊要…幫我睇住曉彤，求求你。」我跪喺佢前面，頭已低到不能再低。
鳴：「我梗會睇住佢，唔通靠你？仆街！」
講完佢就氣沖沖咁離開咗我間課室，我諗自此，對我哋三個嚟講，呢兩間課室出面係會起咗一埲睇唔到嘅牆，永遠將我哋分隔。
女人無咗，兄弟都無埋…
唔使望，成間課室都鴉雀無聲，肯定全世界睇實我，俾頭先嗰幕嚇到呆咗。
旎：「嚟吖，起返身先…」
Tiffany行咗出嚟，踎喺我身邊扶住我手臂，半拉半拖咁扯返我起身。
無錯，全班望住我，樣衰到爆，都唔知點好。
我：「唔好意思，阻到大家，抱歉…」
我微微向佢哋鞠咗半個躬致歉，畢竟嚇親佢哋。
旎：「唔好理佢哋啦，返埋位坐先…」
我：「Tiffany，妳唔好理我啦，會俾人講閒話。」
雖然呢班同學識咗佢年幾，但難保唔會有人講佢壞話，一陣傳到全校話佢搶曉彤仔就水洗都唔清，我自己就算啦，情聖又好，賤男又好，都俾人講到慣晒，但我真係唔想再累到任何人。
旎：「我唔驚喎。」
我：「唔好咁啦，好煩㗎…」
旎：「我又無男朋友，又無仔仔追我，是但啦，我呢啲無人理嘅薯仔，都想試下可以好似詩敏姐姐咁俾全校討論。」
我：「傻㗎咩，妳自虐狂嚟。」
旎：「係咪friend先，係就畀塊面我睇下先。」
我：「呀！痛…」
旎：「陰公咯。」
我：「有無…流血呀？」
旎：「無…但係瘀晒，我落去小食部攞啲冰畀你敷，你等我一陣。」講完就跑咗出去。
之後都有兩三個男仔嚟問我有無事，我都係唯有苦笑，不過呢，無論佢哋係真係熱心定八掛我都開心嘅，識咗一個月到叫有人理下我。
過咗一陣旖旎攞咗包冰上嚟，同埋唔知邊度搵到塊毛巾，希望唔係抹廁所嗰啲啦，我都費事問佢…一敷落去呢，嘩呀！真係痛到…feel到成塊面又紅又腫，我都唔敢照鏡。
我：「係呢…我塊面，會唔會好礙眼？」
旎：「做乜呀？驚破相唔靚仔溝唔到女呀？」
我：「咪玩啦，我唔想嚇親人咋…」
旎：「無㗎喇，今日全校都會留意住你，唔使諗。」呢層我都知…成四十人睇住唔通封晒佢哋把口咩，曉彤喊到咁肯定又通天，我都係做硬衰人。
敷完個小息之後都係要上堂，三堂連堂Lab，好彩我打側坐用右邊面對住阿sir，希望佢睇唔到啦。
「喂，可唔可以講下發生乜事啫？」
上到嚟對住四個女仔，我竟然覺得折磨。
我：「乜事真係唔講得…當我係衰人就算啦。」
「哎呀，佢想自己孭晒上身呀。」
「唔係囉，我覺得係曉彤麻煩，先會搞成咁。」
「搞到咁樣…係咪無得掹㗎喇？」
我：「唔好討論啦…由得我做毒撚啦…」
旎：「好煩呀妳哋，專心聽書得唔得呀，咁想知嘅自己去拍拖體驗下啦。」
「如果佢散咗，可能係機會嚟喎，Tiffany。」
「係囉，妳咁照顧佢，我係男仔都心動。」
我：「咳，唔好意思，我今年唔會再掂任何女人，只想專心讀書，多謝妳哋嘅好意。」
「哎呀，好man呀。」
「真係成個浪子咁呀。」
旎：「妳哋真係無得救㗎喇。」
其實…我諗佢哋都可以算係八婆嚟，就算之前都成日攞我嚟開玩笑；但唔知點解，可能因為佢哋係細我一年嘅妹妹，我又唔會覺得太黑人憎，未拍過拖嘅妹妹都係咁上下低B同煩。
托住紅腫熱痛嘅面頰，終於捱到放飯。
旎：「今日唔使陪人食飯啦，一唔一齊呀？」
我：「唔使喇。」呢個moment同四個女仔食晏同自殺有乜分別？唔好咁無常識啦…
旎：「如果你介意嘅剩係我同你都得㗎。」
「嘩，Tiffany出手喇。」
旎：「無呀！關心朋友咋嘛！」
我：「拜託，俾我匿埋啦，唔該晒四位女俠…」
講完我就閃走咗，但成間學校咁大我又可以匿去邊？出咗Lab無幾耐已經發覺周圍有人望住我，唔知係收到風定係因為我塊面嘞…
點算好，我早餐都未食，總要有啲嘢落肚。
大排檔？危險。大家樂？危險。搭的士去第二度食？無心情。返屋企食自己？我驚我唔想返嚟學校。最後決定落去食個杯麪摺埋去拉靶算。
我坐到去雨天操場最角落頭嘅位置，耷低頭用八分鐘處理咗個杯麪，好彩無見到啲乜人，但時不時都會有人望下我…唉，然之後上咗圖書館溫書；據我所知，曉彤差唔多從來唔去圖書館，詩敏都好少，呢層又高啲，相對上比較安全，同埋會去圖書館嘅通常都係不問世事嘅摺友嚟。
詠：「哈，原來你真係喺度。」
匿到嚟都有人搵到我嘅…真係吖，雖然好耐以前都同佢喺圖書館撞過一次，而家嘅Wing又剪返短啲頭髮，感覺好似返到去中四嗰時咁。
我：「師姐…妳搵我所為何事呀？」
詠：「如果而家我唔搵你，重有人搵你咩？」
我：「唔好搵我就得，我自己一個都生存到。」
詠：「點解要覺得我係嚟搵你呢？我係想問一鳴佢搞乜？」
我：「妳…已經知道晒？」
果然好事不出門，醜事傳千里…
詠：「咁大件事點會唔知，到放學就會應該連啲form 1仔都喺度討論緊。」
我：「咪妳聽返嚟嘅咁囉，妳都有眼睇。」
詠：「點解佢要打到你咁？」
我：「佢無打錯，係我活該，已經遲咗好多。」
詠：「其實你對曉彤做咗啲乜？」
我：「對唔住，真係唔講得…由頭到尾，其實只係圍繞住一件事。」
詠：「咁你就唔解釋？由得一鳴咁對你？」
我：「可以點解釋？同佢講係曉彤蠻不講理？我係為世所迫？令曉彤傷心嗰個係我…無論原因係點，我都要負返個責任；佢哋兩個而家同一班，我唔通叫一鳴幫住我唔好幫曉彤咩…如果佢可以幫手安慰下曉彤，我已經心足。」
詠：「你真係黐線㗎，都唔知你哋幾個搞乜。」
我：「我都唔知…真係就黐線，由我自閉啦。」
詠：「詩敏佢好擔心你㗎…」
我：「真係無事，返學係為讀書，我而家可以專心做一樣嘢幾好，妳叫佢放心啦。」
詠：「佢都好擔心曉彤，曉彤無覆佢重block埋佢。」呢個其實已經可以預料到。
我：「對於佢兩個…我只可以講係一個遺憾，已經完全無嘢可以做到。」
詠：「點解你要避開詩敏？」
我：「我只係想專心讀書，無其他。」
詠：「如果你同曉彤真係無得掹，不如搵下詩敏喇，我見佢今日一整日都唔開心。」
我：「我諗今日唔會有邊啲人開心。」
有嘅，好黑心炒花生嗰堆囉，但我唔care。
詠：「收埋自己解決唔到問題㗎，唔好咁硬頸啦…」
我：「Wing姐妳唔好玩我啦，我呢頭整喊曉彤，嗰頭走去搵詩敏，曉彤會點諗，一鳴會點諗，全世界會點諗？我未至於厚面皮到咁，而且我唔想再有人講曉彤同詩敏壞話。」
詠：「係嘅…你講得啱，但我知道詩敏佢係鍾意你，唔想睇到你哋咁。」
我：「我同佢嘅嘢…我哋自有分吋…」
詠：「係嘅，我唔應該影響你哋…希望你哋唔會無疾而終啦…但你一個人唔悶咩？」
我：「悶咪溫書囉，溫書咪唔悶囉。」
詠：「唉…我都想搵返個SP。」
嘩，Wing姐妳搞乜鬼，咁跳脫嘅，唔好嚇我好喎。
我：「妳唔好望住我，我唔available㗎…」
點知佢用更加陰沉嘅眼神嚟望我。
我：「拜託，我係好乖嘅小朋友嚟…唔會掂學校嘅女人㗎，嗱…唔好咁呀…真係出去叫雞都唔會掂㗎…其實我講笑，唔好望住我啦…」
詠：「黐線，鬼得閒搵你，你咁危險，我唔想俾曉彤同詩敏兩個聯手分屍。」
我：「咁妳講嚟做乜啫…」
詠：「無呀，分咗手之後真係太悶咋嘛…」
我：「其實妳可以唔分㗎，拖下拖下到妳入大學都實散啦…應該係。」
詠：「就係唔想咁，一鳴佢好細路仔，我唔想害咗佢，如果搞到佢讀唔到U我會成世都唔安樂，等佢嘗試下失去嘅滋味，佢先會識得長進。」
我：「唓，如果為咗條女就會讀唔成書，咁都活該啦，我都懶得理佢。」
詠：「唔好咁衰啦，不過…佢又真係幾好用嘅…」
用？Wing妳想講點用？果然淫Wing…
詠：「係呢，你打開羽毛球，有無其他學校嘅男仔，睇落OK身型又fit㗎，介紹嚟識下吖。」
我：「我…基本上只係喺學校入面打波…」
詠：「唓，知喇，剩係同女神打吖嘛。」
我：「我諗…未必再有機會同佢打…」
我考完會考，佢就要準備高考，無論到時曉彤喺唔喺度，點諗都好，睇怕都幾難再一齊打。
詠：「係呢，如果有男仔整喊我，你會唔會幫我打返佢？」