【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 天崩地裂

100k釋出，感謝大家支持，令我有第四篇100k嘅文章。

我用衫袖抹一抹啲眼淚，又仆返出去的士站，上車前我重喺隔籬餅店買咗兩個芒果布甸，希望佢食完會開心返啦。
喺車上面我一路諗要點樣氹返曉彤，要教佢計數，以後唔好貪得意亂咁攪佢…
一路諗，不停喺腦海重覆，直至我去到佢屋企樓下見到佢企喺走廊附近…佢…係喺度等我返嚟？我有一股不祥嘅預感。
我：「曉彤？做乜落咗嚟嘅？快啲返上去啦…」
佢兩眼通紅，明顯係大喊完一場，我都已經即刻仆返學校幫佢攞書啦，唔使咁委屈呀…同埋，佢嘅裝束重係同頭先一樣，唔知條街有幾多人睇到佢飛釘呢…
彤：「你走啦。」非常冷淡嘅聲音，無情嘅面容。
我：「曉彤，我知錯喇，以後都唔會咁對妳，幫妳攞咗本書返嚟喇，睇下。」我好勉強咁擠出微笑。
彤：「志華…你真係好恐怖…你知唔知。」


我：「對唔住，我以後都唔會亂攪妳，會負責任戴返套，好唔好？我保證唔會再發生呢啲事。」
佢望都無望過我，忽然變得好似一座冰山咁，呢種反應比起頭先我出門口時佢掟嘢重要恐怖好多倍，就算以前日日鬧架，冷戰，發脾氣我都從來未見過佢咁樣，呢種崩潰同絕望…
呢個時候曉彤遞起咗佢隻右手，我先發現到佢攞住咗張對摺嘅單行紙，我感覺到大事不妙。
然後佢喺我面前打開咗張紙。
彤：「呢張乜嚟㗎？」
『志華：對唔住，你講嘅係事實，我係一個錯誤，我出賣咗我嘅好朋友，欺騙你嘅感情…』
一模一樣嘅紙我屋企書櫃都有一張，只不過呢張上面有幾粒錯字，同埋一啲修改…睇怕就係佢起完稿無掉然後攝埋喺啲notes入面…
我：「會唔會…係妳作文…寫小說…」已講無可講…
彤：「到咗而家你重想呃我！」
佢好大聲咁對住我怒吼，呢個時間正值放工時段，好多經過嘅街坊都望向我哋。


我：「曉彤…妳…記得返晒？」
彤：「嗯。」
我：「曉彤，無嘢㗎，過咗去就算，我哋重新…」
彤：「我唔要你哋嘅可憐呀！」
佢無直視我，但眼神入面散發住嘅嬲惱，憤恨，厭惡正喺度無孔不入咁滲進我嘅身體同心靈，我一直所堅持嘅嘢突然之間好似天崩地陷咁瞬速瓦解，就連呼吸都好似想自然停頓咁。
我：「唔係…我唔係咁…」我無力咁辯解。
彤：「你可以每一分鐘都喺度呃我，重要呃埋自己；明明我就唔係處女，你扮到同我享受第一次；你從來都唔鍾意我嘅性格，你夾硬飾演到無微不至…而詩敏，可以日日對住我笑，同我一齊講你嘅嘢…你兩個真係好恐怖。」
我：「我哋都係為妳好，唔想妳唔開心。」
彤：「我唔使你哋可憐！」佢再重覆一次。
我：「曉彤，我唔係可憐妳…每一日我都係真心咁對妳，求下妳…唔好咁。」


彤：「畀本書我，然後永遠消失。」
佢喺我手入面攞走咗本書，我順勢抱住咗佢。
我：「曉彤，唔係咁㗎，我無呃妳。」
彤：「你無呃我，係我呃你啫。」
佢喺我手入面掙扎推開我，論力量佢當然唔會夠我嚟，但當女仔出嘅力去到某一個種度，你會感受到佢嘅決心而唔敢再同佢鬥力。
我：「妳原諒我啦，我哋可以繼續一齊走落去，會過得開心㗎。」
彤：「唔需要，麻煩你即刻消失。」
我：「我唔要，我要留喺妳身邊。」
正當我想伸出雙手去摸佢塊面嘅時候…
彤：「吖吖吖吖吖吖吖吖！」
佢嗌得好大聲，大聲到保證方圓一百米嘅人都會望晒過嚟，我…唔敢再掂佢。
我跪咗喺佢面前：「我愛妳，求妳…相信我。」
彤：「你夠膽同我講你心入面無詩敏？」
佢呢一句就好似枝冰槍咁直穿我心臟，由背脊度出返嚟，無錯…我唔敢講，唔敢再呃佢，甚至連正視佢嘅勇氣都無。
佢擰轉面向返大堂行，我企返起身衝前兩步。


我：「曉彤，求求妳…唔好睇唔開…」
我已經諗唔到再有乜嘢可以講，求下妳，曉彤妳點憎我恨我都唔緊要，只求妳好好珍惜自己。
彤：「我無興趣為你哋呢啲仆街死，想我過得好地地就以後唔好俾我見到你哋。」佢背住我講，帶住啜泣聲。
我只可以企起原位呆咗咁睇住曉彤行入電梯大堂，剩返一個沒有靈魂嘅空殼，同埋兩兜芒果布甸喺度…
唔得，呢個唔係我可以做空殼嘅時間。
我：「喂…伯母…對唔住…」
彤媽：「志華乜事呀？你把聲咁嘅？」
我：「曉彤佢…佢…記得返晒啲嘢喇…」
彤媽：「咁…佢點樣呀？」
我：「佢返咗上屋企，我喺樓下…伯母妳返到嚟未呀…我好膽心佢…」
彤媽：「重有幾個站，你等等我。」
過咗十分鐘到曉彤媽咪返到嚟。
我：「伯母，對唔住…曉彤封遺書原來有寫稿，佢唔小心睇到…記得返晒之前嘅事。」
彤媽：「咁呀女有無講啲乜？」
我：「佢叫我以後消失…」


彤媽：「對唔住，係我唔識教女…麻煩晒你喇，我諗…你都抖下先啦，或者佢過一陣會搵返你，唔好諗咁多…我返上去睇下佢先。」
我：「伯母，唔好意思…我書包重喺上面…同埋，呢個我買畀佢嘅。」
彤媽：「嗯，我幫你攞，你等一等。」
過咗五分鐘曉彤媽咪落返嚟。
彤媽：「嗱，你個書包呀。」
我：「曉彤…佢點樣呀？」
彤媽：「佢喺度計緊數，我諗佢唔多想同人講嘢，放心啦，我會睇住佢㗎喇，你咁細個要你承受咁多嘢，辛苦晒，唔使自責。」
我：「伯母，如果曉彤想搵返我，我隨時都會喺度。」
彤媽：「嗯，好啦，再見喇，志華。」
重有，呢件事我都要同一個人講。
敏：「志華？發生乜事呀？」我罕有地直接打畀佢…
我：「曉彤啲記憶返返晒嚟。」
敏：「咁…咁佢點樣呀？」
我：「佢叫我消失…同埋妳…」
敏：「咁嘅話我明白喇。」


我：「我…係咪無嘢可以做到…」
敏：「睇怕就係，我或者夜啲send條message畀曉彤啦。」
我：「咁樣，會唔會怕刺激到佢…」
敏：「放心啦，我有分吋，唔會亂講嘢。」
我：「詩敏，重有一樣嘢…我諗…妳可唔可以幫我同阿sir講，我諗今年都唔會再嚟羽毛球隊，妳話我要專心溫書啦，唔該晒妳。」
敏：「好…我知道，但你真係無事吖嘛？」
我：「放心，我無事，重好硬淨，係時候讀書。」
敏：「咁好啦，唔好要我擔心你…知唔知？」
我：「嗯，咁我收線喇，bye bye。」
睇嚟，真係一切都要完，都唔知自己搞乜，早知考好科英文轉校算，而家一齊喺學校…唉。
到咗第二日返學，好唔想返但都係要返，唔知曉彤有無返學呢…一鳴佢又會點…佢兩個同班無理由叫佢唔理曉彤㗎，咁睇怕我呢個兄弟都…
旎：「喂，你做乜面色咁差呀？」
我：「係呀，半死狀態，如果可以嘅話今日唔好同我講嘢。」
旎：「做乜呀，嗌架鬧分手呀？」
我：「如果係咁小事就好…」


我已經唔再介意身邊有無女朋友，可以做啲乜，只要…唔好再有女仔俾我傷害，由我自己一個啦。
旎：「係乜事，準備又派花生嗱？」
我：「你哋食幾多花生我都無所謂…只係…」
旎：「哎呀…唔好喊咁口啦。」
我：「Tiffany俾我靜下啦。」
到咗小息，唔想出課室，好驚見到任何人。
點知過咗兩分鐘一鳴就氣沖沖咁衝咗入嚟我間課室，我諗梗係曉彤有事…我好心急就行出去問佢…
我：「曉彤佢…」
「啪！！！」